【校園】【愛情】A0毒男的愛情史: 【如題】
(考試都出文，算係咁喇。)
【汪芷晴視覺】
呢篇開始就要從琴日開始講起，話說我個日放學之後依舊上圖書館當值，不外乎都係整理下啲圖書，登記下啲老師借房嚟用嘅出入時間，諸如此類嘅雜務，空餘時間就睇下書。
到五點幾就當值完，我從locker拎翻自己個書包準備翻屋企，今日阿爸同我講要去大埔探爺爺，因為好似係身體之類嘅問題，叫我自己乖乖喺屋企，阿爸佢仲好似當我係小朋友咁，我明明已經中三喇嘛，都算得上半個大人，真係好無奈。
返到屋企門口前面，我喺校裙袋裡面揾極都揾唔到條鎖匙，書包都反轉過一輪，都係唔見。
「死啦，鎖匙去咗邊。」我站在原地一段沉思過後突然想起「好似喺圖書館個locker到。」
如是者，我又從新返到圖書館，只不過好可惜嘅係圖書館已經上咗鎖，我睇過校務處出入記錄，拎鎖匙個位負責老師已經收咗工，意味著我已經冇可能入到圖書館。
「點會咁㗎……」今日屋企冇人，點算好。
我迷茫個陣最鐘意周圍行下，五點幾，回憶中好似係呢個時間，我成個商場都行過，冇咩嘢好睇，不過可以幫我暫時撇除煩惱。
我去戲院求其揾套戲睇，係套科幻愛情電影？故事中男主角因為一個承諾【我會拯救你】呢簡單五個字，不惜花光歲月，終於發明咗時光機回到過去，不過因為時空嘅交錯以及蝴蝶效應，搞到女主角呢世人記憶裡面都冇男主角嘅存在過，真係慘，至於，結局係咩，我都唔太記得了，隱約記得係happy ending。
喺戲院走出嚟，我又重新回到冇屋企返呢個難題喇，呢刻我都想有個男主角嚟拯救我，用瞬間移動帶我去圖書館拎翻鎖匙，唔好問點解個諗法咁不切實際，因為青春時期嘅女仔就係咁鐘意幻想，永遠的白馬王子。
但事實卻再一次打擊我，我再度返到學校，冇白馬王子，冇時空穿梭者，只有圖書館仍然鎖上的事實，連校工都開始趕人走，因為學校夠鐘關門。
可能你會問做咩唔打電話畀啲朋友仔去，當時嘅我的確有咁諗過，但為咗唔好打擾人同埋唔好意思，所以我都係暫時收翻呢個念頭。
又過幾個鐘，夜晚真係好凍，冇著校摟嘅我被風吹到開始凍親。
我又唔好意思同阿爸講我冇屋企返，要佢從大埔趕返嚟。
「點解我會咁蠢漏低鎖匙喺圖書館個locker㗎。」我開始抱怨自己的愚蠢。
但再咁吹風落去真係會病，冇曬辦法嘅我只好打電話揾朋友幫手，講完我嘅狀況之後，阿靖欣佢話練完結他就會嚟接我，不過要夜少少。
都算得上係有希望，起碼唔係瞓街住，我坐咗喺自己屋企樓下附近嘅長凳等待靖欣嘅到來，凍親嘅情況好似越嚟越嚴重，咳嗽聲由一兩聲開始越變越多。
我望著手機個時間，七點搭半，距離靖欣練完結他仲有半個鐘。
就喺呢個時間，你莫名其妙出現咗喺我面前。
「啊晴，你坐喺度做咩。」坐喺我隔離位嘅林梓圓問我。
畀佢見到我咁不堪入目嘅情況添，好冇臉「你喺度嘅。」我問翻佢。
「幫啊媽買嘢。」佢拎起手上面嘅兩包米。
我之前聽啲男仔講佢哋最唔鐘意就係幫阿媽買呢樣個樣「咁孝順嘅，咳咳。」唔得喇，感冒越嚟越嚴重喇，靖欣！你快啲嚟啦。
原本諗住佢會返屋企，點知佢仲繼續問「你著住校服唔返屋企嘅。」
「我漏咗鎖匙喺學校，學校鎖咗門。」佢會唔會覺得我好蠢㗎。
「咁你屋企人呢。」林梓圓問。
「阿爸佢今日去咗大埔探阿爺，唔返嚟。」
「今晚咁凍，你自己一個人都唔係辦法㗎喎。」佢關心緊我！？
「咳咳，邊個叫我咁蠢漏啲鎖匙喺學校。」我真係畀自己蠢死喇！！
「不如你上嚟食飯囉，多個人阿媽佢應該都冇所謂嘅。」佢叫我上去食飯！？我依家都算係無家可歸喎。
「咁點好意思啊，麻煩到伯母。」我都係揾藉口推咗佢算。
「無緊要啦，有咩事我孭，最多畀人鬧一兩句。」佢態度依然好堅硬。
「但係...」靖欣佢一陣會嚟接我喎，但係你又咁熱情，我都唔好意思拒絕你。
「行啦，唔通你真係諗住瞓街咩。」佢無端端拖起我隻手行，佢隻手好暖，凍到入心嘅我真係覺得好窩心。
就咁樣，我跟住林梓圓去咗佢屋企。
……
「死仔，我叫你買米啫，冇叫你買埋個女仔返嚟喎。」佢阿媽好似好唔歡迎我咁。
「唉，得啦得啦，加鎹啊今晚。」林梓圓佢趕咗佢自己阿媽入廚房。
「咳咳！」死啦，睇嚟真係傷風。
「啊晴你去梳化坐住先，我整杯薑蔥水畀你。」林梓圓講完就入咗廚房同佢阿媽傾計。
我去咗梳化坐低，望一望手機，靖欣突然Whatsapp我。
靖欣:「我早咗放，你喺邊。」－19:48
我:「我冇事喇。」－19:48
靖欣:「？？唔明？？」－19:49
我:「我聽日返到學校再同你講啦。」－19:49
靖欣:「咁好啦。」 －19:49
靖欣:「話說我今日見到Andy啊...佢仲同我打招呼，之後我問佢(下刪1000字)。」 －19:50
我睇唔過眼就關咗手機，一個唔小心就瞓著咗。
我感覺到有人在晃動我肩膀。
「飲咗碗薑蔥水先，可以驅寒止咳。」林梓圓拎咗碗薑蔥水畀我。
「多謝你。」我發自心底一笑，因為真係好開心，有人關心，有人照顧種感覺真係好好。
估唔到平時嘅佢成日講爛gag，上堂個陣成日吊兒鈴鐺，功課成日都要我擔心，估唔到都有咁體貼嘅一面。
之後就係食晚飯，同埋佢家姐飲醉酒，仲有佢本人講爭洗碗嘅劇情，哈哈。
總之經過今日之後，我發現林梓圓佢好可靠。
第二日我好早瞓醒，應該係話我平時呢個鐘數瞓醒，我行出廳，見到姨姨，打招呼。
「姨姨，早晨。」我說。
「早晨，晴妹。」姨姨佢經過琴日開始，一直叫我晴妹，不過我都唔反感，所以由得佢啦。
「校服喺個邊，啲睡衣放落洗衣機就得。」
「唔該。」
「同埋我煲咗粥，你過多五分鐘幫我熄火，順便幫我落鹽，姨姨我要出去買少少嘢。」
「順便幫我叫醒個衰仔啊，唔該你。」
「冇問題。」我說。
我收到指示去叫醒林梓圓，順便叫醒佢一齊食早餐，不過佢間房關住咗，我敲門過後就入咗去，佢喺上格床瞓得正香，搞到我都唔好意思叫醒佢。
我站在樓梯上搖晃佢膊頭，試圖喚醒佢，見佢瞓唔醒「仲未瞓醒啊~」我說。
之後佢無端端彈咗起身「醒咗，咁早嘅你。」
「習慣咗，身體自自然然就醒咗。」我接著又說「落嚟食早餐啦。」
「你畀少少時間我，轉頭落嚟。」林梓圓說。
「啲粥凍㗎喇，快少少啦。」我說。
「你去食住先啦。」佢臉上好似有難言之隱。
「要食就一齊食啦。」食早餐要一齊食先好食㗎嘛。
「但係…好凍啊，我唔想落床啊。」喔？原來係驚凍，咁就簡單啦，我一手將棉被搶走。
林梓圓佢都唔肯認輸，死死咁拉住棉被「啊晴，啊晴，啊晴，唔好搶住先。」
我停下手來，目光注視著他。
「你知唔知青春期嘅男仔朝早會發生咩事。」他突然說。
我思考片刻，印象中好似聽過，我瞬間明白咗佢表達乜嘢，頭腦也發熱。
「唔...唔好意思，我出去等你。」差少少就攘成大禍。
之後嘅劇情相信大家都知，我將糖當成鹽落，真係蠢死。
……
學校。
「咁你琴日最後點啊。」靖欣問我。
我遮住嘴巴細細聲講「我去咗林梓圓屋企。」
「咩話！！」靖欣佢驚訝程度，大概10分裡面有9分左右，同埋聲線嘅大細搞到全班都望過嚟，超尷尬……
「你冷靜啲。」我連忙安撫靖欣，我知一個女仔上男同學屋企係非常危險嘅行為，佢擔心我都好正常，不過好彩我識得嘅朋友都係好人。
「佢有冇對你做咩！？」靖欣依然好激動。
「冇啊，我同佢瞓唔同房，你唔好諗咁多啦。」我說。
靖欣摸了摸我頭髮「你琴日有沖涼喎，啲頭髮都唔油嘅。」佢仍然好嬲我魯莽舉動。
「梗係啦。」女仔好鐘意乾淨。
「你有衫換咩。」靖欣說。
「你驚呢樣咋，林梓圓佢屋企有個家姐，我琴日拎咗佢家姐啲衫嚟著，你放心啦，我識得保護自己㗎。」我說。
「你隻死綿羊仔，差啲送咗自己落去狼口都唔知，你知唔知啲男仔好鹹濕㗎。」靖欣將我塊臉當麵團咁捏。
「喂呀，原本塊臉都包包地，再捏真係變圓形喇。」我撥開靖欣隻手。
「哈哈。」靖欣被我逗笑了「畀我知佢夠膽對你隻綿羊仔喐手喐腳，實有排佢歎。」靖欣佢揸實自己拳頭放係我面前。
「我唔係綿羊仔囉。」我非常不滿，我知男仔會朝勃囉好冇。
「係係係，你唔係綿羊仔，你喺純到冇得再純嘅綿羊仔。」靖欣說。
「傾緊咩啊。」曉彤忽然出現。
「佢呢隻綿羊仔啊...(就唔重複多一次啦)。」
【短暫主角變換－完結。】