《愛在。貴族學園》: Ch 36 ~ 陸運會之五 Part 5

Ch 36 ~ 陸運會之五 Part 5（連載日期：2026/09/06）

「之但係喬喬呀，你今日運動量都好似好大喎？你頂唔頂得順咖？」天殷好擔心咁講。
 
「殷殷我ok嘅，兩個項目我都好有信心，由其100米一定可以贏到你咖！」

「嘩咁大口氣啊喬喬！得唔得咖你？」天殷笑笑口咁講「雖然我仲要跑班際，但喺我都唔會放軟腳嘅，張韻喬即管放馬過嚟啦！」呢個時候大會有人將幾張類似名單嘅紙，釘咗落去塊board度。
 
兩個情同姐妹嘅小八卦喺工作人員走遠之後，就即刻好緊張去睇名單...





「咦喂喬喬呀你望下！原來呢三張係男子三組200米決賽嘅參賽名單喎！」

「係啊？你快啲搵下有冇禮謙個名？頭先佢唔係先跑完200米咩？」韻喬跟住天殷講。
 
結果，兩個人好快就喺甲組名單第六道見到“5A  程禮謙”個名「wow！禮謙果然唔錯喎，仲要抽到入Lane 6！」天殷少少開心咁講「不過，啊謙謙公子做咩仲唔落嚟等張list嘅？唔通佢真係唔care呢場比賽咩？」
 
「邊個話我唔care名次咖，啊李天殷小姐?」原來禮謙已經悄悄咁嚟到兩位好朋友嘅後面，而天殷就畀禮謙嚇到差少少成個彈起埋。

韻喬見到天殷嘅戲劇化反應，就諗起自己頭先畀天殷嚇到嘅事，於是就輕輕對天殷冷笑。





而天殷都知道韻喬喺都寸緊自己，於是就啤住韻喬，好似要示意對方唔好出聲咁。
 
「咦，的確唔錯唔錯，決賽跑到第六線道！」禮謙一臉滿意咁自言自語道。

「你都要加油啊禮謙！搞不好其實有人等你拎呢塊金牌送畀佢做禮物呢呢！」韻喬好細聲同禮謙講，但同時又係望住天殷，搞到天殷同禮謙兩個都周身唔自在。

但係禮謙都覺得要化解尷尬局面，於是就話「放心啦小喬、天殷同學，我都一定會盡力而為嘅。不如依家我地都休息下、補充下體力先啦，趁距離召集都仲有少少時間？」

「好呀謙謙！」天殷好開心咁講。
 




天殷同韻喬同意之後，呢幾個人就去咗散步。只不過，散咗都冇15分鐘，司令台就出廣播，召集哂所有200米決賽嘅參賽者。所以韻喬喺聽到之後，就同禮謙一齊先去報到區。而天殷就跑去搵冇哂比賽嘅俊軒傾計。
 
「就快決賽啦喎，信心如何啊小喬同學？」禮謙先打開話題。

「你問我呀？就平常心面對，就算去到最後運氣唔好，三甲不入都好，最重要自己真係有努力過，咩成績都對得住自己，因為呢幾個禮拜大家都練得好辛苦。拎唔到牌，都係因為對手太勁啫，搏盡無悔吖嘛！」就正如同呢段說話一樣，韻喬用一個平常嘅表情答道。
 
「真係不愧係我認識嘅張韻喬同學，無論喺任何時候都係咁冷靜同樂觀，除咗我同小軒爭你嗰排哈哈！」禮謙喺讚嘗韻喬嘅同時，都不忘趁機調侃對方一番，搞到對方有少少難為情。

「做乜嘢又舊事重提呀？都唔明點解你仲可以拎返呢堆野嚟講！應該話，嗰一排我都唔知你同小軒兩個喺度搞咩鬼？乜你地當時真係好想我出pool咩？」韻喬於是趁機狂轟猛炸禮謙。
 
「哈哈，仲唔畀我捉到你？小喬同學你一講呢樣嘢，你就會即刻發癲，真係想拍低video，然後可以畀小軒睇添，好可惜冇帶電話喺身添！」禮謙哈哈大笑道，搞到韻喬就更加不滿同面紅。

禮謙當然都知道，如果再玩落去嘅話，韻喬...

（韻喬會點呢？）





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer