呢日陽光燦爛,天氣晴朗。

神咁早我起身刷牙洗臉,跟住由淺水灣揸車嚟到大嶼山。

之前Samuel話好多人爭崩頭,爭住嚟見個台灣高僧,本身我係唔信,點知嚟到現場,見場面好似嘉年華咁墟冚,先知原來條友無吹水。

成間禪寺塞滿人,打曬蛇餅,條隊排到去禪寺牌樓出面。

到處人山人海,我搵極都搵唔到Samuel,好在對方咁啱打電話過嚟揾我。





佢形容左一下自己身處嘅位置,我按住佢嘅指示,過去搵佢。

「傑傑!呢度呀!」

行到去大雄寶殿前附近嘅空地,見到Samuel向我揮手。

條友孭住一個大背囊,搭埋帳篷,十足十人地去行山露營咁。

「咁晏架,差啲以為你訓過龍唔知醒。」





「依家先十點渣喎,都唔算晏啦。」我望一望錶回答。

之後我問佢:「話時話,你條友真係從前日開始排?」

「係呀,我拎埋帳篷、gas爐、睡袋、電筒通宵嚟排架。」

「你咁早嚟排隊都排到咁後?」

「都話左個大師好有料,所以咪咁多人爭住排隊嚟見佢。」





「真係咁把炮?」我半信半疑。

「嗯嗯,不過啱先主辦方話見面時間,淨係去到下晝兩點,家下都十點幾,前面條隊仲係咁長,我驚會排唔到我地,可能隨時截龍都未定。」

Samuel呢頭講完,嗰頭就有兩個和尚埋嚟截龍。

好彩,啱啱好截到排喺我地後面嘅人。

「下?唔係呀嘛?」「我好早嚟排架喎!咁都唔俾入?」「係囉!有無搞錯!」

排唔到入去嘅人非常鼓譟。

Samuel則感到慶幸:「好彩我識得早啲嚟排隊,如果唔係就無機會見到大師,我係咪好醒目呀?」

「Er...係呀,叻啦叻啦。」我隨口附和幾句。





排喺我地前面條隊好長,目測至少有百幾人,都唔知要等幾耐先輪得到。

附近燒香嗰啲煙周不時攻埋嚟,再加上天時暑熱,隔籬又無遮無掩,齋企喺度都覺辛苦。

「傑傑,你額頭流曬汗,不如我幫抹下?」Samuel拎紙巾想幫我抹汗。

「唔洗咁勞煩,我自己嚟得啦。」我拎過對方手上嘅紙巾,印一印額頭上嘅汗水。

排左二十分鐘左右,我開始有啲不耐煩:「點解條隊好似無郁過咁嘅?有無Fast Pass直接入去唔洗等呀?」

「你當呢度係迪士尼咩,俾啲耐性啦。」

「咁大約仲要等幾耐?」我問。





「我諗等多一個鐘就輪到架啦。」佢答。

結果,我地一等就等左三個幾鐘。
 
等到頸都長,終於入到去。

大殿之內莊嚴堂皇,令人不禁肅然起敬。

一個身穿和尚袍嘅中年大叔,帶我地嚟到慧真大師面前。

大師就坐喺大殿中央,雙目閉合,雙腿盤坐於蒲團之上,背後有三尊金色佛像。

佢年紀睇落七八十歲,臉上佈滿皺紋,下巴留左執好長嘅羊咩鬚。

「你地有咩難題需要慧真大師指點迷津,請不妨直說。」帶路嘅中年和尚對我地講。





我乾咳兩聲,清一清喉嚨,然後一口氣將自己人生最大嘅煩惱,講出嚟俾大師聽。

聽完我嘅故事,對方無任何反應,亦無任何動靜。

「大師,請問我咁嘅情況,係咪因為中左詛咒?係嘅話你有無辦法幫我解決?」我追問。

對方依然粒聲唔出,都唔知有無聽到我講嘢。

「條友係咪訓q左,都無反應嘅?」我細細聲問Samuel。

「我諗你最好將頭先講嘅嘢,用國語翻譯一次。」

係啵!對方係從台灣嚟,咁我應該講國語先啱。





就正當我要開口,想用國語重新講一次之際,突然耳邊聽到一把低沉嘅國語男聲。

「你之所以一直無法跟女子交合,並非因為中了詛咒,而是涉及到你上輩子許下的一個承諾。」

Samuel即刻望過嚟,似乎佢都聽到呢把聲。

我同佢都嚇左跳,因為在場連埋個中年和尚一共四個人,無一個人開口講緊嘢。

咁啲聲喺邊度傳嚟...

「不用驚訝,我是你們眼前的慧真大師,我正在使用傳心之術跟你們對話。」

嘩!

呢下有啲意想不到,眼前呢個高僧居然識得隔空傳話!

照咁睇佢唔似係啲呃神騙鬼嘅神棍,睇嚟堅係有料到。

「大師,你頭先講嘅嘢係咩意思?我唔係好明白,可唔可以解釋一下?」我心急追問。
 
慧真大師氣定神閒,用傳心術耐心解答我嘅疑問:

「上輩子的你曾在愛人面前許下誓言,如果有下一輩子的話,你也只會和她在一起,也只愛她一個人,而且絕不會碰其他女人,而這個誓言延續到了今生,導致了你無法和別的女人交合。」

我一邊聽一邊搲頭:「你意思係上一世我發左個誓,令到我呢世淨係可以同一條女一齊,仲唔可以搞第二啲女人?」

「沒錯。」

「咁…咁點解會有嗰道貞操力場嘅出現?」

「你所說的那一股無形力量,是為了防止你破壞誓言而存在的。」

「下?咁都得?」

「如果我沒錯的話,這應該是你的一段宿世姻緣,命運安排了你這輩子,只能和那個命定的女人在一起。」

「咁嗰個女人係咩人嚟架?點解佢仲未出現嘅?如果佢一直都唔出現,咁我咪成世要做青頭仔?」我一口氣再追問。

慧真大師無即時回應,沉默左一分鐘後,好簡短咁回答左幾隻字:「她會出現的。」

「咁係幾時?同埋條女個樣係點架…」

「唔好意思,時間已經到,今日嘅見面會要到此為止。」個中年和尚突然打斷我嘅反言,並請我地離開。

「但係我未問完嘢...」

「對唔住,我地呢個見面會嘅時間,規定左係下晝兩點完,依家已經夠鐘。」

「咁可唔可以加鐘?我仲有問題想問大師。」我請求延長見面時間。

個中年和尚卻堅決拒絕:「首先,我地今次個見面會係免費嘅,大師同你地係因緣而會,第二就係時間已經到,大師亦都要休息,所以麻煩請兩位離開。」

講完,對方就叫保安入嚟,請我地出去。

咁嘅情況之下,我同Samuel只能乖乖離開大殿。

等左三個幾鐘,見面見得連十分鐘都無。

好在叫做有收穫,至少我終於知道自己一直屌唔到閪嘅原因。