《愛在。貴族學園》: Ch 37 ~ 陸運會之六 Part 2

Ch 37 ~ 陸運會之六 Part 2（連載日期：2026/10/10）

「果然係我地班學霸嘅第二把交椅。係，如果你唔介意嘅話，你就同我地交代返，等我地都知道到底發生乜事，但你放心，我唔會同其他人講。」剛剛雪盈非常尷尬咁講。

俊軒喺考慮完一下之後，就話「我可以嘅，不過可唔可以去一個人比較少嘅地方先講？」

「可以呀軒仔，咁我地上去高層看台都傾啦！嗰度不嬲都冇乜人，而且長期有人巡住！講秘密ok嘅！」雪盈提議道。

「好呀雪盈！」於是俊軒同雪盈就沿住其中一條樓梯，上去高層看台嘅走廊度。





俊軒之後就開始同雪盈，講返自己同韻喬之間嘅故事，包括由當初Form 1開咗學冇耐，韻喬突然插班入嚟，同自己坐、熟習學校環境嘅事。

當然都有講到自己過咗一排，因為成日喺學校flirt女，於是搞到自己喺韻喬心中嘅形象變到好差，基本上韻喬都當俊軒係隱形人等等，搞到雪盈都忍唔住笑出聲…

「你真係抵死咖喎林俊軒，小喬咁靚女，當時都已經有好多同學想追小喬啦，包括之前啲師兄呢！結果搞到當時啲師姐都對小喬有顧忌啊！」俊軒聽到之後都好唔好意思。

之後，俊軒就開始講到今個學年嘅事，講到自己同韻喬嘅關係，到底係因為咩事，而開始慢慢咁起變化。

雪盈就覺得雖然好多事大家都有目睹或者經歷過，但如果唔係有同當事人傾過嘅話，根本就唔會知道發生咩事。





「原來後面發生過咁多事，先至可以慢慢改善關係，然後再慢慢將你地兩個撮合。但係我都估唔到，嘉惠原來喺後面，搞咗咁多事出嚟，真係辛苦你同小喬啦！」雪盈將自己聽完俊軒所講嘅事簡單嘅回應。

不過，當俊軒同雪盈，喺看台高層走廊繼續行嘅時候，俊軒就離遠見到，一直為自己帶嚟極大麻煩嘅嘉惠，好似喺度搵緊人咁。

俊軒估計嘉惠都係搵自己，於是心裏暗道“唔係嘛，又要搵我啊？唔好啦！”

但為咗唔好帶麻煩畀自己，於是俊軒就同雪盈好細聲講「（女班長呀，嘉惠同學好似喺附近搵緊我，不如我地喺後樓梯都匿一匿埋先！）」

雪盈聽到就笑一笑，但係為咗唔想俊軒會惹麻煩，所以就答應俊軒，同俊軒一齊埋伏到最近嘅樓梯裏面。
 




不過俊軒同雪盈喺樓梯行咗都冇四分之一，俊軒同雪盈就聽到喺梯間裏面，傳來一對男女嘅聲音。

佢地就聽到好多「嗯……嗯……嗯……」嘅聲音，不停咁此起彼落。

“唔係呀嘛，咁都畀我喺度撞到呢啲野？依家我地學校啲學生咁痴線咖咩？”俊軒喺心裏面同自己講。

但居然，身為班長嘅雪盈，紅都面哂咁都知道樓梯裏面嘅發生咩事「真係估唔到居然有同學咁猖狂，喺陸運會搞呢啲野都有嘅，真係當我地學校領袖生唔會巡後樓梯咖喎！」
 
俊軒就同雪盈提出「不如我地慢慢落去，睇下發生咩事囉？」

雪盈於是就考慮咗一陣「都好，等大家以後知道樓梯再偏僻都係有人巡有人行，自然都唔會亂嚟！」於是就同意同俊軒一齊，向住聲音來源方向接近。

而喺去到一半嘅時候，俊軒同雪盈就發現有一男一女嘅同學...

（待續 ~）





IG link https://instagram.com/bear_big_big_writer 
Threads https://www.threads.net/@bear_big_big_writer