《愛在。貴族學園》: Ch 37 ~ 陸運會之六 Part 1

Ch 37 ~ 陸運會之六 Part 1（連載日期：2026/10/03）

喺衆人聽到要去集合、參加100米賽跑嘅決賽之後，俊軒於是就送其他三個人去召集區度報到，然後俊軒先自己一個行返去自己社嘅看台度休息。

喺俊軒返去看台嘅途中，就見到女班長洪雪盈。

「嗨雪盈！乜咁啱啊？」「喂喂Hello軒仔，做咩自己一個人喺度呀？小喬同殷殷呢？你唔使陪佢地兩個咩？」雪盈對於俊軒自己一支公出現感到奇怪。

「哦，佢地去咗參加一百米決賽嘛，落咗去召集區度報到，然後我依家咪準備返上去看台休息下咁囉！」





「原來係咁…」雪盈若有所思咁講「不過我都聽到小喬佢地嘅成績都好好喎，好似都已經有金牌喺手！」

俊軒好快就點頭承認「係吖，小喬佢攞咗女子200米嘅金牌啦！」

雪盈聽到之後就好開心咁講「咁呀，幫我恭喜佢先！」

「多謝你先啦雪盈，等我一陣幫你同佢講啦！」

「唔該你吖軒仔！」





「不過，軒仔呀，我呢，其實有少少嘢想問你咖，唔知你方唔方便呢依家？」雪盈突然之間提出呢個要求，差少少就令到俊軒措手不及「可……可以呀雪盈，但係請問係咩事呢？」

雪盈喺得到俊軒同意之後，就露出一個微笑話「我地其實可以一邊行一邊講喎！」「好呀！」

於是佢地就慢慢講「其實你…真係同小喬佢……一齊咗？」

「係呀，呢個係真嘅，做咩呀雪盈？你好似唔係好信我地咁嘅？」俊軒覺得雪盈嘅問題有少少奇怪，所以好好奇咁反問對方。

雪盈見到俊軒用好猶豫嘅眼神望實自己，即刻有少少唔好意思，而且想逃避俊軒嘅“法眼”咁，所以就吞吞吐吐話「冇…冇呀小軒，其實唔係話我唔信你，只不過我覺得成件事好峰回路轉咋嘛！」雪盈嘅呢句說話，出乎俊軒意料之内。





不過雪盈冇等到俊軒嘅回應，就自己繼續講落去「因為大家都有眼見啦，一直以嚟由上到Form 4到今年學期頭，小喬佢一直都對你好有成見，甚至可以話唔想接觸啊嘛！」

「但係到喺小喬因為肺炎入院之前一段時間，唔知點解你地就開始行得好埋，而且感情都慢慢變得越來越好，交流都多起嚟，所以我地班其他同學，都覺得你地變得曖昧。然後好快就聽到你地喺埋一齊嘅事啦…」俊軒聽嘅時候都點點頭，認同雪盈嘅講法。

「當然啦，黃嘉惠同學嘅加入，都搞到我地5A班，叫做惹咗唔少嘅麻煩，始終嘉惠同小喬，以及你地之間嘅，甚至係嘉惠同其他同學之間嘅衝突都唔少，呢樣都搞到Ms張有啲頭痛…」

「就算Ms張私底下有叫我同男班長睇住你地幾個都好，但因為我地完全唔知道，你地幾個之間到底發生咩事，所以之前喺小喬同嘉惠發生衝突嘅時候，我地都唔知可以點做去化解你地嘅事！」雪盈講到呢度，成個人都因為覺得自己，未做好班長嘅本分而頭耷耷。

「所以，我希望你唔好怪我多事，但係我都好想……」

「你係想知道，到底我地幾個之間，到底係咩關係，同埋發生過咩事令到我同小喬一齊，係唔係？」俊軒喺聽完雪盈講完一大堆之後，就直接打斷雪盈嘅說話。

雪盈於是就報以非常尷尬嘅微笑「果然係我地班學霸嘅第二把交椅。係，如果你唔介意嘅話，你就同我地交代返，等我地都知道到底發生乜事，但你放心，我唔會同其他人講。」

俊軒喺考慮完一下之後...





（待續 ~）

IG link https://instagram.com/bear_big_big_writer 
Threads https://www.threads.net/@bear_big_big_writer