果然天無絕人之路。

張醫生從對手手上得到帝尼爾、烈焰炮、仲有嚟自魔迪迦嘅幽魔之刃。

相反,Card gamer就換得一張重新洗牌嘅功能咭,仲有兩張低級外星怪物咭。

「我想問,一隻怪物可唔可以,同時裝備兩張效果咭?」張醫生問。

Card gamer點頭回答:「可以。」





「係咁就得啦!咁我要召喚帝尼爾,再發動兩張效果咭。」張醫生一次過喺panel上擺放三張牌。

現實中,真正嘅帝尼爾早就被帝洛斯殺死,得返個元神留喺魔蟲身上。

所以被召喚上場嘅帝尼爾只係一個靈魂形態。

儘管如此,相隔千萬年,連帝尼爾都估唔到,自己可以再一次以展現真面目。

同帝洛斯一樣,佢都係人形獨角獸,身長一丈,眼神銳利,身穿武裝盔甲,威武之中帶點霸氣。





同樣都係靈魂,阿鬼嘅數值得50,帝尼爾則係1800,僅僅比魔迪加低200。

張醫生將烈焰炮同幽魔之刃配置喺帝尼爾身上,令佢嘅數值直衝3800點,比揸住蒼靝之劍嘅魔迪加,高出足足800點。

張醫生首先用帝尼爾消滅魔迪加,再搵機械怪人擊退Mike。

依家Card gamer場上只剩鐵馬騮一隻怪物,成個局勢開始逆轉。

接住嗰兩個回合,Card gamer都抽唔到咩好牌,加上無得攻擊,於是就落於挨打狀態。





張醫生把握機會,接連出擊,先清除對手場上所有怪物,再向對手直接攻擊。

「…帝尼爾、機械怪人、長毛怪,同我攻擊Card gamer!」

三隻怪輪流攻擊,再加上上兩個回合嘅打擊,Card gamer嘅生命值減到得返兩滴血。

「接落嚟我要用呢張效果咭『三角圍陣』,當我方場上有三隻怪物嘅時候,只要發動呢張咭,咁就能夠額外再攻擊敵方一次。」

張醫生嗰三隻怪圍成一個三角陣,共同再發出多一次攻擊。

「頂!竟然俾條友㩒住嚟打。」呢刻Card gamer同張醫生一樣,都係得返一滴血。

形勢逆轉令Card gamer有啲忟憎,佢停一停,冷靜一下先再抽牌。

「我要使用功能牌,禁止你攻擊一個回合,跟住就召喚鐮刀怪。」好在佢抽到張功能牌頂一頂,如果唔係佢呢個回合應該就收得皮。





受到功能牌影響,張醫生無得攻擊,抽完牌就要結束回合。

眼見只係差少少就可以打敗對手,佢依家心情嘅緊張又興奮。

心情緊張嘅當然仲有Card gamer,咁耐以嚟,都無對手可以同佢打得咁激烈。

抽左兩回合嘅爛牌,卒之又再俾佢抽到好牌。

佢抽到惡邪之角(斷),仲有獅子麒麟鳳,兩者嘅攻擊數值分別係1900同1600,效力仲可以維持三個回合。

「我要同時發動兩張效果咭!」Card gamer喺panel上放下兩張牌。

擂台上嘅鐮刀怪,騎上獅子麒麟鳳,頭上多左一隻角,數值更由500急增到4000,足夠打敗3800點嘅帝尼爾。





鐮刀怪迸發出強勁既邪氣,滅殺獨角獸帝尼爾。

鐮刀怪應該發誓都無諗到,身為低級怪物,居然有機會打敗一隻,比自己勁咁多既對手。