《愛在。貴族學園》: Ch 34 ~ 陸運會之三 Part 1

Ch 34 ~ 陸運會之三 Part 1（連載日期：2026/02/24）

午飯過後，韻喬一行人再返到運動場嘅看台上休息，準備定下午嘅賽事。下午嘅天氣依舊晴朗，而且都非常乾爽，非常適合陸運會比賽。

而且能夠進入複賽嘅選手，成績都比上届陸運會理想，所以大家比賽嘅壓力都開始越來越大。

「女子甲組跳遠決賽第一次召集、男子甲組三級跳決賽第一次召集、男子甲組200米初賽第一次召集…….」
 
司令台一次過傳來多個項目嘅召集通知，變相韻喬、俊軒同禮謙都同時有比賽，留返天殷一個喺看臺度休息...





「殷殷啊，我要落去準備跑200啦，你一陣都會幫我打氣咖可？」禮謙問隔住條巷嘅天殷。

「我啊…梗係會啦，你一陣就好好比賽，然後都一定要入到決賽，知道嗎？」天殷面紅紅咁講。

之後禮謙一句多謝之後，就自己行落去場區，雖然200米項目相對比較冷門，但係初賽都有60幾人參加。

另一邊廂，因為跳遠同三級跳都係用毗鄰嘅場地，於是俊軒同韻喬就一齊落去召集區度報到。
 
而男子甲組三級跳比賽係由教5A數學嘅Mr Ho負責，Mr Ho見到俊軒同韻喬並肩到達場區，都不忘調侃一下佢地兩個「你個死仔包一陣跳好啲呀，唔好要你女朋友啊張韻喬同學失望啊！」





俊軒同韻喬聽到之後都面紅，因為其他參賽嘅同學都開始喺度笑...

「喂呀Mr Ho啊，咁多同學喺度就唔好咁大聲啦！我同俊軒同學……好難為情咖嘛！」韻喬好細聲咁抱怨「不過我知道，俊軒一定會加油跳嘅！畢竟佢都練咗好耐啦！」
 
「嘩！你地幾個都特登為咗個陸運會而去練習啊？」Mr Ho好驚訝咁講，而韻喬就點點頭回應。

「你地咁認真呀，咁就真係要讚一下你地嘅態度啦，依家都好少同學特登去練陸運會項目咖啦，呢種認真嘅態度真係值得各位學習！」
 
「咁俊軒、韻喬同學，我唔同得你地講住啦！希望你地一陣都會有好表現啦！」之後Mr Ho就開始為三級跳嘅賽事做最後準備工作。
 




而Ms Kitty都為跳遠決賽做最後嘅準備「好啦各位參加跳遠嘅同學，先恭喜各位可以進入決賽！」Ms Kitty用大聲公講「不過因為決賽嘅規矩同初賽一樣，所以就唔重複啦。」

「但依家去到決賽，每位同學都會有三次嘅試跳機會，學校會用成績最好嘅一跳，然後會做排名。希望你地一陣都要加油。唔知大家仲有冇問題？如果冇嘅話就準備開始比賽…」
 
呢個時候，韻喬就望住專心聽Mr Ho講解三級跳項目規矩同注意事項嘅俊軒“果然，認真嘅男人遠處望嘅話，真係好吸引”韻喬心裏面同自己講。
 
不過，俊軒好快就意識到有人望住自己，一望過去，俊軒見到嗰個人就係韻喬。於是俊軒就做咗一個心心手勢畀對方，一來幫對方打氣，二來就當然要隔空表達愛意啦。

韻喬見到之後都即刻面紅紅，然後都做返一個心心手勢畀俊軒，順便都幫男朋友加油。
 
之後，女子跳遠嘅決賽先展開，而Ms Kitty好快都叫到韻喬，俊軒就一路望住韻喬去跳呢一跳。

韻喬明顯冇受到任何影響，就連午飯前嘉惠嘅影響都完全冇影響到韻喬嘅發揮，整套動作乾净利落，並且做出一個幾唔錯嘅成績，一下子令其他選手感到無比嘅壓力...

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer