《愛在。貴族學園》: Ch 34 ~ 陸運會之三 Part 7

Ch 34 ~ 陸運會之三 Part 7（連載日期：2026/04/21）

「唉，唔好再講我呢壇麻煩野住先啦，而且我都有啲嘢想同你傾…」俊軒突然之間反客為主，搞到禮謙一臉疑惑...

「可以啊，咁有咩你想同我講？」

「禮謙啊，想問下你呢最近有冇打聽過劉家嘅事？」俊軒單刀直入問道。
 
「劉家？你話全香港第二最有錢嗰個劉家？我冇喎，而且最近都唔聽見佢地公司有咩大型收購行動喎！做咩突然之間咁問呀軒少？」講到有錢人家，正常人都會諗到生意往來，或者其他公開嘅嘢。
 




「我唔係講呢啲啊聰明，呢啲就係人都知道啦，就算知道咗都唔太關我地事啦！」俊軒翻白眼咁講「我係講緊劉家千金佳澄嘅事啊，睇你畀咁嘅反應我，就知道你應該唔知發生咩事啦！？」
 
「車！你無啦啦講人屋企嘅事我點知啊，林公子！不過劉家千金，都唔係我地學校嘅人，你個話題…會唔會唔太方便喺學校講啊？」禮謙先係有少少不解，但聽到講關於劉家之後，成個人就變得有少少緊張。
 
「我都係見你話men’s talk，所以我先私底下同你講呢件事咋喎，的而且確，劉家嘅事唔關我地學校事，所以更加唔可以喺學校公開講…」俊軒同禮謙解釋。

「廢話唔講咁多啦，不過你要應承我，唔可以講呢件事出去，包括小喬同殷殷，知道未？」
 
「放心啦小軒，我地都做咗咁多年朋友，我邊次有出賣過你先得咖？」禮謙拍哂心口咁對俊軒講「而且我聽你講就得啦。咁到底，劉家嗰邊發生咩事？」
 




「其實都係我媽喺星期日晚，我同小喬拍完拖、返到屋企之後先同我講。我媽話，自從上次出席完郭氏嘅party，我地林家帶埋小喬，喺會場裏面見到劉家之後，劉auntie覺得小喬同自己細個個樣好似，於是開始懷疑小喬同佳澄小姐嘅身世…….」俊軒平淡咁，道出想要講嘅嘢。
 
「喂！你唔係吖嘛林俊軒！咁大台嘅狗血劇情居然會喺現實發生？」禮謙聽完表現得有點小激動而且眼都凸埋。

「程禮謙！你可唔可以同我細聲啲！？我頭先咪叫咗你唔可以講出去囉？！」俊軒即刻將手指放到禮謙嘅嘴面前。
 
「係係係我錯，不過軒少啊，點解你可以咁平靜咁，講到件咁爆嘅事出嚟？」禮謙再繼續追問俊軒。

「梗係唔係啦，喺星期日晚，我聽到我媽咁同我講嘅時候，我都覺得成件事好不可思議。」俊軒回答道「但係其實件事我未講完，不如你畀我講埋落去先？」「好……好！」
 




俊軒於是就繼續講落去「其實初時都係劉auntie自己懷疑。但後來劉uncle因為肝突然有事，而喺公司工作期間暈倒，喺送入醫院之後要做緊急手術，咁劉家嘅人咪做血型測試，睇下邊個可以救到劉uncle，但結果意外發現，佳澄小姐嘅血型，居然同劉uncle劉auntie完全唔符合。」
 
「咩話？！兩個都唔符合？」禮謙好驚奇咁問，而俊軒都點頭承認。

「係呀，正正就係因為呢個測試結果，基本上都有一半機會肯定，佳澄小姐其實唔係劉家嘅親生骨肉，而且都肯定係另有其人。」

「不過，就係因為劉auntie對小喬嘅第一印象實在太過深刻，所以就喺星期日嗰日下晝，佢地全家拜會我地屋企，搵我媽媽講呢件事，而劉auntie知道我係小喬男朋友，於是就想托我去留意一下小喬囉。成件事大概就係咁啦。」俊軒終於都將要講嘅講完。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer