《愛在。貴族學園》: Ch 36 ~ 陸運會之五 Part 3

Ch 36 ~ 陸運會之五 Part 3（連載日期：2026/08/22）

天殷同旻靜都有傾計，不過旻靜今日都冇再追問，天殷同禮謙之間，到底係有一種咩嘅關係喺度。

反而旻靜就有問天殷，到底俊軒同韻喬之間嘅相處係點。所以都令到天殷覺得，旻靜心裏面仲有俊軒喺度。

天殷聽到旻靜提起俊軒同韻喬佢地幾個，於是就主動話...

「其實都係因為小喬，想大家喺陸運會裏面可以得到獎牌，所以我地幾個為咗滿足到小喬嘅要求，所以今次大家都好俾心機去練習哈哈！」





「原來係咁，而且我見到你地都好有信心咁！」旻靜回答道「不過呢，你都幫我多謝韻喬同學啦。如果唔係嘅話，今日嘅比賽都唔會咁精彩啦！」

「哈哈！呢個我一定會！或者你都可以自己同佢講嘅。」但就喺天殷回應旻靜之後，負責嘅老師都計好分，同時都開始排名次。

「好啦各位參賽者，麻煩望一望過嚟先。多謝你地嘅耐心等候啦，我地已經排好大家嘅最終排名…」於是大家都坐到喺老師面前「今次雖然大家冇人可以打破到學校記錄，但係大家嘅整體成績，其實都畀上一届進步，對於呢樣我都好高興，大家都畀掌聲大家先！」

於是大家都聽從老師嘅指示拍下手。但喺天殷嘅心裏面，其實自己比較在乎，自己能唔能夠做到，韻喬要求大家所做嘅事。

至於旻靜，自己都仲係好有信心，可以得到獎牌「好啦，我地都唔浪費大家時間，依家開始公佈三甲位置。」
 




大家嘅氣氛於是就變得緊張。呢次第三名嘅位置，由一位Form 6嘅師姐奪得「之後我會先宣佈第一名嘅選手！」

老師呢番話搞得其他人更加緊張，喺過咗十秒鐘左右「恭喜你，5A班嘅......李天殷同學！」

天殷聽到之後就鬆一口氣，而旻靜強顏歡笑都望住天殷，好細聲咁同天殷祝賀話致以「恭喜你啊殷殷，你今次真係好勁！」

「好多謝你吖旻靜，不過你都仲有一個機會，希望你可以啦！」
 
「好啦，最後就輪到第二名啦！」老師此時再宣佈賽果，大家都希望可以得到亞軍做最後嘅獎牌希望。





「第二名…都係5A班嘅同學。恭喜你！陳旻靜同學！」天殷聽到之後就攬住旻靜祝賀「你都好叻啊旻靜，可以攞到銀牌！」

「係就係，但最後我都唔夠殷殷你叻呢！不過我點都要多謝你呢個對手先！」旻靜回應道，但係天殷自己都睇得出，旻靜嘅眼神喺自己得到金牌之後，就已經有少少失望。
 
「好啦，各位參賽者仲有冇問題，又或者要就比賽嘅成績上訴？如果冇嘅話，標槍嘅比賽就完結啦！多謝各位參加！」之後衆人就向住看台方向行出場區。

此時由於正進行100米嘅比賽，所以幾位選手都要等比賽完結咗，先至可以橫過跑道。
 
「殷殷同學呀，我呢……想自己一個留喺度睇比賽呀，不如一陣間我地再喺頒獎台見啦？」旻靜突然之間同天殷提議，而天殷都好快點點頭。

但對於旻靜突然之間嘅做法，天殷都唔係特別開心「哦，好啊，咁我都返上去休息一陣先啦，一陣見！」

講完之後，好快天殷就跑到去俊軒同韻喬度。但...

（天殷到底見到咩呢？）





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer