《愛在。貴族學園》: Ch 34 ~ 陸運會之三 Part 3

Ch 34 ~ 陸運會之三 Part 3（連載日期：2026/03/15）

「不過以頭先嘅表現睇嚟，兩位冠軍同學私底下嘅關係，好似有少少非比尋常，唔係大家所知只係同學咁簡單喎！」Ms Kitty好蠱惑咁講，而Mr Ho都露出一個狡猾嘅笑容望住俊軒同韻喬。
 
「恭喜你，林俊軒同學…….」俊軒聽到之後成個呆咗「隔離嘅張韻喬同學！係咪你女朋友呀？」「woooo……..」一衆同學隨即起鬨。

「恭喜你啊小喬，你好叻女呀！」俊軒摸一摸韻喬額頭道「而且，我都做到你想我做嘅野啦！」

「喂呀！你唔好咁肉麻啦小軒，呢度好多人呀！」韻喬塊面都即刻紅哂。
 




「好啦，如果參加咗男子200米初賽嘅同學，麻煩你地依家就走先，因為個邊都等緊你地報到……」Ms Kitty道「至於其他同學，就可以返去看台休息，一陣間就會有頒獎禮，多謝大家嘅參加同埋付出嘅努力啊！」

喺兩位老師宣佈解散之後，人群之後就自動散去。而俊軒同韻喬兩個，都再一次並肩而行，準備行上看台休息。
 
而兩個人途中就見到天殷「咦！恭喜哂兩位金童玉女喎！」天殷同時搭住俊軒同韻喬膊頭，帶點興奮咁講。

「嘩你咁快就知道咗啦？乜依家李天殷你嘅情報網，咁神通廣大咖咩？！」韻喬用一個恥笑嘅語氣同天殷抗議。
 
「頭先離遠都已經見到哂啦！附近其他同學起哂鬨咁，如果唔係講你地仲可以有邊個可以講呢？」天殷倒反而再笑韻喬。





「話說，禮謙去咗邊？初賽跑咗幾多場？」俊軒突然將話題一轉，幫韻喬解圍。

「好似最後一個heat，可能要等埋頭先有去triple jump嘅人，所以遲少少吧……」天殷都非常識做咁講「不過唔緊要啦，到時候佢都會過嚟搵我咖啦！」
 
「女子甲組100米初賽第一次召集……」「到我地一齊比賽啦殷殷！我一定唔會讓你嘅！」韻喬首先向好姐妹天殷下戰書。

「張韻喬，我都唔會放水嘅，你就即管放馬過嚟啦！」天殷回敬道。
 
「哈！你地兩個都一齊加油啦，不過記得唔好傷和氣就真喎！」俊軒一邊行返上看台一邊講。





「林俊軒你就同我地定啦！我地兩個先唔會好似你地兩個咁呀！成個小朋友咁呀！」韻喬望向天殷，然後再輕輕一聲「哼！」送去俊軒嘅方向。
 
喺韻喬去到召集區嘅時候，就見到嘉惠都有參加100米，而且嘉惠都已經坐咗喺報到區度。

當然，嘉惠一見到韻喬之後，就即刻眉頭一皺，塊面就黑到有氣牆咁，就好似叫其他人生人勿近一樣。

但大器嘅韻喬都冇再諗太多，因為都覺得自己比賽狀態甚佳，所以就自信咁直接行入去自己嘅位置。

而由於韻喬、天殷同嘉惠都分咗去唔同嘅分組，所以就冇再坐埋一齊傾計，而韻喬就自己坐埋一邊閉目養神。
 
好快，就由工作人員帶領之下，一衆參賽者就去到起點線準備。嘉惠同另外7個女仔跑heat 1，所以就第一個上去。

大家都各就位，然後老師就開氣槍。但100米賽跑其實都係一條直路，冇咩特別技巧可言，都只係鬥爆發力。
 
嘉惠其實一開始起步唔錯，起初都帶到30米。後來其他選手都開始追上，變咗嘉惠都被逼加多兩錢肉緊去跑。





就都終點嘅時候，喺第七道嘅選手突然跑出，令到其他選手都要加緊力度，希望可以進入複賽，當然包括嘉惠。

到最後，嘉惠都可以得到heat 1第二名嘅位置。
 
之後到天殷跑heat 3。天殷雖然本身唔係短跑好手，參加100米純屬陪跑，不過經過一段時間嘅訓練，其實都進步咗好多，於是天殷都滿有信心踏上跑道。

天殷上去嘅時候，都向後望返韻喬一眼，而韻喬都用眼神鼓勵一下自己好姐妹。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer