我同離家出走嘅有錢仔合謀扮拍拖: 七

「其實我呢排見到有人跟蹤我，應該係我屋企人派嚟睇住我。」朱皓言開口。「或者我哋可以利用呢個機會做場戲俾佢哋睇。」
第二日我收工嘅時候，朱皓言喺餐廳門口等緊我。
我腳步輕快咁行過去。行到佢面前嘅時候，佢好自然咁對我張開雙臂。
我貼上去，僵硬咁用雙手攬住佢，臉龐埋喺佢嘅心口，佢嘅氣息充斥住我個鼻。
「你咁僵硬，佢哋唔會以為我哋係一齊緊，只會以為我強迫緊你。」朱皓言帶點嘲弄嘅聲音喺我頭頂傳嚟。
我緊張到手心出汗，雙手再將佢攬實啲。

隔咗一陣，朱皓言放開咗我，改為拖我隻手。
「我想買爭鮮食。」佢微笑咁講。我覺得呢句說話由佢把口度講出嚟真係好唔match。
遠處有兩個看似係路人嘅身影一直注視住我哋。



最後我哋真係拖住手去咗爭鮮。喺爭鮮門口，我扮唔覺意咁回頭一望，嗰兩個人果然一直跟住我哋。
我擰返轉頭，開始諗買咩食好。
我買咗個九蚊嘅三文魚手卷，而朱皓言本身淨係攞咗盒綜合壽司盛，見到我個手卷之後，佢又跟住我攞咗一個。
埋單都係六十蚊有找，抵到爛。

出咗門口，嗰兩個人仍然喺附近停留，食緊煙。
我其中一隻手攞住爭鮮外賣，朱皓言再次自然咁拖住咗一定我空出嚟嗰隻手。
「好好珍惜呢段時間呀，我隻手唔係邊個都拖得㗎。」
我真係想撕破佢呢副自以為是嘅嘴臉。


雖然其實感覺都唔差⋯⋯
朱皓言溫暖嘅手掌包裹住我成隻手，我冰冷嘅手心逐漸被捂熱。
「其實拖我手要加五十蚊服務費。」我舉起我哋十指緊扣嘅手講笑，想掩飾自己嘅異常。
「咁平？仲有咩服務呀？我出一千。」佢笑得勁衰，一定唔係講緊啲咩好嘢。我睥咗佢一眼。

我哋一邊吹水一邊行到屋企附近，表現到好似唔為意有人跟蹤咁。
再轉個彎就到我哋棟大廈，我哋身旁係一面牆。
我正打算繼續行，朱皓言卻突然扯咗我一下。趁我有少少失平衡，佢用手輕輕一推，不費吹灰之力就壓咗我埋牆。
「喂你做咩呀？」我嚇咗一跳，但顧忌到不遠處嘅兩個人，我唯有壓低聲線。
「即興演出。」仍然係嗰個懶係正人君子嘅笑容。


聽到呢句說話，我即刻緊緊抿住嘴唇，驚死佢會做啲咩失控嘢。

朱皓言塊面哄近我，稍為側一側個頭，就隔絕咗遠處嗰兩個人嘅視線，由遠處睇，佢哋會以為我哋kiss緊。
雖然冇真係kiss，但我哋都貼得好近，我甚至可以感覺到佢呼吸間吐出嘅溫熱氣息。
一開始，朱皓言嘴角仍然帶住笑。但漸漸咁，佢戲謔嘅表情消失。
佢抬起手，扶住我左邊臉頰，神情專注咁望住我。
被佢觸碰嘅地方頓時變得酥酥麻麻。
「佢⋯⋯佢哋走咗未呀。」我連講嘢都開始窒窒哋。
朱皓言嘅身體擋住我嘅視線，快速咁轉頭又再擰返嚟：「未。」
我想推開佢自己睇下，但又驚嗰兩個人真係仲喺度。

又過咗一陣。
「咁，咁而家呢⋯⋯」我覺得我成個人都好似就嚟被煮熟透嘅蝦一樣。
「未呀。」朱皓言紋絲不動。
再過咗唔知幾耐，我終於推開佢，自己探頭望向嗰兩個人嘅方向，發現嗰個位一早已經冇咗人影。


「朱皓言你玩嘢呀？」我滿臉通紅咁鬧佢。
「冇呀，我見你緊張個樣幾得意咋嘛。」佢攤手，面上係藏唔住嘅笑意