《愛在。貴族學園》: Ch 34 ~ 陸運會之三 Part 9

Ch 34 ~ 陸運會之三 Part 9（連載日期：2026/05/30）

韻喬喺過程之中完全唔望其他選手，專心致志咁去完成呢個比賽。

反而嘉惠就有少少分心，一直望住第二線道嘅韻喬，不過正因為分心嘅關係，嘉惠去到差唔多距離終點40米嘅時候突然之間絆倒，成個人隨即大字型咁趴喺賽道上面。

不過好彩嘅係，第六同第八線到嘅選手都冇畀嘉惠影響到。
 
嘉惠跌倒之後，立即有急救隊嘅同學衝出嚟幫手，同時問下嘉惠有冇大礙。





而嘉惠都冇咩事，喺經過急救隊嘅同學幫忙之後，仍然用自己嘅毅力完成比賽，不過都因為以最後一名衝過終點嘅關係，而無緣晉級決賽。
 
至於韻喬，就喺呢個小組以第二名衝線，俊軒、禮謙都好開心，但俊軒都叫韻喬先去關心一下嘉惠。

就算對方好唔鍾意自己都好，韻喬都好有體育精神，等嘉惠完成賽事之後，都即刻去問候對方「黃同學，你冇咩事啊嘛？」
 
不過，嘉惠見到係韻喬親自問候之後，雖然内心好驚恐，點解一個自己咁憎嘅人，都會仲咁擔心緊走嚟問候自己。

但因為始終都係競爭對手，所以嘉惠都只係冷冷咁回應韻喬一句「我冇事，你有心啦張同學，恭喜咗你先！」然後嘉惠就自己一個，再慢慢行去醫療室驗傷。
 




而韻喬就留喺場區裏面，諗住等埋跑heat 2嘅天殷完成比賽，然後先再返去搵俊軒同禮謙。

同時間100米起點都已經準備好，隨時都可以開跑「希望殷殷都可以過到呢關啦！」韻喬心想道。

氣槍聲響起，今日最後一場徑項賽事都正式開跑。
 
呢八位女將都好快反應，大家都叮噹碼頭，冇邊位選手可以有明顯優勢。而喺呢個heat裏面嘅天殷，都比起初賽落多兩錢肉緊，力求跑入頭四名，可以有機會殺入決賽。

到最後30米嘅時候，第五道嘅Form 6師姐開始發力，試圖突圍。認真苦練過嘅天殷見狀就隨即跟進，即刻再出更多力去追個師姐。
 




最後，天殷嘅努力都得到回報，能夠以小組第三名晉級。當天殷抖順條氣之後，就即刻走去韻喬度。
 
「嘩！好辛苦呀……終於有機會可以同你一齊跑啦喬喬！」天殷興奮得嚟又有少少辛苦咁講「頭先我真係好緊張呀，點解我個heat啲人咁勁咖？好在跑到第三咋！」見到天殷咁開心，韻喬都第一時間抱住對方…

「你都辛苦啦殷殷，慢慢抖順條氣先啦！頭先你個組嘅人真係快過我嘅對手！不過小軒同禮謙等緊我地啊，快啲返去搵佢地先啦！」
 
兩個人之後就彈下彈下咁返出去場區外面，搵俊軒同禮謙「恭喜哂你地兩個喎！」然後俊軒就先抱一抱天殷，然後再緊緊咁抱住韻喬「你地之後決賽記得要加油啊，知道未呀！」「知道啦！長氣鬼！」

但…「林俊軒你好放手啦！呢度人多啊！唔好再咁樣咁多人面前攬住我啊！」韻喬一向唔鐘意俊軒咁樣當衆喺街抱自己（當然韻喬私底下其實好鐘意啦！），所以先會咁樣出聲。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer