《愛在。貴族學園》: Ch 33 ~ 陸運會之二 Part 7

Ch 33 ~ 陸運會之二 Part 7（連載日期：2026/02/15）

但係禮謙好似仲有嘢想講...

「呢個都未算誇張呀！最大嘅問題係黃auntie居然一直都聽哂嘉惠同學講，之後就係咁要黃uncle，聯絡我地學校陳校長，因為黃uncle同陳校長，其實以前係同學嚟。而且嘉惠同學仲指定要入嚟我地5A班，話一定要同俊軒同班……」

「既然黃家用人情牌同極限施壓，都可以用得咁誇張，陳校長都好難推卻幾十年同學嘅請求，唯有應承黃家，破格收咗嘉惠同學入嚟5A，但明明以嘉惠同學成績，根本就唔達到入我地5A嘅標準…….」禮謙一下子瘋狂輸出大量爆點。
 
「哇禮謙！畀你咁樣講多兩講，搞到我依家有啲驚喎！嘉惠呢個黃家大小姐為咗可以接近我，啊應該話係想得到我，真係無所不用其極啊！而且，仲動用哂各種一切可用嘅關係都要搞，真係誇張……師傅我真係好驚呀！」俊軒一臉惶恐不安。同一時間，侍應已經將四位所點嘅食物送到佢地幾個面前。
 




「不過呢啲咁誇張嘅嘢，當然都冇咁快講完呀。唔知你地幾個，仲幾唔記得上個禮拜喺郭氏annual party上面，小嘉當衆鬧小喬，同埋喺5A班房裏面打傷小喬嗰件事呢？」禮謙一邊將意粉攪拌一邊講。

大家聽完之後都即刻點頭表示同意...

「唔怕同你地講啦，之前學校原本話要記嘉惠同學兩個大過，兼停課一個cycle。不過，後來都係校長向Ms張同Ms Koo施壓，所以先用調位呢招，去分開小嘉同我地幾個。」

「當然，喺經過討價還價之後，學校最後對嘉惠同學嘅處分，就係罰留堂一個禮拜，同埋要記一個大過。」
 
「估唔到連Ms張同Ms Koo，都要克服喺嘉惠同學同埋黃家嘅淫威之下，真係…唉，我都唔想話對我地咁好嘅Ms張，同埋做事一向公正嘅Ms Koo，居然都係教畜…」韻喬搖搖頭咁講。





「但係我都明嘅，畢竟陳校長都係佢地嘅上司，Ms張同Ms Koo要聽校長嘅指示去做，其實都無可厚非嘅。而且其實，我都，唉…….我唔想再講佢啦。不如講下第二啲嘢啦好冇呀？」韻喬都已經唔想再提呢件麻煩事。
 
「好好好，不過頭先小喬喺行出嚟嗰一下真係好型，居然夠膽直接同嘉惠同學頂撞喎！」天殷一邊食麵一邊講道「都唔知係咪因為愛情必勝嘅原因，又或者有人真係做到fully support自己，所以先會咁型呢可？」

韻喬聽到天殷嘅說話之後，就即刻面紅，因為天殷喺講嘅時候，居然同俊軒打咗下眼色，搞到俊軒都好難為情。
 
「喂啊！死人頭李天殷又喺度玩我！真係呀！自從我同小軒一齊之後，成日都要畀你地兩個笑！就好似做你地玩具咁！蝦人嘅！」韻喬鼓起泡腮咁講。

「哈哈，冇辦法啦，鬼叫我女朋友咁可愛咩！」俊軒都加入調戲韻喬嘅行列。
 




「林俊軒先生，請問你係咪又要想畀我打啊？！」韻喬再一次鼓起對俊軒嘅特有氣場咁講，搞到大家都喺度笑。

「哈哈，小喬鎮住軒大佬果然有一套。不過，一陣大家都有比賽，大家都要繼續加油啦！」禮謙此時打圓場道，然後繼續講學校嘅是非。

（Ch 33  陸運會之二 ~ 完）

IG link https://instagram.com/bear_big_big_writer 
Threads https://www.threads.net/@bear_big_big_writer