［愛情純愛］我地之間嘅友誼純度絕對等於零！！！: 145. 走火入魔

邱旻顥喺心裏嘆一口氣後起身行到李逸彤旁邊嘅位置坐低，李逸彤疑惑地望住坐低喺自己旁邊嘅邱旻顥，邱旻顥將自己個飯直接由對面嘅位置移到李逸彤隔離

「你點解坐嚟呢邊⋯？」李逸彤感覺有啲意外，但都有啲唔明白邱旻顥嘅舉動

「免得你尷尬啦～坐你隔離你又望唔到我啦⋯」邱旻顥無奈地嘆咗一口氣，雖然臉上同平時一樣掛上微笑，但心入面都係有啲唔好受嘅感覺

「我唔係呢個意思啦⋯」李逸彤知自己令邱旻顥唔高興，連忙坐近邱旻顥，伸手挽住邱旻顥嘅手臂，「只係因為好少著住校服同你食飯嘛～我又唔係特登唔望你～」

「咁點解唔望我？」邱旻顥連忙問道，語氣中都夾雜着少少嘅不悅，少咗一份平日嘅溫柔，「李逸彤，你講點解。」





望住邱旻顥少少嬲嘅模樣，李逸彤忍唔住笑咗出嚟，本來挽住邱旻顥手臂嘅手沿住前臂下滑，指尖掂到邱旻顥嘅手心，用指尖撐開邱旻顥嘅指縫後握緊邱旻顥嘅手

「你唔好以為咁樣就得呀⋯」邱旻顥仍然有啲不悅，但低頭望到李逸彤主動地拖實自己，又有啲心動有啲開心，「你唔好好解釋，我唔理你㗎啦⋯！」

「我解釋我解釋！」李逸彤頓時求生欲滿滿一樣講道，佢定睛地望咗邱旻顥兩秒後甜甜一笑，然後從佢嘅表情都可以睇到，李逸彤又開始花痴，靠喺邱旻顥嘅膊頭上：「因為好少同你咁樣單獨兩個人食飯，平時四個人一齊食飯我又唔會一直望住你⋯宜家咁樣得我地，認真一睇⋯發現你著校服真係好好睇⋯！」

邱旻顥聽到李逸彤講嘅嘢，頓時一怔一愣，心裏無奈地道：「呢個人喺度講緊咩⋯！？」

邱旻顥一個淡然嘅眼神望向李逸彤，李逸彤抬頭同邱旻顥四目交投，喺邱旻顥一臉淡然嘅表情下，心入面卻係默默地激動起嚟，心跳嘅聲音好似有環迴立體聲一樣，由心臟嘅位置擴散到身體每一個角落後反彈番嚟





望住一臉花痴嘅李逸彤，邱旻顥除咗想笑之外就係無奈，明明兩個人同一間學校，平時都一齊番學放學，李逸彤竟然話認真一睇就發現自己著校服真係好好睇

「你有冇認真望過我㗎⋯」邱旻顥一臉無言，除咗咁問，邱旻顥仲可以講咩

「有呀！」李逸彤理直氣壯地回答，「只係發現咗無數次～」

「哦係咩？」邱旻顥無奈地望李逸彤一眼，「下次同你出街嘅話著校服？」

「唔得唔得！」李逸彤連忙拒絕，「點可以呢！」





「你中意睇校服多啲嘛。」邱旻顥低頭食飯，但一直用餘光留意着李逸彤嘅反應

「校服便服都中意睇啦⋯！」李逸彤對邱旻顥撒嬌，手挽住邱旻顥嘅手臂，一雙明亮嘅大眼睛直勾勾地望住邱旻顥

「得啦得啦⋯食飯啦⋯」邱旻顥紅着耳根，伸手摸一下李逸彤嘅頭，再望多李逸彤一眼，心臟都要炸裂

「你做咩唔望我⋯？」李逸彤鼓起兩泡腮，聲線有啲嗲，邱旻顥瞄李逸彤一眼後頓時收回視線

「怕望你一眼之後，你走火入魔⋯」邱旻顥望咗李逸彤一眼後連忙將視線移開

其實怕會走火入魔嘅係邱旻顥自己，同咗李逸彤一齊之後，李逸彤好似變咗第二個人一樣，成日都會痴住邱旻顥之餘，對邱旻顥講嘢嘅語氣，唔知點解點聽都覺得有啲嗲⋯

「點解會咁嗲⋯？佢之前係咁樣同我講嘢⋯？」邱旻顥喺入心默默地問道，心跳嘅加快令佢更想耷低頭食飯，「佢再唔好好咁食飯，走火入魔嗰個就係我啦⋯」

食完飯之後兩人緩步行番學校，兩人都冇拖手，但手卻一直喺微微前後晃着嘅同時輕碰對方嘅手





「邱旻顥！陪我去圖書館一轉呀～」李逸彤喺啱啱踏入校門嘅時候對邱旻顥講道

「好呀，你要借書？」邱旻顥自然地朝後梯嘅方向行去，李逸彤跟住邱旻顥行

「嗯嗯！嚟緊份SBA嘅書都要借啦～再唔借就做唔切啦⋯」李逸彤微微點頭，「下個星期就交啦，宜家借定都差唔多。」

行到上五樓嘅時候，邱旻顥試探般伸手，當食指輕碰到李逸彤嘅手心時，李逸彤心臟一縮，下意識瞄一眼

李逸彤嘅食指輕輕地扣着邱旻顥嘅食指，邱旻顥嘅雙眼朝旁邊望一眼，樓梯就只有佢兩個人

邱旻顥假裝不經意地將食指鬆開，放膽地伸手拖李逸彤，明明都已經係拍緊拖嘅狀況，但兩人仍然保留一份羞澀⋯

李逸彤企喺書架前尋找着佢要搵嘅書，邱旻顥隨意地從書架上抽咗一本書落嚟掀開睇下





「好專心咁⋯」喺離邱旻顥有三個人距離嘅李逸彤悄然地留意住邱旻顥

佢以愛慕嘅目光落喺邱旻顥嘅側臉上，李逸彤將已經搵到嘅目標書輕手輕腳地從書架上拎落嚟，將書擋住自己下半張臉，只露出雙眼用嚟望邱旻顥

「邱旻顥就係嗰種⋯一專心起嚟就令人好心動嘅人⋯」李逸彤喺心裏道，下一秒李逸彤輕輕一笑，「其實同專唔專心冇咩關係，只係因為我中意佢⋯」

喺同邱旻顥一齊嘅時間裏，李逸彤眼中就唔會有其他人⋯又或者從對邱旻顥心動嘅一刻開始，佢嘅眼中就唔再有邱旻顥以外嘅人嘅身影

李逸彤朝邱旻顥嘅方向邁步，行到去邱旻顥嘅身旁時邱旻顥仲睇緊手上嘅書

李逸彤嘅手輕輕地捏住邱旻顥嘅衫袖嘅一角，然後以小幅度拉咗一下，喺邱旻顥望向李逸彤之際，李逸彤輕輕踮起腳尖，準確地喺邱旻顥喺唇上輕輕一吻

呢個輕輕嘅一吻就好似指尖觸碰到泡泡一樣嘅感覺，泡泡「啵！」一聲爆開

「本書我搵到啦～」李逸彤輕快地講道，臉頰上嘅紅霞話比邱旻顥知啱啱嘅吻係真實嘅





李逸彤轉身就從書架嘅位置行出去，邱旻顥將手上拎住嘅書合上放回書架上

「我女朋友太可愛⋯」邱旻顥將書插咗一半入書架，內心無法平靜落嚟嘅佢將碰靠到自己嘅手背上




IG Link: https://www.instagram.com/nd_cotttoncandy/?hl=zh-tw