《愛在。貴族學園》: Ch 34 ~ 陸運會之三 Part 8

Ch 34 ~ 陸運會之三 Part 8（連載日期：2026/04/28）

「原來係咁，其實佳澄小姐同小喬到底有咩關係啊？一個係大集團嘅太子女，另一個就係喺平民家庭出身嘅貼地學霸，就咁睇佢地兩個大纜點都扯唔埋啵？！」禮謙完全唔明，呢兩個女仔到底有咩關係。
 
俊軒聽完就點點頭，同時都交代更多畀禮謙知道...

「禮謙其實你都講得冇錯，以佳澄小姐同小喬嘅背景，的確冇咩可能可以相提並論，就算係咁推論都好，其實我地同劉家依家手上，都冇咩有力證據，證明張韻喬同劉佳澄兩個有咩關係...」

「不過，我聽到我媽媽講，就話劉家會喺短時間内，幫佳澄小姐做親子鑒定測試喎，個結果應該就快會有。」
 




「所以，最近有咁多麻煩事喺身，我決定都係按兵不動住。一來，我唔想影響我同小喬之間嘅關係。」

「二來，對於小喬嚟講，可能呢件事，會影響到佢一生，無論係讀書嘅前途，定將來嘅生活、幸福，都會係有好大影響…」
 
「三來，而且最重要最重要嘅就係，我唔想黃嘉惠同學，喺呢個關鍵嘅時候，又再搞啲咩枝節出嚟，到時候搞到大家都落唔到台、收唔到科嘅時候，就真係麻煩，又會搞到面阻阻啦。」俊軒挨住運動場嘅欄杆，同禮謙分享自己最近嘅煩惱事。
 
「嘩，真係好有戲劇同娛樂性喎。但係聽完之後，我都覺得之後仲會有事情發生，而且都一定係非常唔簡單！」禮謙摸一摸下巴咁講。

「不過，無論點都好啦，都希望你可以安然咁度過呢一切，然後同小喬開開心心咁生活落去！始終呢個，都係大家喜聞樂見嘅結局呢！」之後禮謙就用手搭住俊軒膊頭。
 




「得啦，多謝你先！係啦，其實我都仲有嘢想問下你，但問之前，我想問下小喬同殷殷嗰兩場100米複賽幾時開跑呀？」俊軒見差唔多時間，於是就去問禮謙

「我估應該差唔多啦掛，得16個人，要召集都應該唔會花太耐時間，不如我地依家出返去出面睇？」
 
俊軒點頭同意之後就一齊出去，一去到欄杆，就已經見到參加100米複賽嘅16個選手，都已經出咗去賽道上面準備。

「唉，其實我都真係有少少擔心呢場比賽，畢竟兩個死對頭都喺同一場比賽度。」俊軒嘆一嘆氣又好擔心咁講。
 
「軒少，你就唔好太過擔心啦……」禮謙立刻阻止俊軒呢種有少少負面嘅想法「畢竟比賽點都要跟規矩去做，如果賽場上犯規嘅話，自然就會畀人DQ，再笨再有幾唔鍾意對手嘅人，都唔會咁明目張膽去犯規嘅！」
 




「頂啦，嘉惠同學如果會咁諗，就唔會搞到依家5A好似滿城風雨、班房裏面氣氛死氣沉沉啦。唉都係唔講啦，都係睇比賽先！」

俊軒講到呢度都已經無哂心機，兩個人就挨住場區嘅欄杆，準備睇韻喬同天殷嘅比賽。
 
轉眼間，就到韻喬同嘉惠個heat跑，賽道上八位選手都非常認真準備，因為講緊要爭奪進入決賽嘅資格。

而對於韻喬同嘉惠嚟講，呢場100米賽跑更加就係面子與尊嚴之戰，大家都唔可以輸。

氣槍一響，大家都奮力向100米外嘅終點線爆衝。
 
韻喬喺過程之中完全唔望其他選手，專心致志咁去完成呢個比賽。反而嘉惠就...

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer