我同離家出走嘅有錢仔合謀扮拍拖: 六

朱皓言返咗嚟之後，我哋又好似之前咁過住咗精打細算嘅生活。
我就不嬲都慳開嘅，而朱皓言就辛苦少少，唔可以再好似之前咁一出糧就使晒啲錢去買blue label。
因為佢仲要交租俾我。

其實慳錢對我嚟講話難唔難，主要係因為餐廳同屋企近，我唔使搭車返工。朱皓言就慘啲，要朝朝搭成粒鐘巴士先返到工。
食飯嗰方面我都唔係使好多錢，因為lunch可以食餐廳嘅嘢。好多時我會喺lunch嘅時候食飽啲，咁夜晚就唔使食，又慳返餐飯錢。
但而家我要幫朱皓言諗埋佢嘅晚飯。既要盡量慳到錢，又唔可以太劣。
最後我決定每晚放工時偷偷哋帶當日餐廳用淨嘅食材返屋企煮俾朱皓言。有時冇咁好彩有淨，我就會叫佢自己買嘢食。

夜晚食完飯，朱皓言多數會喺客廳梳化用我部laptop寫小說，而我就坐喺佢隔離用電話睇片或者睇書。


不過佢好小器，永遠都唔肯俾我睇佢寫嘅小說內容。我有時好奇想裝吓佢，佢就會反應好快咁即刻遮住，或者直接入我房鎖門寫。
「喂我間房嚟㗎喎！」我喺出面狂拍門。
「再嘈我今晚就唔開門。」佢喺入面威脅。
我有啲膽怯咁縮手，因為我信佢做得出。
我不禁懷疑，而家到底邊個先係包租婆？！

有時寫小說冇靈感，朱皓言會同我一人開一罐啤酒一齊睇電視。
有一日睇睇吓電視，佢呷咗啖啤酒，跟著嘆咗口氣。
「我覺得我嘅taste開始劣化。」佢表情苦惱。
「做咩事？」我問。


「我竟然開始覺得便利店嘅cheap啤酒都幾好飲⋯⋯」佢眼神好無辜。
我一嘢將我手中嘅咕𠱸掉向佢。
作為便利店嘅長期顧客，我覺得自己受到侮辱。

我哋而家睇緊嘅係一套老套愛情電視劇，又係貧窮女主角愛上有錢男主角嗰啲。
我睇到恰眼瞓，但朱皓言冇睇過呢啲劇，所以好有興趣。
「有錢男主角同窮撚女主角，咁似我哋嘅。」睇睇吓佢笑咗出嚟。
「你而家都係窮撚嚟咋喎。」我斜睨咗佢一眼。
套劇播到男主角阿媽嚟搵女主角，開咗張支票叫女主角離開男主角。
女主角當然寧死不屈。



「如果呢啲情節發生喺我身上就好⋯⋯我一定會收。」我以艷羨嘅目光望向電視入面嘅女演員，佢正七情上面咁演繹緊被用錢侮辱嘅悲憤。
本來只係無意之中嘅呢喃，但我講完出口，我同朱皓言都呆咗一呆。
然後我哋同時轉頭望向對方。
「你覺得⋯⋯」
「如果⋯⋯」
我哋同步開口。
呢一刻我哋知道，某一個大膽嘅想法同時喺我哋腦海中浮現。
如果俾朱皓言屋企人知道咗佢喺我度，佢哋會唔會以為我哋一齊緊，然後同電視劇嘅情節一樣俾錢我叫我走？
如果我屋企有第三者在場，呢一刻佢就會見到兩個窮撚喺度互望，眼中散發住相同嘅興奮又奇異嘅光芒。