《愛在。貴族學園》: Ch 32 ~ 陸運會之一 Part 6

Ch 32 ~ 陸運會之一 Part 6（連載日期：2025/12/16）

「嗱！呢個係整畀你嘅愛心早餐，小喬！係你男朋友林俊軒我今朝一早起身親手製作嘅！」就喺呢個時候，俊軒喺自己個背囊度，攞出一個自己親手製作嘅三文治，然後擺咗喺韻喬嘅眼前。
 
韻喬見到之後，流露出一個難以置信嘅表情，呆咗咁望住俊軒「嘩！乜原來有錢仔都會親自落手整嘢食咖喎！多謝你先喎！唔知…….好唔好食咖呢？嘻嘻！」

「我都唔知啊，我自己今朝食過就ok嘅。不過就算唔好食都好，都叫有我一份誠意喺裏面嘛，希望喬喬你會鍾意啦！」俊軒咁樣講完，韻喬就即刻面都紅埋。
 
然後俊軒就幫韻喬打開包裝紙，原來係一個生菜番茄雞蛋烤雞肉三文治「哈哈！你又整得幾足料喎！咁我就唔客氣啦小軒！」





正當韻喬想自己拎住份俊軒份愛心三文治嚟咬嘅時候，俊軒突然將份三文治拎住，然後遞去韻喬個嘴度。
 
韻喬知道俊軒想點，於是就話「喂啊，小軒呀，呢度……好多人咖！我自己拎住食咪得囉！」韻喬好緊張咁同俊軒講，同時塊面都變到好紅，然後就由俊軒手上，將自己份三文治搶返嚟。
 
而韻喬之所以咁講，就係因為附近好多同學已經望住自己同俊軒，搞到氣氛非常尷尬。

當然俊軒好快都意識到好唔對路，於是都將個三文治交番比韻喬。不過已經為時已晚，因為兩位身為學校嘅風頭躉，一舉一動都受到其他人注視。

而喺校長同訓導主任講完廢話之後，陸運會就正式開始。
 




首先進行嘅，就係女子甲組標槍初賽。天殷喺聽到司令員嘅召集廣播之後，就準備動身落去報到。

不過，禮謙都突然之間起身，令到天殷有少少愕然「謙謙，依家係女子標槍召集，唔係男子跳遠喎，你起身做咩呀？」
 
「呃，冇啊殷殷，因為我覺得作為你嘅好朋友，支持你都係應該嘅，不過今年我地就唔好嘈住小軒同小喬啦，呢兩個禮拜就由得佢地兩個好好戀愛啦！嚟啦殷殷，我陪你落去報到啦！」禮謙笑笑口同天殷講，搞到天殷一時都唔知點反應好。
 
雖然天殷聽到之後一臉尷尬，但最後都係選擇同禮謙一齊出去。不過，當天殷同禮謙經過看台嘅時候，韻喬就親眼見到呢一切，但係韻喬都冇出聲，繼續享受由男朋友親手整嘅三文治。
 
而按照學校嘅規定，非參賽運動員，一律都唔可以喺賽場上停留。所以禮謙就送天殷去到賽場嘅入口...





「我就送到你去呢度啦，加油啦殷殷！預祝你……可以蠃到塊獎牌返嚟！」然後禮謙突然之間用右手，摸一摸天殷個頭，一下子搞到天殷塊面紅哂。

「多……多謝你！我一定……會加油咖！」天殷於是好快就跑入標槍項目嘅賽場。
 
大家唔好睇少天殷，雖然佢身為一個富家大小姐，就以為佢包括運動之内所有咩都唔識。但其實天殷嘅體育細胞都算唔錯，所以要贏獎牌嘅話，都唔係完全冇機會。

而標槍呢個項目，都有幾十位同學參加，當中包括同班嘅陳旻靜同學。
 
同天殷一樣，雖然個名叫旻靜，但其實佢都係一個運動好好嘅同學，籃球、游泳、跆拳道都比較叻。

至於田徑，雖然都係屬於爭標分子，但唔知點解旻靜往往都欠缺最後一丁點嘅運氣，所以大部分時候都同頒獎台無緣。

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer