《愛在。貴族學園》: Ch 34 ~ 陸運會之三 Part 2

Ch 34 ~ 陸運會之三 Part 2（連載日期：2026/03/08）

俊軒嘅比賽都好快開始，而俊軒就喺8個選手裏面排第4比賽。當Mr Ho叫到俊軒嘅時候，就掉轉到韻喬睇住俊軒跳。

果然練過就係唔同啲，俊軒呢一跳表現非常好，直接第一跳就排第一。
 
「小軒你跳得唔錯啵！而且好似仲好過練習嘅時候？」韻喬問經過嘅俊軒。

「我唔知呀，不過我自己都覺得呢跳跳得唔錯，唔知，係咪喺背後有一股力無形力去推動我呢？」韻喬聽到之後甜甜一笑，同時好快就到韻喬試跳第二次。
 




同頭先初賽一樣，韻喬第二跳都比第一跳好，所以過咗第二輪之後，佢嘅排名就更加前，基本上都去到三甲位置。

至於俊軒，雖然喺第二跳有少少失手，但好在俊軒冇擲界，Mr Ho有將俊軒嘅成績計算在内。
 
到最後一次試跳嘅時候，因為人數比較少嘅關係，外加女子跳遠有爭議試跳，所以呢次到俊軒跳先。

俊軒呢次為求發揮得更加穩定，於是先深呼吸，然後再慢慢加速助跑。一個乾净利落嘅落地，令到俊軒可以做出一個非常好嘅成績，一下子過哂所有人。
 
而俊軒由沙池上番嚟之後，就輪到到韻喬跳最後一跳。不過，俊軒為咗唔阻住韻喬喺關鍵時候爭取佳績，於是故意唔行近韻喬，默默咁睇住韻喬跳。





但係韻喬今次發揮都好好，奮力一跳，都可以跳到好遠，遠到其他選手都嘩一聲。
 
韻喬喺起身之後，都認為自己跳得唔錯，隨時有機會拎金牌，於是就慢慢行翻去原先坐低嘅位置，順便再同俊軒打眼色。

經過Mr Ho同Ms Kitty兩位老師計算好成績之後，「好啦各位同學，你地18個人坐埋一齊先，反正你地本身就好多人都識！」Mr Ho道。
 
之後一衆人就調位，而俊軒就當然係同韻喬坐，Ms Kitty跟住就同大家講話「所以我同何sir決定，將你地兩組嘅成績集埋一齊公佈成績。首先先公佈女子跳遠成績。第三名就係…..6D班嘅程美芬同學，恭喜哂！」衆人之後就拍掌恭賀程同學。
 
「而三級跳第三名就係….,6C班嘅伍忠榮同學…….」Mr Ho接住Ms Kitty





「而到第二名嘅……就係6B班嘅蔣家強同學，恭喜哂兩位得獎嘅同學。」

「至於女子跳遠嘅第二名……呀等我睇一睇先，就係5E班嘅……丘可妮同學，恭喜恭喜……」Ms Kitty非常興奮咁講，畢竟5E係Ms Kitty任教嘅班別。
 
「好啦終於嚟到最後，兩個項目嘅冠軍，你地想聽女仔先定男仔先呀？」一衆同學都即刻議論紛紛。

但因為女仔比較多人，所以佢地都想先知道，邊個男仔可以獲得金牌「所以，大家都想知道邊個男仔攞金牌嗎？」Mr Ho道。
 
衆人點頭之後，於是Mr Ho再一次望向計分板「見到自己學生個名真係開心。恭喜哂，5A班嘅林俊軒同學！」

大家聽到之後都拍掌。俊軒初時都唔能夠相信自己可以跳贏堆Form 6，但當韻喬都同自己講恭喜嘅時候，俊軒首先都好好接受各位同學嘅祝賀。
 
「多謝你啊小喬。唔知跳遠冠軍係咪都係你呢？」俊軒低聲道。

「喂呀，你唔好再講啦小軒，你搞到我好緊張啦！」韻喬一邊回答一邊拍打俊軒手臂。




 
「首先我都要恭喜一下林俊軒同學先！」Ms Kitty道「好啦，大家靜一靜先！到我公佈女子跳遠冠軍嘅同學啦！」衆人都非常緊張，由其係另外嘅八個女同學。

「不過...」

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer