《愛在。貴族學園》: Ch 34 ~ 陸運會之三 Part 5

Ch 34 ~ 陸運會之三 Part 5（連載日期：2026/04/05）

「林俊軒！老娘我依家畀多次機會你講多次！」
 
「呃…..當然可以啦！話哂你頭先都叫喺你個heat裏面跑第一喎！兩位大小姐你地都係慢慢食啊！」俊軒喺感覺到韻喬嘅殺氣之後，唯有選擇退縮，但係就引嚟禮謙嘅大笑..

「哈哈！估唔到小軒你咁怕小喬都有嘅！天殷都未出聲你就已經怕到咁！」
 
「都係喬喬佢管得好啫！就係軒仔有時又係貪玩咗少少嘅，不過打情駡俏呢啲嘢，拍拖嘅時候就一定有咖啦！謙謙你食唔食兩粒牛丸？好正喎！」天殷一邊食咖喱魚蛋一邊道，之後禮謙就由天殷兜食物度，拮咗兩粒牛丸同一粒魚蛋。





「又真係幾好食啵！多謝你啊殷殷！」禮謙做出一個like手勢一邊講。
 
「雖然都係同平時tuck shop賣嘅一樣，但唔知點解到陸運會嘅時候，去食魚蛋就寧捨好味咖喎！」韻喬一邊咬住粒魚蛋一邊講。
 
「會唔會係因為運動場個氣氛夠好，加上大家都出過一身汗，所以都會特別好食咖呢？」俊軒問「不過我都想問下謙謙，你會覺得殷殷碗魚蛋牛丸好食啲啊，定小喬嗰碗…….嘩！做咩無啦啦踢我！痛啊大佬！」
 
冇錯，就係因為俊軒又試圖亂講嘢嘅關係，韻喬所以就一下踢落去俊軒度..

「你可唔可以講嘢之前經下大腦啊林俊軒？」韻喬指住天殷同俊軒講，因為天殷塊面已經紅哂。
 




「我知呀女朋友，我都係想flirt下謙謙姐，不過唔好意思啊殷殷，唔小心嚇到你添哈哈哈哈。」俊軒連忙向天殷道歉。

「唔…….唔緊要，都係我自己諗多咗啫。喬喬你就唔好咁惡對軒仔啦，佢都係關心謙謙啫，唔好嬲唔好嬲！」天殷都連忙打圓場。
 
「哼，算你啦今次！咁多人同你講好說話，你下次再亂咁flirt殷殷嘅話，我張韻喬就一定唔會放過你！」韻喬有少少嬲咁講，但好快又轉話題話「好啦，唔知100米複賽個名單出咗嚟未呢？」
 
「我估都應該差唔多吧，畢竟要將所以heat加埋頭16個嘅選手shortlist，所以都可能要一段時間先可以排返個次序出嚟呢！」禮謙認真答道「之但係，你地兩個成績都唔錯，要入到複賽應該唔難啦下話！」

「但係話說複賽你地入到嘅話幾時跑？」俊軒好關心咁講。
 




「好似係下晝頒獎禮前嘅最後一項比賽，所以如果要跑嘅話，都應該就快會公佈名單，然後開始比賽咖喎！」天殷道「喬喬呀，不如我地去notice board睇下公佈未囉？」
 
「好啊，不如就行啦，我都好想快啲知道，自己可唔可以爭獎牌。」於是韻喬就拉住其餘三人去大會嘅告示板度。

當佢地去到嘅時候，已經有幾個同學圍住塊版，但係都唔係話好多人。
 
當兩個人望上去嘅時候，韻喬就見到自己被放入複賽heat 1，而天殷就進入heat 2「恭喜你兩個喎，入到複賽！果然叻女啊兩位！」俊軒連忙恭喜道「記得要加油，唔好揸流攤啦！」

「我先唔會揸流攤囉林俊軒，呢次我都一定會出全力去跑嘅，原因，不如你自己睇名單有邊個喺度啦！」韻喬好得戚但又好嚴肅咁喺度講。
 
俊軒睇過名單，發現“黃嘉惠”同“張韻喬”兩個名，同時放入複賽heat 1裏面，不過就嘉惠跑7道，而韻喬就跑2道。
 
「好榮幸可以同你決一高下啊，張韻喬同學！」

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer