《愛在。貴族學園》: Ch 32 ~ 陸運會之一 Part 8

Ch 32 ~ 陸運會之一 Part 8（連載日期：2025/12/28）

而韻喬聽到天殷提起俊軒之後，塊面都變到好紅，仲好怕醜咁話...

「喂呀！衰人你又喺度提佢啦！咁大家拍咗拖之後，都仲會有自己生活嘅圈子咖嘛！」

天殷聽到就笑一笑，然後就話「張韻喬，你唔好唔記得我同軒仔都係世交嚟喎！」
 
「我知！不過殷殷我想講呢，頭先呢其實我都有睇你標槍比賽咖，你好似都玩得唔錯啊！而且你依家咁淡定，你一定入到決賽啦？」韻喬一邊飲水一邊問天殷。





「我當然可以啦張韻喬！你唔係咁睇唔起本小姐啊嘛！？不過其實頭先呢，我好似好唔小心……過咗旻靜頭……第一名入到決賽…..」天殷好細聲咁同韻喬講。
 
韻喬聽罷就露出一個難以置信嘅表情「嘩！我記得你明明都冇乜點練過，都居然可以過到旻靜頭？！果然係勁啊李天殷！睇嚟我真係冇睇錯人！決賽你都要加油啦，知道未呀？」
 
「放心啦喬喬，我一定會想盡辦法贏到旻靜嘅。不過呢，其實你唔覺得旻靜好似一直都爭少少運氣咁咩？次次陸運會都攞唔到金牌…」天殷若有所思道咁講...

「而且我發覺，頭先喺評判老師公佈決賽名單之後，同埋我行出場區同謙謙傾計嘅時候，旻靜又突然之間走咗去……」
 
韻喬聽到之後大吃一驚「唔係吖嘛！唔通佢誤會你同禮謙…….？旻靜會唔會諗得太多啦掛！唉！一日最衰都係林俊軒個死人頭！星期一嗰日無端端亂咁喺班房度，搞埋哂啲咁嘅嘢！！搞到人地唔開心之餘，仲要搞到其他人誤會！」韻喬又講起之前俊軒喺班房求婚嘅事，不過喺講嘅時候，韻喬都仲係有少少面紅。
 




「喬喬啊，你就唔好又咁話軒仔佢啦，不過又好老實講啦，我自己都知道軒仔係真心錫你嘅，而且有個重點，就係軒仔都要諗辦法阻止嘉惠拆散你地兩個。如果之後有機會嘅話，我自己會同旻靜慢慢講清楚咖啦！」

天殷有小小語重心長咁同韻喬講上面嘅一番說話，但之後又繼續講落去...

「不過我總係覺得，以旻靜嘅條件，其實都應該會受唔少男仔歡迎咖啵，都唔明點解旻靜都唔去接受人呢？」
 
「可能……都係因為旻靜鍾意我男朋友掛，但其實喺呢幾日裏面，我都見旻靜佢好似好唔開心咁……」講講下韻喬突然之間都好sad...

「不過都唔緊要啦，我相信係你嘅話，你應該可以氹到佢嘅……殷殷啊，過多一陣咪跑男子甲組1500米嘅？不如一陣間我地去幫小軒打氣囉，好嗎？」
 




「梗係好啦！」天殷好興奮咁講「無論係自己嘅好朋友，定係好姐妹嘅男朋友兼都係我嘅朋友，我都一定會支持嘅。不過1500好似未夠鐘跑喎，不如…我地都各自返上看台休息陣先？」

「都好，咁我地一陣見啦！」韻喬講完之後，就同天殷各自走返去自己社嘅位置。
 
而男子甲組擲鐵餅項目競爭都好激烈，唔少參賽嘅同學都有好成績，於是基本上喺初賽裏面，都冇參賽者可以坐定粒六，確定自己可以打入決賽。而經過兩輪比賽，暫時禮謙排名第七。

至於排行第一，就係由一個花名叫“膠豬”嘅朱凱倫同學奪得。

去到第三輪比賽，各位選手都繼續出盡全力，確保可以獲得決賽嘅10個入圍資格。
 
好彩到最後，皇天不負有心人，需要喺賽事爭獎牌嘅禮謙，都成功以第四名進入決賽。而排第一嘅，當然就係朱凱倫同學。

不過，同頭先天殷嘅標槍比賽唔同，擲鐵餅嘅決賽緊接初賽進行，而為咗令比賽嘅氣氛更加緊張（應該話盡快清場），決賽嘅試擲機會就只有兩次。
 
憑住穩定嘅發揮，再加上之前努力嘅練習嘅付出，禮謙嘅成績比初賽仲要好，基本上都可以威脅到朱凱倫呢隻“膠豬”。





但對最後，始終朱凱倫同學係中六嘅學生，禮謙要挑戰都非常困難，所以最後只係得到一個銅牌。而“膠豬”同學就得到自己最後一届中學陸運會嘅第一金。

（Ch 32  陸運會之一  ~ 完）

IG link https://instagram.com/bear_big_big_writer 
Threads https://www.threads.net/@bear_big_big_writer