穿越時空，冒充平行世界嘅另一個自己，再去呃佢條女上床: （40）

「英勇Mike」仍然同嗰隻綠色嘅人形怪物搏鬥緊，且陷入苦戰之中。

佢一邊迴避怪物嘅攻擊，一邊打開對講機：「阿榮、占士，Mike請求你地支援！」

「我呢度都遇到一隻外星人，搞掂之後我立即過嚟支援！」對講機另一邊嘅阿榮回應。

「我呢邊都係呀，暫時都行唔開！」隨後占士都透過對講機回覆。

喺無人前來支援嘅情況下，「英勇Mike」只能孤軍奮戰。





與此同時，Mike返轉頭，瞄到嗰部連住耳機線嘅iPod，就喺遠處五十米嘅地下度。

佢諗都唔諗，即刻衝埋去執起部機。

而佢呢個舉動，吸引左隻怪物嘅注意。

「喂！小心呀！」

眼見怪物撲去攻擊Mike，「英勇Mike」以最快嘅速度衝過去，再近距離使出剛才嘅雷電攻擊：「絕命弒魂閃電！」





雖然呢招個名聽落有啲「中二病」，但卻好奏效。

高壓雷電擊中怪物，令佢彈飛到十幾米咁遠。

Mike已經連續俾對方救左兩次。

「仲留喺度做咩，快啲走…」

講到個「走」字，「英勇Mike」後面就講唔落去，因為突然有一把尖刃從後刺穿佢嘅心臟。





嗰隻怪物嘅鐮刀臂居然可以分裂出嚟！佢喺十多米之外好似投擲迴力標咁，擲出鐮刀臂，從後偷襲。

「英勇Mike」掩住心口，單膝跪落地。

插喺胸嘅尖刃突然抽出，嗰隻喺遠處倒下嘅怪物回收返隻鐮刀臂。

Mike見到啲血巴巴聲流出嚟，極度惶恐驚慌：「你…你…你無嘢呀嘛…」

「英勇Mike」緩緩倒下，吐出鮮血，氣息變得薄弱：「我諗…我唔得啦…」

「你頂住啊，唔好死呀！」Mike剝左自己件衫，試圖幫對方止血。

垂死嘅「英勇Mike」喺褲袋攞出一條：「麻煩…麻煩你幫我交俾…Lulu…呢個親手織俾佢嘅手繩…」

「咳咳—」講到一半，「英勇Mike」再咳出鮮血。佢身上件白色衫同塊面全部都係血。





「你唔好講住啦，你嗰部對講機呢，我立即幫你call救兵。」Mike不停咁摷對方兩邊褲袋。

「你聽我講…」「英勇Mike」將條手繩塞俾Mike：「呢條手繩係我送俾Lulu嘅…生日禮物…唔該你一定要代我送俾佢…同埋幫我講聲…我…我愛…佢…」

「頂住啊！唔好瞇埋眼呀！」Mike拍拍對方塊面，嘗試令另一個自己保持清醒。

「咳咳咳咳—」

「英勇Mike」劇烈咁咳左幾聲，臨斷氣之前，咳到噴左一條白色嘅蟲出嚟。

Mike啱啱講完嘢，個口未合埋，嗰條手指公咁大嘅蟲，一下飛落佢個口。