《愛在。貴族學園》: Ch 36 ~ 陸運會之五 Part 6

Ch 36 ~ 陸運會之五 Part 6（連載日期：2026/09/19）

禮謙當然都知道，如果再玩落去嘅話，韻喬好大機會會嬲，於是就喺韻喬出聲之前就話「好啦，我都係唔玩你啦，我相信小軒佢都好想你可以喺比賽再下兩城，順利拎到金牌嘅！」
 
「或者我拎到金牌，個死人頭就會好大聲咁同全世界講，話自己女朋友好勁啊點點點……諗起我就覺得頭痛呀！」韻喬講到有少少不滿咁。

「我諗應該唔會嘅，依家小軒暫且都叫做修心養性啦！」禮謙試圖安撫韻喬咁講。
 
「我希望就係啦！畢竟以前未正式追我嘅時候，林俊軒佢真係太太太過花心啦！」韻喬一面嫌棄咁回應「所以我到依家同佢一齊咗之後，都仲喺度觀察緊佢嘅言行舉止。喂，不如講下其他嘢啦，話說呢，你地覺得我放頭髮落嚟好睇吖，定係以前扎起馬尾會好睇啲呀？」韻喬好快就將話題，轉移到自己把長頭髮度。
 




「我啊？其實我就覺得依家好睇啲嘅，不過就算以前你唔放頭髮落嚟嘅話，本身都已經好睇。冇辦法，人靚，做乜都好難會醜的說。」

禮謙講完之後，自然就引起韻喬嘅不滿啦，於是反哂白眼咁話「程禮謙，口甜舌滑啦你！學埋我男朋友啲衰嘢！但係話說啦，我地咁早過到嚟，其實有咩可以做呢？真係齋坐？同埋會搞到我好緊張！」
 
「哈哈小喬你真係得意，頭先你唔係先話會平常心面對決賽咩？做咩依家講兩講、早少少到集合區反而會咁緊張啊？」禮謙呢句寸到對方一棟都冇，仲引得韻喬面紅紅。

不過好在，大部分嘅選手短時間之内都到達報道區，所以工作人員好快就開始帶住呢48名選手去200米起點線，準備定一陣各項200米嘅決賽，而甲組嘅決賽就安排最後兩組進行。
 
喺低form嘅四場200米決賽完成之後，首先就係女子組200米先跑。





韻喬踏上起跑器前，都先同禮謙打個眼色，而禮謙都向韻喬做出一個like手勢，去幫韻喬打氣。

當然，韻喬都留意看台。果然就見到俊軒企喺欄杆邊，支持自己女朋友。
 
“Bang！”一開始起步，韻喬就已經喺彎道裏面出盡全力其跑，務求去到直路嘅時候，就會比較容易帶出。同時韻喬都冇再去理其他對手嘅位置，一直專心咁向前跑。

而去到100米直路嘅時候，韻喬同其他選手繼續鬥過你死我活，再一次冇人可以有絕對嘅領先優勢，但韻喬同另外兩位選手都已經稍為帶出。
 
去到最後20米，終點已經在望，韻喬於是繼續加速，出盡全力完成比賽。不過喺呢個時後，旁邊線道原本跑第一嘅選手，突然間唔小心揢倒。





雖然呢位選手好好彩冇好似複賽嗰陣時咁，成個跌喺地上面，不過都將原本嘅優勢徹底斷送。於是韻喬就同另外一位同學繼續爭第一，但同時另一個選手都已經開始迎頭趕上。
 
最後，經過練習多時嘅韻喬，憑住出色嘅壓線技巧，成功以第一名衝過終點，獲得女子甲組200米賽跑金牌。

跑完之後，韻喬就去到賽道以外，慢慢抖返順條氣，順便等埋同樣參加決賽嘅禮謙到達。
 
「嘩！又金牌啦喎！恭喜你喎張韻喬！」天殷呢個時候從後抱住韻喬「嘩殷殷你…無啦啦跑出嚟都有嘅？不過小妹都要多謝你先！」

兩個人之後互相擁抱「我地不如等埋禮謙跑完再翻去囉？」天殷之後就點點頭表示同意。

就喺同一時間，終點向起點示意可以起跑...

（待續 ~）

IG link https://instagram.com/bear_big_big_writer 




Threads https://www.threads.net/@bear_big_big_writer