《求婚嗰日，我發現我女朋友鍾意食屎》: 十七

八仙果師父帶住我哋上咗佢㗎車，經過大約一個鐘車程，我哋就到達咗佢屋企。
「嘩，原來做呢啲神神怪怪嘢真係咁好搵㗎！」我不可置信咁望住眼前呢個高級別墅嘅入口，同今朝去嗰座殘舊唐樓簡直係天淵之別。
「尊重啲啦，咩神神怪怪啫，師父話佢份工叫做『普渡眾生』啊。」敏敏細細聲咁糾正我，睇嚟經過驅蟲一役之後，佢對師父已經係敬若神明。
「我諗佢唔係『普渡眾生』，係『比華利山』。」望住「比華利山別墅」嘅大閘，我嘆咗一口氣，心諗自己做五星級廚師原來都唔係有幾巴閉，倒不如學下師父咁sell下佢啲神化產品仲實際。
 
八仙果師父架車兜到去其中一座別墅之下，就叫咗我哋落車。
「咁夜，我老公唔知瞓咗未呢？」師父一邊講，一邊走過我哋去開門。
而我同敏敏互望一眼，心諗，原來師父係有老公嘅。
 
呢個時候，門打開咗，驟眼望入去，同一般家庭嘅感覺差唔多，同我心目中放哂滿天神佛、八卦煉丹爐嘅情況唔多似。


「Honey，I am back！」八仙果師父叫咗一聲，然後樓上就傳嚟咗一聲「嗯」作為回應。
「我老公平時比較鍾意獨處，唔好打擾佢喇，你哋嚟二樓先啦。」八仙果師父引領住我哋走上二樓轉左嘅一間房，門一打開，成個佈置大小就同師父唐樓個Office差唔多。
「你哋坐一坐、慢慢參觀下先，因為『血蠱』呢樣嘢比較罕有，我要上樓攞幾本書查一查，你哋等我一陣啦。」於是，八仙果師父就咁留低咗我同敏敏喺房。
 
「今次，睇嚟真係有救喇。」我見八仙果師父走咗，先敢興奮翻少少咁捉住敏敏隻手同佢講。
「嗯，希望係啦。只不過我都係諗唔明，到底咩人為咗害我竟然寧願自己短命啲。」敏敏托住頭，睇嚟佢真係好煩惱：「頭先我喺程車上面一直諗緊，到底我得罪過咩人呢？嗱，五歲前我真係無咩記憶，但係幼稚園嘅我其實都係一個唔多出聲嘅小妹妹，照計都好難嚴重咁得罪人吖。而自從我五歲開始有食屎呢個怪病之後，我內心好擔心一旦有人發現，我就無哂朋友。自此之後我對身邊每個人都好好，希望為自己留住多啲朋友，所以理論上應該都製造咩仇家出嚟㗎。」
「嗯，但係世上沒有無緣無故嘅恨，既然有人寧願減短條命都要搞你，背後一定有啲連你自己都唔察覺嘅怨恨嘅。」雖然我口中咁講，但係其實我都一樣係諗唔明到底邊個會用咁歹毒嘅方法去傷害人畜無害嘅敏敏呢？
 
正當我哋兩個陷入沉思嘅時候，突然，我感受到有一件硬物隊住咗我背脊，仲有一把低沉嘅聲講：「你兩個都唔好亂郁。」
一時間，我同敏敏都好似定咗格一樣，勉強側住頭咁同對方打咗個眼色。


明顯地，大家都唔知呢一刻突然發生咗咩事。
 
「保持深呼吸。」低沉嘅聲再次向我哋發出指令。
「你……你唔好亂嚟啊，八仙果師父好快就翻嚟㗎啦，到時佢實用佢啲八仙果射死你啊！」唯今之計，我同敏敏嘅希望就係等八仙果師父回歸，所以我唯有用「拋」字訣嚇下後面個人先。
「佢？嘿！旁門左道，一啲都唔科學！」估唔到，後面呢個男人居然一啲都唔將八仙果師父放在眼內。
 
我同敏敏維持咗定格嘅動作一段時間，一直都唔知後面嗰個人喺度做緊啲咩。
唯一知道嘅，就係佢一直好細聲咁自言自語：「點解呢？真係無喎，無理由㗎。」
到底後面呢個係咩人呢？
而佢又喺度做緊啲咩呢？


 
就喺我心入面有「十萬個為什麼」嘅時候，我感覺到，背後嗰一件硬物似乎有少少離我而去咗。
一無咗呢個威脅，我諗到唔諗，即刻用我平時可以單手舉起隻鑊嘅黃金右手，頭也不回咁打出一拳。
後面馬上傳嚟一聲慘叫，而我亦都即刻轉身，準備再補上多一拳去制服佢。
 
當我一轉身，我就見到呢個人嘅裝束。
一身白袍、頸上面有個聽診器，手上仲要拎住咗一部閃下閃下嘅儀器。
就咁睇，我忍唔住問咗呢個人一句：「你……係醫生？」