《愛在。貴族學園》: Ch 33 ~ 陸運會之二 Part 1

Ch 33 ~ 陸運會之二 Part 1（連載日期：2026/01/03）

呢一届陸運會嘅賽事如同往年一樣，各個項目嘅比賽都被編排得密密麻麻，非常緊凑，而同學們都非常投入賽事之中。

好快就嚟到女子甲組跳遠項目，因為都係一個非常大路嘅項目，所以每一個組別嘅初賽選手往往都會超過50名。

韻喬喺聽到召集廣播之後，就同身邊嘅俊軒講「小軒啊，我要落去準備參加跳遠比賽啦！你乖乖地喺度等我喎！知道未呀？」

「我知道啦！喬喬你都要加油喎！」俊軒然後就喺韻喬面上錫咗一啖。





韻喬當然就好似一直咁樣甜笑，然後就同俊軒講「嘻嘻！收到你嘅愛的打氣啦！咁我依家落去報到啦！」俊軒點頭之後韻喬就自己落去報到。

今次負責跳遠項目嘅老師，就係今年新加入學校、負責初中英文同高中經濟學嘅Kitty老師。
 
開始之前，Ms Kitty拎住個大聲公喺度同一選手講「好啦，各位參加女子甲組跳遠嘅同學，坐低喺地下聽下Ms Kitty我講先，雖然絕大部分嘅同學我冇教過你地。」

「而跳遠呢個項目規矩…其實好簡單，喺一陣間叫到你地個名之後，就行出去起跑區，當我地ready嘅時候，我地就會舉手示意，咁同學你ready就可以舉手，然後隨時開始。」
 
「不過麻煩各位參賽同學都要記住，必須要喺地下條白綫前起跳，踩界嘅話嗰一輪比賽會直接foul。」





「而喺初賽裏面，每位參賽同學將會有三次試跳機會，我地會take各位參賽同學嘅 average，成績最好嘅15位同學會入到決賽。」

「請問仲有冇其他同學有疑問？如果冇嘅話，我地就正式開始第一輪比賽，希望大家比賽嗰陣都可以加油。」Ms Kitty講完上面嘅說話之後，跳遠比賽就正式開始，頭幾位參賽嘅同學表現都好穩定，明顯都係有備而來。
 
「下一個，張韻喬同學！」Kitty老師叫到韻喬個名，韻喬就起身出去。Kitty老師舉手之後，韻喬自己都準備好，於是同樣舉手示意。

韻喬之後開始助跑，去到白綫之前奮力一條入沙池，整個過程清脆利落。

身邊擔任工作人員嘅同學，隨即用量尺去量度韻喬嘅成績，而Kitty老師判定有效之後隨即記錄成績。





往後嘅其他參賽者，大家嘅表現都好唔同，偶爾會有比較突出嘅參賽者，但亦都有人唔小心踩界而被foul。
 
之後去到第二輪試跳，衆人表現都比較平均，偶爾仲有參賽者因為踩界被foul，而韻喬嘅表現都可以話唔錯嘅。

終於都去到第三輪，喺開始試跳之前，Kitty老師刻意透過大聲公，同在場嘅同學講「依家嚟到初賽嘅最後一跳啦，各位參賽同學繼續俾心機啊，因為大家都仲有機會入到final咖！加油！好啦，最後一輪試跳開始！」

正如同頭先兩跳一樣，過咗無耐就到韻喬。
 
其實因為之前有好好練習過嘅關係，韻喬其實喺前兩跳嘅發揮都好出色。不過跳遠項目競爭實在太大，所以到呢一刻，韻喬對於自己可唔可以進入決賽，其實都冇太大嘅信心。

但因為要爭獎牌嘅關係，韻喬唯有出盡全力去跳。結果出到嚟，成績比之前兩跳更加好，連Kitty老師都私下暗讚。
 
而喺同一時間，男子甲組1500米賽事準備舉行，而且已經去到第二次召集，所以參加咗呢個項目嘅俊軒，都已經落咗去準備，途中經過正喺度等候成績嘅韻喬「喂！跳成點啊喬喬，有冇信心會入到決賽啊？」
 
之後俊軒想喺後面，抱住韻喬嘅時候...





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer