《愛在。貴族學園》: Ch 35 ~ 陸運會之四 Part 8

Ch 35 ~ 陸運會之四 Part 8（連載日期：2026/08/01）

「多謝你救我呀殷殷！好在小喬去咗比賽咋，如果唔係頭先我真係怕又會發生尋日嘅事呢！」俊軒同天殷好感激咁講。
 
「哈哈，軒仔你唔使多謝我喎，我就係頭先離遠見到嘉惠行出去欄杆度等你，所以我先企喺附近睇住，然後就見到你畀佢抱住，跟住就見你同我求救，所以我咪出手幫你解圍咋...」

「雖然話就話咁講，但其實都要去支持下喬喬嘅！我好姐妹喎梗係要支持啦！」天殷道。

「係喎軒仔阿，我報咗名參加班際4乘100接力，因為我要代恩希跑呀！」
 




俊軒聽到天殷咁講之後就好好奇話「咦咪住先！乜恩希佢今日冇返咩？」

「冇啊，雪盈頭先走嚟同我話，恩希佢今日因為發燒請病假，跑唔到。而原本雪盈係想問小喬可唔可以代跑嘅...」

「不過小喬話佢今日嘅賽程都好爆，所以小喬就推咗雪盈啦。然後我見我自己狀態都ok，所以咪決定幫手跑囉！」天殷道出理由。
 
「原來係咁，唔怪得之今日好似唔見恩希啦，仲以為恩希遲到添！不過都好嘅，小喬知道自己忙就畀你跑！咁你一定要加油啊！5A全班都一定會支持你嘅！」俊軒微笑道。

「多謝你先啊軒仔！你放心啦，我一定會俾心機跑，唔會浪費咗雪盈嘅一番好意同大家對我嘅信任嘅！」天殷道。「好啦，我都係返去搵謙謙先啦，怕佢一個人悶！你等陣會唔會睇小喬200米比賽？」
 




「我會啊，不過我想沖個涼先！咁……一陣見啦！」俊軒準備跑去沖涼嘅時候...

「男子甲組100米複賽第一次召集、女子甲組標槍決賽第二次召集！」

「咦，殷殷等等先！禮謙有冇入到100米複賽呀？」俊軒將準備走開嘅天殷截停。
 
天殷聽到之後，就回頭答道「好似有啊，不過你都係去沖個涼先啦，如果唔係miss哂啲比賽就唔好啦哈哈!」之後天殷就推俊軒去更衣室沖涼，然後就自己走到報到區搵禮謙。

同時間三組女子200米複賽嘅選手，都開始走去起點準備，所以韻喬都同天殷再打多次招呼就跟大隊走咗。
 




不過因為有兩位女同學，同時入到標槍同200米嘅比賽，所以大會決定先畀女子甲組200米嘅比賽進行，方便兩位選手完成比賽之後，直接前去標槍比賽場地參加比賽。

「都唔明點解學校今日先嚟搞標槍決賽，搞到啲同學要兩頭走！」禮謙見到天殷之後就講咗呢句。
 
「咦謙謙你都到嗱？我都覺得學校咁排賽程有啲問題囉！」天殷道。

「話說你頭先做咩急急腳咁走咗落去呀？又唔等埋我先！」禮謙帶點失望咁問天殷。

而天殷好快就知道禮謙唔開心，於是喺禮謙耳邊話「頭先喺小軒跑800米嗰陣，我離遠見到嘉惠專登跑落去場區旁邊睇小軒比賽呀。」
 
「乜又係嘉惠啊！唔怪之得你咩都唔講，就即刻一支箭咁跑咗落去啦。咁佢地兩個人有冇做到啲咩啊？」禮謙追問。

「梗係有啊，而且仲搞到好大件事咁！」

「咁…咁佢地做過咩嚟啊？」





「嘉惠哄到塊面好貼小軒，然後我就走過去disturb嘉惠囉！」天殷繼續好細聲咁講...

「不過呢，我就好後悔走得太慢啦，因為頭先嘉惠…當衆錫咗小軒塊面一啖。」
 
禮謙聽到呢度就掩住自己個嘴「咁爆？！但小喬同學當時唔喺附近嗎？」

「就係好在喬喬去咗報到所以先見唔到咋，如果見到嘅話，我真係唔知又會發生咩事啦！」天殷搖搖頭咁講「不過點都好，我都唔諗住同喬喬講咖啦，一來我都唔想喬喬唔開心，甚至嬲住咁去比賽影響發揮…」

「二來，始終喬喬都想我地攞牌呀嘛，我地就當然要專心比賽先啦，加油啦你都，知道未呀！」

天殷抱一下禮謙之後，就去返自己個位坐低，但走嘅時候天殷塊面有少少紅。

（Ch 35  陸運會之四 ~ 完）





IG link https://instagram.com/bear_big_big_writer 
Threads https://www.threads.net/@bear_big_big_writer