《愛在。貴族學園》: Ch 35 ~ 陸運會之四 Part 6

Ch 35 ~ 陸運會之四 Part 6（連載日期：2026/07/18）

不過好快韻喬就聽到女子甲組200米複賽要召集，於是又要自己放低天殷同禮謙兩人，自己去報到區報到。

「禮謙、天殷同學，見到你地就啱啦！」講呢句話嘅，就係女班長洪雪盈，但係雪盈個表情好緊張，而且講嘢都有啲急。

「雪盈？咁急做咩事？」天殷一個頭已側嘅表情問道。
 
「我想問下天殷你，仲有張韻喬同學，有冇興趣跑班際4乘100呀？」





「班際4乘1？我記得你地之前唔係已經form咗team，仲去埋練跑啦咩？」禮謙用一個懷疑嘅語氣問雪盈。
 
「係啊禮謙，不過原本話會跑嘅趙恩希同學，因為尋晚突然間開始發燒，今日打電話同學校請咗病假，所以依家我地要搵一個女仔補上，如果唔係我地班就會畀學校DQ咖啦！」雪盈有少少心急咁講。
 
「咁啊，其實我都可以跑嘅，不如我都同你一齊去問下小喬好唔好？」天殷於是就拉住雪盈同禮謙,走去報到區搵韻喬。

「咦，殷殷、雪盈、謙謙？你地幾個過嚟做咩呀？乜你地依家有比賽咩？」韻喬見到三個跑過嚟感到驚訝。
 
「唔係啊喬喬，因為趙恩希同學今日發燒冇返學，而恩希原本今日要代表5A跑班際4乘1，所以依家要搵一個女仔補恩希個位。咁啱頭先見到天殷同禮謙，所以就醒起不如問下你同天殷有冇興趣代恩希跑？」雪盈直接道出緣由。
 




「原來係咁，不過我今日仲有100米同200米比賽，我怕如果200米都入到final嘅話，我怕會應付唔嚟，而影響到5A嘅成績。所以，不如等殷殷去跑好唔好？」韻喬用一個好得體嘅方法婉拒。
 
「咁，天殷你有冇問題啊？我地唔係強逼你啊，如果你真係唔得嘅話，我地依家都仲有少少時間可以搵第二個跑咁。」但係雪盈用一個懇求嘅眼神望向天殷。

「我可以啊，反正我都係得番100米決賽，體力相對於小喬，應該可以更容易應付嘅。咁我跑啊，轉頭我再過嚟同你地練交棒吖！」天殷諗咗一諗就應承咗。
 
「好·多謝你啊天殷，咁我即刻同學校改你個名上去啦！一陣你都要加油啊！」雪盈萬分感謝道。

「小意思啦雪盈！身為5A嘅一份子，能夠為5A出力，我當然樂意去做！我都會加油啦！」天殷微笑道。
 




「殷殷，唔知你可唔可以應承我，呢個4乘1，你都要加油，然後為5A拎個金牌返嚟？」禮謙此時捉住天殷嘅手道。

而天殷就呆咗兩秒，先識得縮返隻手「我…….我會啦……你同小喬就放心比賽啦！」
 
「好啦，殷殷你就快啲跟住雪盈去報名啦，如果遲咗5A就跑唔到咖啦！」韻喬催促道。

「咁殷殷你跟我嚟啦，小喬同學你都加油啦！」韻喬點點頭回應，雪盈之後就拖走天殷，而禮謙都陪埋兩個女同學一齊去。

而參加800米嘅俊軒都已經喺衆人對話嘅時候出咗去，同時就定位。
 
鳴槍一響，15位選手立刻搶先有利位置。同1500米比賽一樣，俊軒先留喺中游位置一段時間。

不過因為比賽只有兩個圈嘅關係，所以選手們過咗一個圈之後，都毫無鬆懈直接追上。
 
面對一衆選手嘅壓迫，俊軒自然就追上去，不過追到上去，居然又見到朱凱倫同學。





然而經過尋日1500米嘅比賽之後，俊軒對於呢位師兄都唔意外，兩個人於是緊跟對方，各不相讓，連追上前方嘅動作都好一致。
 
到最後200米，兩人都過到最前方嘅選手入彎，基本上得返朱師兄同俊軒鬥，以及另外兩個隔離班嘅同學。

而去到最後直路，俊軒低下頭爆出去，一時間連朱凱倫同學都反應唔切，即使朱同學即刻跟進都好，已經為時已晚，因為俊軒用壓線贏過朱同學，奪得呢個800米金牌。

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer