《愛在。貴族學園》: Ch 36 ~ 陸運會之五 Part 1

Ch 36 ~ 陸運會之五 Part 1（連載日期：2026/08/08）

正如喺上一章講過，因為有同學需要同時參加200米賽跑同標槍嘅比賽，所以女子甲組200米會先開跑。

而韻喬因為唔使參加標槍決賽嘅關係，順理成章就被大會放入heat 2。

而正正因為呢個原因，韻喬就可以大概知道，自己應該要喺比賽度跑幾快。

不過，就算Heat 1參賽者唔可以預判自己要幾快都好，如果heat 1嘅選手都跑得比較偏快嘅話，咁樣heat 2嘅選手，壓力自然都會更加大。
 




韻喬喺heat 1開跑之後，一邊好緊張咁對表計時間，一邊注視heat 1嘅呢班選手比賽嘅情況...

“嘩，Heat 1個個都好似跑得好快啊！一定會推到個時間好前。唔得！一陣間我都係要集中精神先得！”韻喬喺心裏面同自己講。於是就收拾好心情，準備踏上賽道，為決賽同獎牌而戰。
 
而喺heat 1嘅對手都完成比賽之後，heat 2隨即就上去準備。喺另外一邊，有工作人員正帶住六位參加標槍決賽嘅選手，前往比賽嘅場地。

當佢地經過賽道之後，槍聲隨即一響，天殷都立即望向韻喬所在嘅方向，而韻喬就同其他七位選手，一齊奔向終點。
 
之前一直苦練爆發力嘅韻喬，起初就唔夠另外一條線道嘅選手快，但好快韻喬就追上節奏。直到最後嘅70米，窮追嘅韻喬同另外兩個女仔，終於都成功帶出，抛離跑第四嘅選手大概兩個身位。





最後，韻喬都係靠壓線，得到小組第二名，至少確保到參加決賽嘅資格。
 
等比賽完咗之後，跟住大隊準備行去標槍比賽嘅天殷，喺終點線附近見到韻喬，就畀咗個心心手勢畀對方...

「恭喜你喎喬喬，基本上可以入到決賽啦？」

「都係嘅，不過，呢個比賽真係好緊張，而且壓力都好大啊！」韻喬一邊回氣一邊講。

「咁喬喬你一陣間都好好休息，準備之後嘅比賽啦，知道未呀？」





「知道啦！」而韻喬都不忘同天殷打氣「你都要加油呀，李天殷！有冇獎牌就真係睇你今次啦！」

「知道啦喬喬，我一定會加油嘅！」

「咁一陣再見啦！」講完之後，韻喬就行出場區返位搵俊軒休息，當然俊軒喺見到韻喬之後，都不停咁讚自己個女朋友好叻女，一時之間就氹到韻喬非常開心。

至於喺標槍決賽嗰邊，喺一班選手去到場地之後，負責嘅老師都再次幫標槍嘅參賽者點名，以及講解決賽嘅規則之後，決賽就隨即展開。
 
首先第一個試掟嘅，就係同天殷、韻喬佢地同班嘅旻靜同學。喺經過一晚嘅休息之後，旻靜嘅表現比尋日更好，甚至掟得比尋日初賽嘅成績更遠。

單係呢一樣，就已經對天殷以及其他選手帶來非常大嘅壓力。

“啊！點算好呢今次，旻靜佢好似仲掟得遠過尋日咁！唔通今次…旻靜真係可以攞到獎牌？“天殷心裏面同自己講”唔得唔得，雖然旻靜係我同班同學，不過大家都係為自己而戰，我都一定要加油爭到獎牌！”

不過，比賽嘅嘢，就唔係下下都可以話付出就一定會得償所願嘅，因為下一個上場嘅Form 6師姐，就係因為壓力太大，而唔小心掟出一支死槍，而成績自然都冇計算在内，白白送咗一個機會畀其他對手。





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer