《愛在。貴族學園》: Ch 33 ~ 陸運會之二 Part 5

Ch 33 ~ 陸運會之二 Part 5（連載日期：2026/01/31）

「呃…朱師兄你好，初次見面，多多指教！」韻喬於是基於禮貌，都伸出手去同朱同學握手。

「朱師兄你好，我叫林俊軒，都請多多指教。」俊軒當然都有同呢位競爭對手握手之餘，都搵到一個位去介紹自己……

「放心啦朱師兄，我都一定會俾心機，盡全力去參加後面嘅比賽，一定唔會令到張同學失望，而且我頭先都好多謝你，帶來咗一場咁精彩同刺激嘅比賽比我，能夠參與其中深感榮幸！」俊軒繼續講。

「唔敢當啦林同學，好啦，我都要返去預備之後嘅比賽，唔阻你地兩位啦！你地兩位喺之後嘅比賽都要加油啦，再見！」說罷朱同學就行開咗「再見朱師兄！」俊軒同韻喬同聲道。
 




「估唔到連朱師兄都知道我個名，唔通…..我喺學校真係因為身份嘅問題，所以先會咁出名？」韻喬一邊行一邊好緊張咁問俊軒。

「哈哈！咁你平時喺學校可以橫掃咁多學業獎，加上你嘅外貌又咁出衆，其他form嘅同學知道你個名嘅話，其實我都覺得唔出奇嘅…」俊軒刻意少少輕鬆咁回應韻喬嘅疑問，因為韻喬到依家都仲係好緊張。
 
「而且，唔知喬喬你有冇發覺，我見平時喺學校，只要你一經過嘅時候，都會即刻有唔少人，對你議論紛紛呢？仲要係都係好正面嘅評價...」

「所以我自己都覺得，其實你喺學校都已經有個名堂咖啦，都已經咁多年啦，你唔係都應該習慣哂咖啦咩，喬喬？」俊軒繼續講。
 
「喂啊！我幾時有呀？或者小軒你都講得啱嘅，我都中五啦，都應該一早就要習慣一下，不過始終我自己都係鍾意低調多啲，你都應該知點解咖！」韻喬若有所思咁講「點都好，都唔緊要啦，最重要都係做好自己啫，唔係咩？」





「都係嘅，但係，我能夠有一個美貌、智慧、品德並重嘅女朋友，我林俊軒真係幸福啦！哈哈，係咪呀喬喬？」俊軒得意洋洋咁講。
 
不過，當韻喬聽到俊軒嘅回應之後，就回復平日愛好暴力嘅本性，一言不合就一嘢好大力咁，拍落去俊軒手臂度「你夠啦下你林俊軒！唔好再喺學校亂講嘢呀！！」

俊軒於是摸住自己被韻喬打嘅地方「張韻喬呀！點解你成日都會咁暴力咖？！」

「咩暴力呀！？鬼叫你成日都喺度亂講野啊！？都唔知你成日喺度搞埋啲咩古靈精怪嘢！哼！好心你啊就留番啖氣，一陣跑你嘅800啦！衰人！！」之後兩個就無所事事咁坐喺看台，欣賞其他同學嘅比賽。
 
好不容易，先嚟到午飯時間，當司令宣佈放飯嘅時候，天殷同禮謙好快就行到去韻喬同俊軒嘅看台，然後四個人就出去食飯。





不過，當佢地四個人行到閘口嘅時候，居然撞到嘉惠同文曦。

嘉惠見到韻喬企喺俊軒隔離之後，面露非常不悅嘅表情，而韻喬當然都黑起口面，一場女人之間嘅戰爭又再開始，然後嘉惠就話...

「哈！乜呢個窮家女，居然仲夠膽癡住我未婚夫隔離，公然喺度卿卿我我？真係唔知個醜字點寫咖喎！」
 
而文曦聽到嘉惠嘅說話，都變得非常愕然，畢竟眼前呢個富家女，居然夠膽喺包括其他form嘅同學面前，公然向學校其中一位最好嘅學生喊話挑戰，所以文曦就同嘉惠好言相勸話…

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer