穿越時空，冒充平行世界嘅另一個自己，再去呃佢條女上床: （127）

部機係從一個時空使者嘅屍體中跌出嚟。

除左銀色外殼之外，上面有個環形轉盤，以及一個細細嘅mon。

佢彎腰執起嚟睇下，一拎上手，部機就發出聲音：「時空裝置，啟動。」

「嗯？時空裝置？」

下一秒，部機發出紅色嘅光，掃描帝洛斯嘅樣。





佢都未反應過嚟，掃描就完成，時光機隨即投射出一個立體畫面。

畫面上有一張佢嘅大頭相，有佢個名「Delaus」，仲有一串英文同數字。

至於其他嘅資料，例如體重、學歷等等全部都係問號。

而令佢覺得最有趣嘅係，當佢轉動個環形轉盤，畫面上嗰張相會變得有啲唔同。

其中一張相嘅自己，頭上嗰隻角竟然係完整無缺。





帝洛斯心諗，呢部叫做時空裝置，會唔會帶佢去到另一個時空？

佢抱住一試無妨嘅心態，㩒一㩒中間粒圓形掣，跟住頭頂出現一個光圈，將佢瞬間吸走。

眨下眼，佢就由一個時空，再轉移到去另一個時空。

當佢回過神，就發現自己身處喺一片有恐龍嘅大草原。

除左恐龍之外，仲有各種野人，同埋另一個帝洛斯。





從外表睇，佢兩個無咩太大分別，只係一個斷左角，另一個隻角就完好無缺。

見到啲恐龍，帝洛斯以為自己返左幾千萬年前。

另一個帝洛斯騎住一隻速龍，同其他恐龍好開心玩緊，突然發現遠處，有一個同自己生得好似樣嘅外星人。

佢即刻騎住條龍，去到對方面前：「你係邊個？點解個樣同我咁相似？」

帝洛斯冷笑一聲：「哈，睇嚟你係另一個時空嘅我，而我就係另一個時空嘅你。」

「另一個時空？我唔明你咩意思。」

帝洛斯懶得答，反問：「喂，不如你話俾我聽，點解你隻角仲喺度？同埋，點解你無殺曬啲恐龍？」

「因為我同佢地係朋友。」





呢一個時空嘅帝洛斯一樣係被流放嚟地球，唔同嘅係，佢選擇留喺地球，同恐龍共存，而並非殺曬死佢地，再返去自己時空報仇。

因此，呢個時空嘅恐龍並無滅絕，佢嘅隻角亦依然安好。

「咩話！係你朋友？我就話你係婦人之仁渣掛！」

另一個帝洛斯感覺到一股不友善嘅氣息：「你究竟係咩人！你想做咩？」

「喺我嘅時空，我揾嚟揾去都揾唔斷左嘅角，不過依家啱啦，你頭上現成就有一隻，不如就將佢送俾我啦！」

帝洛斯露出猙獰嘅面目，湧出一股陰森嘅殺氣。

佢要搶走另一個自己嗰隻角，然後成為最強狀態。