《愛在。貴族學園》: Ch 33 ~ 陸運會之二 Part 6

Ch 33 ~ 陸運會之二 Part 6（連載日期：2026/02/07）

文曦就同嘉惠好言相勸話…

「小嘉啊，你就冷靜少少先啦，呢度有好多其他Form嘅同學喺度，如果畀人見到又報埋上訓導嘅話，你就好麻煩咖啦，而且你之前先至畀學校重罰完冇耐咋，唔通你又想再畀學校罰多次？」
 
「黃嘉惠同學，我諗你都應該知道，搶人男朋友，其實對大家都好辛苦咖可？」天殷再一次第一個行出嚟，為咗保護自己好姐妹而頂撞呢個一返學掀起腥風血雨嘅插班生「軒仔、小喬，你地兩個去餐廳搵位先，呢度等我地幫你地處理啦！」
 
「唔使啦殷殷！」韻喬突然之間講嘢，而且仲出人意表咁帶有氣場，上前準備同嘉惠直球對戰，令到天殷同俊軒都有少少愕然...





「其實過多兩個禮拜，我都會按照你嘅要求，畀返俊軒你咖啦。不過，喺我將林俊軒畀番你之後，你地過得幸唔幸福，我就真係唔知啦。我一直都只係知道，依家我同小軒喺埋一齊，就過得好開心！」
 
「而且，雖然我嘅屋企唔係話好似你地咁，全部都係跨國企業家族咁好有錢咁有家底，而我都只係靠學校助學金交學費。不過，既然學校當初喺得港真邀請我過嚟讀書嘅話，相信我都會為呢間學校，帶來一定嘅價值。」
 
「而且身為同學，我都好歡迎你喺各個方面同我正面競爭。但係呢，我就唔希望你會用呢種強搶男朋友嘅方式去同我爭，或者用呢種態度，去對待家境冇咁好嘅同學，希望你可以早日醒覺，自己對我同我班朋友所做嘅一切到底係咪正確！我地走啦，小軒、殷殷、禮謙！」四個人之後就行去食飯。
 
而文曦依家企喺度，無端捲入嘉惠同韻喬嘅事端之中，就感到非常尷尬，因為自己跟住嘉惠，感覺好左右做人難「小嘉你ok嗎？要唔要……」

「呃…我其實好唔ok，我想自己一個人靜下！不如你都係去同其他人去食啦，真係好對唔住啊，方文曦同學！」之後嘉惠就自己一個走咗。





不過好在，心中有少少不滿嘅文曦，好快都搵到其他朋友一齊食飯。
 
至於韻喬佢地一行人，好快都去到餐廳，而且一如既往光速就點咗食物...

「喬喬呀，你頭先冇事啊嘛？」首先打破沉默嘅，係天殷。

「哈！我真係冇事喎殷殷，而且我都唔覺得自己有作錯，錯嘅應該係佢囉好冇！」韻喬非常冷淡咁講...

「畢竟由細到大，爸爸媽媽都教我任何時候待人處事，最基本都要有禮貌，無論對方身份係點，都應該要尊重他人先。」
 




「的確冇錯，我其實一直都好羡慕你地甚至嘉惠，可以有一個咁富庶嘅家庭環境之中成長，生活同將來工作都可以用無憂去形容。不過，我唔太知道有錢人嘅生活環境係點，我只係覺得，小嘉有少少自我中心嘅大小姐性格…」韻喬繼續講落去。

「咁一樣米養百樣人嘛小喬……」禮謙回應韻喬嘅說話「其實，我自己都問過屋企人，以大眾所認知嘅嘉惠同學，的確係有少少大小姐性格，不過，其實以前佢嘅性格，都唔係話好似依家咁嚴重！」
 
「但聽講後嚟因為喺某個party，離遠見到小軒之後，嘉惠同學就對俊軒佢一見鍾情，於是就開始四處打聽小軒嘅消息。當嘉惠同學知道咗，小軒喺我地學校讀書之後，佢就同黃auntie講話要轉校……」

「嘩程禮謙！點解你講到嘉惠好似一個癡女，一直跟住軒仔咁嘅！好恐怖呀！」天殷聽到禮謙嘅說話之後表示非常驚訝「而且，佢仲要因為軒仔，而轉嚟我地學校讀書，真係好誇張呀！係咪呀喬喬?」不過韻喬聽完之後一啲表示都冇。
 
但係禮謙好似仲有嘢想講

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer