我同離家出走嘅有錢仔合謀扮拍拖: 八

咁樣搞咗一輪，終於返到屋企。
食壽司嘅時候，頭先嘅畫面一直喺我個腦入面揮之不去。
「其實係咪我頭先太過分⋯⋯見你返到嚟就冇乜出聲。」朱皓言嘅聲音響起。
我抬頭，對上佢擔憂嘅眼神，佢睇落好似有啲自責。
「Sorry呀，我下次唔會咁嚇你㗎喇。」佢講。
其實唔係佢嘅問題，係我自己太上心。

頭先喺樓下，佢哄埋嚟嗰一下我就知道自己嘅心跳加速代表乜。
始終同一個異性獨處咁耐，心動係好容易嘅事。尤其係個異性仲要條件唔差。
但我從來都冇諗過要更進一步，因為我知道我哋兩個係唔同世界嘅人。而家佢搬出嚟只係暫時嘅事，終有一日佢會返去佢自己屋企，到時我哋就唔會再有交集。


佢呢啲有錢仔經驗實好豐富，分分鐘頭先嘅事對佢嚟講根本冇乜特別，只係我一個人咁傻為呢啲嘢而心動。

「你都知自己嚇親人呀呢。」我以一種冇佢咁好氣嘅語氣講。佢聽得出我唔係嬲，終於鬆一口氣，又變返嗰個吊兒郎當嘅樣。
「其實我頭先都好緊張㗎，想唔想知點解？」佢問，聽落唔知點解好似有啲認真。
講完呢句之後，佢直情放低埋手上嘅壽司，安靜咁望住我，好似真係等緊我話想知咁。
「唔想喎。」我擰歪面唔再同佢對視。
佢都冇再繼續講，當冇事發生。

但自呢日起，我feel到佢好似刻意想同我拉近距離。
佢已經連續一個星期接我收工，食完飯亦冇即刻寫小說，而係陪我睇片。


「陪」呢個字唔係咁準確，應該話係佢死都要痴埋嚟睇我睇緊嘅片。
「你唔使寫小說咩？」我放低手上嘅電話，嘗試委婉咁趕佢走。
「呢幾日冇靈感呀，咪睇吓其他嘢囉。」佢笑，彷彿聽唔出我嘅意圖。
最後我都係由佢。

我知道自己根本完全唔抗拒佢嘅接近，反而為呢樣嘢而竊喜。
我真係好廢。我勁嫌棄自己。
希望佢屋企人快啲嚟搵我啦。我喺內心默念。
唯有咁樣我先可以令自己盡快抽離。