《愛在。貴族學園》: Ch 33 ~ 陸運會之二 Part 3

Ch 33 ~ 陸運會之二 Part 3（連載日期：2026/01/24）

但其實重點都係後面，因為去到離比賽最後500米嘅時候，俊軒見時機成熟，開始慢慢加少少力試圖突圍，跑到主群選手之中嘅前列位置。

而到最後一圈，大會都會喺終點線響鈴，提示選手仲有一個圈就完成比賽。就係呢個時候，一衆選手都會開始發力，盡量同前面領先嘅選手拉成均勢。
 
俊軒呢個時候終於都開始爆發，一個一個咁追上去，去到最後250米嘅時候，已經追到頭三名嘅位置度。

不過，喺面對一衆後排選手步步緊逼，前面嘅選手當然都會加速，保持自己先前努力得出嘅領先優勢。





“我一定要贏，一定要幫小喬贏個金牌返嚟…….”喺俊軒心裏面，佢一直鞭策住自己，加更多嘅力，盡量去爭取金牌送比韻喬，於是，佢再奮力追趕上前面嘅選手。
 
去到最後200米，俊軒一直加速，已經追到上去第二嘅位置，距離金牌嘅位置只差一步，於是俊軒繼續加大力度過人，終於去到同第一嘅選手差兩到三個身位。

不過第一嘅選手都唔係省油的燈，一邊過彎一邊向後望一下俊軒嘅位置。

原來呢個同學，竟然就係頭先鐵餅比賽見過嘅朱凱倫同學。朱同學見到俊軒來勢洶洶，於是都加更大馬力，去拉返開自己同俊軒嘅距離。
 
俊軒見狀，即刻再加大力度去追。基本上到最後100米直路，就得俊軒、朱同學同跑第三、四嘅選手去鬥，當然跑第三嘅同學都已經追到好貼俊軒。





俊軒此時嘅肌肉同精神都已經非常緊蹦，盡全力想跑過朱同學頭。
 
不過可惜嘅係，朱同學畢竟都大過俊軒，依然保持住優勢，最後以2.5個身位之差贏咗俊軒，贏得男子甲組1500米金牌。

俊軒衝線之後，當刻成個人覺得好攰，成個坐喺跑道旁邊，然後好失望咁抱住個頭呆坐。
 
韻喬喺離遠見到俊軒咁失望嘅樣，成個人就即刻擔心起嚟，同時都覺得自己呢個時候，係需要喺俊軒身邊安慰男朋友。

所以韻喬就同天殷、禮謙講「殷殷、禮謙，我想入去睇一睇小軒先，你地都係返上看台休息下先啦，定係你地想等埋我地？」





「唔緊要啊小喬，我地都係喺度等你地返嚟啦！而且我地都覺得，我地做得佢好朋友嘅點都要幫手氹下嘅！」禮謙好冷靜咁講，而天殷都同意禮謙嘅說話，於是都點點頭。
 
韻喬點個頭之後就衝入場區裏面搵俊軒，好快就見到自己男朋友好安靜咁坐喺地下度頹廢「做……做咩唔開心自己一個坐喺度啊，傻瓜！」

韻喬同一直收埋自己個頭嘅俊軒講「其實，你今次已經好叻咖啦！全個Form 5 1500米跑得最快喎！」
 
「對唔住啊小喬！我……拎唔到1500金牌送比你！不過…….」俊軒低頭，而且用抱歉嘅語氣同韻喬講，但係就即刻畀韻喬打斷咗...

「傻豬啊，我梗係知道你已經盡咗力跑咖啦！你其實真係真係已經已經好叻仔咖啦，所以，唔好再因為贏唔到金牌而怪責自己啦，好嗎？」韻喬一邊摸俊軒嘅額頭一邊講。
 
「而且1500米拎唔到金都唔緊要咖，你之後仲有三級跳同800米，代表你仲有機會拎到金牌嘛？所以就唔好再灰心同emo啦，你可以拎到呢塊銀牌，我都已經好滿意啦！」

之後韻喬就錫落俊軒嘅額頭度。「多……多謝你呀女朋友！」俊軒就韻喬嘅舉動表示感激。

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer