《愛在。貴族學園》: Ch 36 ~ 陸運會之五 Part 7

Ch 36 ~ 陸運會之五 Part 7（連載日期：2026/09/25）

（是日中秋節，我都祝大家中秋節快樂，人月兩團圓）

就喺同一時間，終點向起點示意可以起跑，而此時8個男子甲組200米決賽嘅選手都已經準備好。

「男子組比賽就快開始啦！真係好緊張呢喬喬！」天殷好興奮咁同身邊回氣嘅韻喬講，當然韻喬都話「係呀係呀，我都想禮謙可以贏到金牌返嚟呢！」
 
“Bang！”喺韻喬都未講完嘅時候，呢場比賽就已經開跑。





禮謙同另外7位嘅對手，都喺彎道上面盡全力衝刺，大家都想喺直路可以帶頭贏取獎牌。

至於禮謙，雖然初賽同複賽都唔係跑第一晉級，但對於比賽都全神貫注，一直等待機會突圍。
 
不過，畢竟男仔嘅體力遠比女仔大，所以競爭自然都比女子組更加激烈。同時因為都有唔少花癡嘅女同學，都會留意自己一直所屬意嘅師兄比賽。

所以看台上唔少低form嘅女同學，都特意跑落去走廊睇，同時都發出唔少（類似發姣嘅）聲音，變相干擾喺賽道上嘅選手比賽。

但係，可能因為禮謙喺學校嘅男神包袱唔係太多，加上都因為有之前嘅勤力練習，所以禮謙嘅整體發揮都比較穩定。
 




去到終點前，後面嘅選手都開始追上，禮謙同前面嘅選手都唯有要發力力保位置。

不過去到最後，就算禮謙出盡全力都好，都好不幸咁壓線，輸咗畀一個Form 6嘅師兄，喺呢場決賽裏面得到第二名。
 
禮謙抖順條氣嘅同時，先去祝賀跑第一嘅師兄，然後再返去搵天殷同韻喬。

「跑得唔錯喎謙謙公子！」天殷先送上一個擁抱勉勵禮謙「我……」「比賽過咗佢就算啦，只係差少少運氣啫！」

「你其實頭先已經好叻咖啦，而且你仲有一個機會可以爭金牌咖嘛！一陣間個100米決賽，就好好地咁跑啦，知道未呀？」韻喬都加入勸勉嘅行列「話說我地幾點鐘要去報到啊？」
 




「我估我地應該都要等一陣先會吧，出面依家先準備跑3000米，大會點都要啲時間，而且都好有多人同時有報100米同200米，點都要比少少時間大家休息嘅。」禮謙道。

「不如我地都去搵軒仔先？我怕佢會悶啊！」天殷提議道。但係……
 
「三位好朋友，請問我又點會咁容易就無聊呢！？」韻喬佢地聽到之後，好驚訝就望向後面。

此時韻喬發現自己個男朋友，就已經企咗喺大家面前「小……小軒，你幾時落咗嚟咖？」

「哈哈！驚唔驚喜呢？」俊軒見到韻喬個驚喜樣之後，就同韻喬開下玩笑「咪就啱啱囉！見你地都有比賽呀嘛，所以咪走落嚟，順便去食下嘢囉……」

「你個死肥佬又掛住食！你胃穿窿啊依家？！」韻喬好不滿咁講。

俊軒笑一笑然後就話「唔係啦小喬，不過點都好啦，我都要恭喜哂小喬同謙謙先，你兩個頭先都表現得好好！」
 
「多謝你啊軒少！」禮謙此時攬一攬俊軒，以示感謝對方對自己嘅支持。





而俊軒之後先攬返自己女朋友，順便再錫韻喬塊面一啖「Well done, my dear！」

雖然剛剛先抱怨俊軒掛住食，但收到kiss之後嘅韻喬塊面都紅哂，表情非常甜蜜，簡直羡煞旁人。
 
「多謝你啊，我之後都會加油咖啦，男朋友！但係，你都要幫殷殷同禮謙打氣啊，知道嗎？」韻橋好甜咁講。

「放心啦女朋友，你就算唔講，我都一定會支持佢地咖啦，所以一陣你地兩個都要加油啊，天殷、禮謙。」俊軒回應道。

「我地當然識做啦，放心喎軒少！」禮謙先道「而且我下晝仲要跑班際4乘1，我點都一定會幫5A贏個金牌返嚟嘅！」天殷都哂拍心口咁講。

隨後衆人就留喺看台比較少人嘅位置吹水，直到司令台宣佈各項100米決賽召集為止，俊軒先同佢地分開。

（Ch 36  陸運會之五 ~ 完）





IG link https://instagram.com/bear_big_big_writer 
Threads https://www.threads.net/@bear_big_big_writer