穿越時空，冒充平行世界嘅另一個自己，再去呃佢條女上床: （151）

「輪到我抽咭。」

張醫生一心想抽返兩張好牌，可惜結果卻不盡人意。

佢抽到Mike肚入面條蟲，同埋八爪魚怪嘅觸手。

玄魔蟲嘅數值得100，因為呢個係佢最原始嘅狀態。

喺現實中，帝尼爾嘅元神係同條蟲合為一體，而喺呢隻咭game入面，兩者卻係分開。





照咁樣推斷，帝尼爾應該會有一張單獨嘅角色咭。

張醫生望住兩張牌搖頭歎息，咁嘅牌完全對付唔到對手任何一隻怪物。

「點呀？得嗰兩張牌都要諗咁耐，爽手啲啦！」Card gamer催促。

張醫生都無乜可操作嘅空間，唯有放置玄幻蟲上擂台。

條蟲係就係消滅唔到敵人嘅怪物，但勉強都頂到一下攻擊。





「哈！又輪到我啦！」

Card gamer抽牌：「咦喂，又抽到你個friend喎。」

Mike被召喚上場，並且被配置效果咭「百萬頓大錘」。

Card gamer傳達指令，Mike消滅左魔蟲，隨後另外三隻怪物，就向張醫生直接攻擊。

一個回合之內，張醫生又扣多三格血，得返最後一格生命值。





「哈！睇嚟個game好快玩完，真係無意思！」Card gamer坐定粒六，覺得自己勝券在握。

而事實上，目前情況的確係一面倒，假如下個回合張醫生無法反擊，咁就會即刻game over。

輸左嘅話，Mike佢地就無得恢復原狀，可能從此都要變成一張遊戲咭。

張醫生將所有希望寄託喺，跟住落嚟抽嘅兩張咭。

拎上手一睇，思考左一陣，佢召喚出機械怪人。

機械怪人屬於B+級，能力值有900，再裝備上八爪魚嘅觸手，累計達到1300點。

以呢個數值，係能夠打敗對手場上嘅B+級怪物旋轉陀螺同埋Mike。

然而每個回合，每隻怪物只能攻擊一次，於是張醫生選擇將呢次攻擊，用喺旋轉陀螺身上。





「哈！死左一隻，我仲有三隻，足夠KO你有餘。」Card gamer表現淡定。

「我嘅回合仲未完！」

張醫生喺panel放置一張效果咭：「我要發動『異度空間』，喺接下嚟三個回合之內，你嘅任何攻擊，都唔會對我嘅怪物造成傷害。」

隨即，擂台嘅一邊圍起一道透明透光嘅半圓罩。

「哈！仲喺度垂死掙扎，不過都好，個遊戲又可以玩得耐啲。」

Card gamer笑一笑，跟手抽左兩張咭。

佢發動兩張效果咭，第一張係重新洗牌，第二張係額外抽多兩張牌。





佢嘅手風真係唔錯，抽到烈焰炮同Mike嘅劍雪漩渦，都係兩張攻擊力唔錯嘅效果咭。

只係由於今個回合受制於「異度空間」嘅效果，令所有攻擊無效化，因此Card gamer被逼提早結束自己嘅回合。

此時此刻，仲吊得住條命，張醫生不禁為自己抹一額汗。

輪到佢嘅回合，佢抽中一張功能牌，可以同對方交換三張牌。

當呢張咭一出，雙方就要將手上揸住嘅牌，放返喺咭牌堆中。

之後遊戲系統隨機幫佢地揀三張牌作交換。

交換所得嘅三張牌，會隨即分配到雙方玩家手中。