《愛在。貴族學園》: Ch 32 ~ 陸運會之一 Part 7

Ch 32 ~ 陸運會之一 Part 7（連載日期：2025/12/20）

「咦，估唔到天殷同學原來你都會參加標槍比賽喎！」旻靜非常有信心咁同天殷講「不過你放心啦，今日我一定唔會放水，更加唔會做炮灰，一定會上到頒獎台嘅！我一定可以！」

「我都會嘅旻靜同學，我都欣賞你全力以赴嘅心態，希望你今次都有獎攞，我地兩個一齊加油啦！」天殷都非常有信心同旻靜講。
 
當評判同一衆選手解釋過比賽規則之後，各個選手就正式開始比賽。首先評判叫旻靜作第一次試掟，旻靜好輕鬆咁掟出一支生槍，而且成績都叫唔錯，其他選手見到之後，都感到壓力非常大。

之後有部分其他選手都因為唔夠力嘅關係，死槍、唔夠遠嘅情況都偶爾發生，令到旻靜一直都喺一衆選手領先。
 




「李天殷同學！」「到！」評判老師好快就叫到天殷個名，天殷於是就行去白線前準備。

喺扎好個馬之後，天殷就開始助跑，奮臂一擲，支生槍飛到好遠，直插旻靜塊鐵牌附近。當裁判走近記錄，發現天殷嘅距離其實同旻靜差唔多，但旻靜依然稍為佔優。
 
去到第二輪嘅比賽，旻靜嘅槍比起第一支再遠多少少，而且只要差45cm，就會打破大會記錄，搞到在場嘅其他選手都有少少驚。

而其他同學表現因而繼續失準，死槍、擲界、唔夠遠情況依然有發生，但其實比第一輪有改善，所以經過第二輪比賽之後，部分選手都感到心灰意冷。
 
之後就再一次輪到天殷，天殷知道自己要贏到旻靜嘅話，就必須要喺第二槍出盡全力，先會有機會以首名進入決賽。天殷於是就發出比頭先更大嘅力氣，一支生槍就向遠處嘅目標飛去。





“鏗”，一下清脆嘅落地聲，都係一支生槍。今次天殷嘅槍直接喺旻靜塊分數牌後面。
 
到最後初賽排名，天殷以5厘米之差，成功壓過旻靜進入決賽。天殷知道咗之後好開心，同時走去搵旻靜打氣「旻靜頭先你打得幾好啊，希望決賽嘅時候，我地都一齊繼續加油啦！」

旻靜右手一搭天殷膊頭道「我都對你嘅技術刮目相看，殷殷，決賽你都要加油啊！」
 
為咗令選手們有時間以更佳狀態應付決賽，學校將初賽同決賽分開進行。而天殷同旻靜就行返去看台休息。
 
但去到場區出口嘅時候，天殷就發現禮謙就已經企咗喺度等自己...





「喂殷殷，結果如何呀？你入唔入到決賽啊？」然而，旻靜喺禮謙未講完嘅時候，就已經自動走開。

不過天殷同禮謙其實都只係同學關係「呃……睇嚟旻靜同學仲未有走出“失去”俊軒嘅陰影吧，我都唔想佢對我地幾個嘅誤會越來越深。」禮謙一臉無奈咁講。
 
「嗱！我都叫咗你唔好咁誇張咖啦，依家出事啦！」天殷不滿但同時又帶點怕醜咁講「我唔理你啊，一陣間你比賽嘅時候，同我醒醒定定啊你！」

「男子甲組擲鐵餅初賽第一次召集！」此時大會司令台傳來宣佈。
 
「咦謙謙，乜你唔係參加咗鐵餅咩？喂到你要去報到啦！記得你一陣比賽要加油啦！」天殷繼續好興奮咁講。

「係啊，咁我落去啦，我會加油咖啦，等我好消息！」禮謙說罷就進入場區範圍，而天殷就自己一個走返上看台，然後自己等候下一場比賽。
 
就喺天殷坐到有少少悶嘅時候，就見到韻喬就跑過嚟「殷殷！做咩你好似好無聊咁嘅！」

「咦，喬喬你做咩走過嚟啊？乜你唔使陪你個小軒男朋友咩？」天殷雖然都好酸好朋友有男朋友，但係對於韻喬嘅到訪，天殷心底裏其實都好開心。





而韻喬聽到天殷提起俊軒之後...

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer