《愛在。貴族學園》: Ch 35 ~ 陸運會之四 Part 7

Ch 35 ~ 陸運會之四 Part 7（連載日期：2026/07/25）

俊軒衝線之後，攰到即刻成個大字型咁訓喺跑道旁邊，此時跑第二嘅朱凱倫同學都走咗過嚟...

「恭喜你啊，林俊軒同學！頭先你跑得好好！估唔到你有咁嘅能耐，可以守到最後先嚟爆哈哈。」
 
「多謝你朱師兄，好多謝你畀到一場咁好嘅比賽我，頭先場比賽真係好刺激…」俊軒見狀之後成個人坐番起身「如果頭先唔集中精神嘅話，我都唔一定可以贏到呢場比賽！」
 
「唔係，你畀到一場好精彩同難忘嘅回憶我就真！畢竟我都已經Form 6，唔一定再有機會參加陸運會啦！」朱師兄道。





「Anyway，再次恭喜咗你先。個金牌……你會自己袋，定會送畀張韻喬同學呀？」
 
俊軒聽到師兄咁講起韻喬，即刻顯得好尷尬，面都紅埋。朱師兄見到之後就笑一笑俊軒「你唔使怕醜喎！因為我都諗住送個獎牌畀人！而且你都放膽去做啦，因為嗰個係你女朋友嚟咖！」朱師兄續道。

「仲有啊，記得對你個女朋友好啲啊！畢竟張同學都係Form 5，以至係全間學校嘅風雲人物嚟，學校裏面好多男同學都想追佢，包括我地Form啲同學。」
 
「我會咖啦師兄，真係多謝你，你DSE都要加油啦！一陣再喺頒獎台見！」俊軒對住準備離去嘅朱師兄講，然後自己都企起身，走返去看台上去睇韻喬嘅比賽。
 
但就喺俊軒出去嘅時候，早前喺比賽受傷嘅嘉惠，就已經喺欄杆度等緊俊軒，嘉惠一見到俊軒，就即刻成個人抱上去...





「我最愛嘅軒軒，你居然可以跑得贏一個Form 6嘅師兄！你真係好型啊！」當然，呢一幕都有好多同學甚至老師見到。
 
雖然嘉惠身材都唔差，俊軒一定感受到嘉惠嘅曲線，不過俊軒就唔係太想享受，於是直接翻白眼，壓低聲線同嘉惠呢個煩膠講...

「呃黃嘉惠同學，多謝你嘅讚賞先，不過你可唔可以放一放手落返嚟，呢度有好多人睇住。」

嘉惠於是就聽自己鍾意嘅男仔嘅說話，好快就放手，但隨即喺其他人面前，直接錫咗俊軒塊面一啖，附近嘅同學無一嘩然。

而咁啱天殷就喺佢地面前經過，並且目睹呢一切，於是天殷就“jip”一聲向嘉惠表達不滿。





當然，俊軒都用一個無奈而且想被救嘅眼神，望向呢個由細玩到大嘅女仔求救。

不過天殷都似乎get到一半，於是就走埋去俊軒身邊。
 
俊軒見天殷慢慢過嚟，心裏面暗中叫好，因為可以講嘢就可以救到自己...

「咦殷殷，你去邊呀？」俊軒扮到好好奇咁問。

「冇啊軒仔，我去睇小喬比賽啊，女子甲組200米semi-final，你一唔一齊去呀？」天殷答道。

俊軒聽到之後就固然好開心，但係嘉惠聽到就黑哂面「好啊，一齊行啦咁！唔好意思啊嘉惠同學，我同天殷同學行開一陣去睇比賽，失陪！」
 
俊軒之後就即刻畀天殷拖走，就喺離開嘉惠冇幾遠之後...

「多謝你救我呀殷殷！好在小喬去咗比賽咋，如果唔係頭先我真係怕又會發生尋日嘅事呢！」俊軒同天殷好感激咁講。





（天殷到底會點答俊軒呢？）

（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer