《愛在。貴族學園》: Ch 33 ~ 陸運會之二 Part 4

Ch 33 ~ 陸運會之二 Part 4（連載日期：2026/01/30）

（Penana 版本30萬閲讀加更，多謝大家一直嘅支持）

「傻瓜，你係我男朋友喎，喺你唔開心、失意嘅時候，我就梗係要氹返你咖啦！好啦，殷殷同禮謙喺出面等緊我地咖，我地快啲出返去見佢地啦！」兩個人於是並肩向看台方向走去，期間都有唔少人恭喜俊軒。

但更多嘅，都係因為旁邊嘅韻喬實在太靚嘅關係，所以都向韻喬報以注目禮。
 
不過，韻喬嘅呢個舉動又一次畀自己嘅情敵 - 嘉惠離遠見到，都唔知道老謀深算嘅嘉惠，又會想對韻喬做啲咩出其不意嘅行為，去破壞俊軒同韻喬之間嘅感情。





「喂!頭先跑得幾好啊軒仔！」連天殷都加入勸導俊軒嘅行列「而且，我好似見到喬喬笑得好開心咁喎，睇嚟都知道小喬好滿意你嘅成績咖啦！所以你呢，就唔好再灰心啦，收拾心情準備好之後嘅項目啦！」
 
連禮謙都跟住天殷之後話「做得好啊軒哥！雖然我都有少少遺憾，鐵餅得個銅牌。但如果可以將呢份遺憾，化成之後嘅源動力，其實都幾正能量啊！而且，我都有信心，一陣你一定可以拎到一塊金牌送畀小喬！一齊加油啊兄弟！」禮謙之後都抱一抱俊軒。
 
「我真係……真係好多謝你地幾個，不過我頭先都真係已經盡咗力啦，唯有寄望之後嘅比賽，可以有更加好嘅成績啦！你地……都要加油啦！」俊軒都逐一抱一抱大家「一陣lunch time不如我地都一齊食飯囉？」

「好呀，咁我同天殷一陣間過嚟搵你啦！一陣見！殷殷，我地行啦！」「嗯！好呀謙謙！」

禮謙之後就同塊面非常紅嘅天殷行開。而俊軒就同韻喬就一齊行返自己個社嘅區域度休息。
 




「頭先，跑得唔錯啊！」就喺兩口子行緊返去嘅時候，突然之間有人喺俊軒後面講野，俊軒同韻喬於是都停低腳步望向後面。

原來就係已經手握兩金、先後贏咗禮謙同俊軒嘅朱凱倫同學，用一副趾高氣揚嘅語氣同自己嘅師弟講...

「能夠可以一直逼到我最後，而且由主群一路追到上我度。如果頭先我稍為唔集中嘅話，可能我就會跑第二！」
 
「唔係啦，都係師兄你有實力啫！其實我頭先真係用咗唔少力去追你，而且都追得好辛苦呢！」俊軒非常有禮貌咁答朱同學，但係朱同學好快都注意到旁邊韻喬嘅存在...

「林同學你頭先咁落力去同我鬥，應該都係想贏個獎牌，畀你身邊嘅呢位靚女師妹、5A嘅張韻喬同學嘞，係咪？」
 




韻喬同俊軒聽到之後兩個都即刻面紅紅，變相默認朱凱倫同學嘅講法「哈！個師妹塊面紅到咁，即係代表你地係拍緊拖啦哈哈！但坦白講吖，你地兩個真係好襯，希望男同學你可以繼續努力，唔好令呢位咁靚，又受好多男仔歡迎嘅張韻喬同學失望啦！」
 
「師兄唔好意思，請問……你識我？」韻喬一臉奇怪而且好怕醜咁講，因為自己都估唔到，對面呢位中六嘅師兄，居然講得出自己全名...

「張韻喬同學，其實喺學校頒獎禮嗰陣，好多時都見過你上台領獎。而且，當初你都係獲邀請加入我地學校，加上學校嘅scholarship年年都有你份，自然大家都會知道你個名啦！」朱同學道。
 
畀眼前呢位師兄，知道自己咁多嘢，韻喬一時之間都唔知道要點樣反應...

「唔使咁怕醜喎，張韻喬同學。不過，都介紹返我自己先，我叫朱凱倫，大家平時都鍾意叫我做膠豬，初次見面，幸會！」然後朱同學就伸出手…

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer