《求婚嗰日，我發現我女朋友鍾意食屎》: 十八

喺八仙果師父間房入面，而家坐咗四個人。
我、敏敏、師父、仲有因為俾我砂鍋咁大個拳頭打咗一捶而要用雞蛋碌面嘅白袍醫生。
 
「所以呢，你……」我指住白袍醫生，然後望向八仙果師父，「係你老公？」
八仙果師父點一點頭，表示正確。
「咁點解你老公又要偷偷哋入你房仲要走嚟我哋後面叫我哋唔好郁呢？」我充滿疑惑同好奇咁問。
「佢呢，係個私家醫院高級嘅醫生嚟嘅，咩都要講科學，成日都唔信我啲法力同道行有效。所以，以前我每次帶啲客人翻嚟，佢都會偷偷哋去搵我啲客，嘗試用佢啲科學解釋俾啲客人聽，等佢哋選擇相信科學，唔好信我。所以我無奈之下先要搬到去唐樓，就係廢事佢搞我啲客。」八仙果師父雖然講緊佢老公同佢鬥氣嘅事，但個樣又無半點嬲，「今次呢，我都有係咁易話佢知敏敏嘅情況，佢一聽到『中蠱』，就話只不過係中咗寄生蟲啫，而我就堅持無咁簡單。所以，頭先佢梗係趁住我去搵書，專登過嚟檢查下敏敏嘅情況啦。」
 
聽住呢兩夫妻咁莫名其妙嘅鬥氣方法，我都廢事再糾纏落去，所以就轉過去問白袍醫生：「咁啊醫生，你頭先又檢查到啲咩呢？」
白袍醫生托一托佢副金絲眼鏡，呢刻個樣有啲似馬國明，但係臉上完全無表情，然後仲要配合一把毫無高低音調嘅聲咁講：「我全名高才新，你哋可以叫我做高醫生。頭先我嘗試用咗最新嘅手提X-光機去檢查你女朋友，發現真係連半條蟲嘅影子都無。果然係，出乎意料咁奇怪。」


雖然高醫生用「出乎意料」嚟形容，但係佢講嘅時候連眉毛都無郁到半下，完全感受唔到佢有半分出乎意料。
只不過，呢個時候嘅八仙果師父突然就好似武俠片啲古人咁喺度仰天大笑：「科學都唔係大哂嘅！蠱蟲係有生命、有智慧嘅邪門之物，邊係你呢啲無感情嘅機器可以探測到出嚟嘅呢？所以呢，今次你都係唔夠我專業㗎啦！」
高醫生唔太滿意咁「哼」咗一聲，兩條眉毛就繼續維持原狀。
 
「咁你Check敏敏就check啦，做咩又搞我背脊呢？我最憎人搞我後面。」我追問高醫生一句。
「唔好意思，職業病，我頭先見我有隻手空咗出嚟，咁啱又帶咗聽診器，所以順手幫你檢查埋啫。」高醫生表情不變咁答。
「咁你又檢查到啲咩呢？」我好奇問。
「肺幾清，不過腎有啲虛，甚至係有啲虧。」
聽到呢個答案，我非常咁後悔我問咗呢個問題。
重點係，我見到敏敏喺我身邊默默咁點頭。


 
「師父，你睇書有咩結果啊？」為咗令大家嘅注意力從我個腎移開，我主動向八仙果師父發問。
「嗯，呢一層，真係有啲難搞。我翻查古書，『血蠱』原來係極為秘藏嘅『養蠱』之法，下蠱之前，養蠱人必先以其血餵蠱八八九十一日，早晚各餵一次，而且必須飯後餵養。而下蠱之後，亦需要定期餵血去增強蠱蟲毒性。除此之外，血蠱蟲亦需配對配偶，用作遠方操控之用。由於下蠱難度甚高，所以一旦要解，難度亦都非比尋常。
 
以一般嘅蠱毒嚟講，只需憑我嘅驅蠱大法，將毒蠱蟲從體內趕出就可以解除蠱毒。但係，由於『血蠱』係以一對養成，所以要破解蠱毒，必須尋根究底，搵出下蠱人到底係邊個，然後再擊殺一對血蠱蟲，否則根本就無可能肅清蠱毒。」八仙果師父講到皺哂眉頭，件事睇嚟真係唔簡單。
 
「但係，我真係諗唔起，到底我五歲之前得罪過咩人喎，咁點搵啊……」敏敏無奈咁托住塊面講。
「呢一點，我都有諗過。照正常計，的而且確，五歲嘅你，無咩可能惹到咁大仇口翻嚟。所以我再翻查古書，又俾我發現咗另一樣嘢。原來，『血蠱』威力強大嘅地方除咗係可以控制人心志之外，佢仲有另一個特性，就係可以代代相傳。」八仙果師父攞出一本古書放喺枱面，書名係《蠱你唔到》。
「你咁講……？」敏敏臉上出現咗一個表示不可思議嘅驚訝表情。
「因為『血蠱』有自我分裂嘅特性，所以可以蟲卵可入到父母嘅精子或者卵子度，所以作為中蠱者嘅後代，都會同樣受蠱毒所害。」八仙果師父翻開《蠱你唔到》嘅其中一頁，果然有同師父所描述一模一樣嘅記載。


 
「即係話，可能我阿爸或者我阿媽其實都有中『血蠱』？」敏敏終於講出連自己都唔太相信嘅推測。
「即係話，世伯伯母可能都會食屎？」我都非常驚訝咁望住敏敏講。
我同敏敏拍拖七年，當中當然見過佢父母好多次啦。
佢父母俾我嘅感覺係熱情大方，相當符合可以教出敏敏呢個知書識禮嘅女嘅特質。
所以，我完全幻想唔到佢哋其中一個私底下竟然會食屎。