穿越時空，冒充平行世界嘅另一個自己，再去呃佢條女上床: （170）

疾風呼呼吹，獅子麒麟鳳穿過雲層從天而降。

手執長劍嘅MIke召喚神獸作戰。

獅子麒麟鳳快速拍對翼，過百過千支羽毛化成密密麻麻嘅尖刺，好似落雨咁向住帝洛斯攻擊。

而帝洛斯卻輕輕鬆鬆，幾下靈活走位就避過左：「又叫隻獅子狗出嚟，比啲新意好無。」

「係咁就試下呢招啦！」Mike跳上神獸背脊，並命令使出「修羅之怒衝」。





「呢招都見識過啦喎。」帝洛斯瞬間爆氣，以強化嘅肉身，直接抵擋神獸嘅猛烈撞擊。

雖然呢一招俾化解，但好戲在後頭。

Mike借住修羅怒衝嘅衝力，爆發出絕招「天誅·破夜斬」。

手中長劍發出奪目光芒，順住強大嗰衝力揮斬敵人。

帝洛斯無預示到呢一招，只不過之前見識呢招嘅威力，今次佢學精左，直接出招抵禦。





「鏘！！！」

當破夜斬遇上魂裂斬，即碰撞出璀璨嘅火花。

好唔好彩，Mike嘅長劍不敵對手嘅雙劍，成把嘢就咁斷開左，咁都不得止，Mike更被暴烈嘅劍氣震開。

佢成個人向後彈開，跌入石屎鋼筋暴露嘅廢墟中，背脊受到重創。

同一時候，啱先俾打到趴低嘅魔迪加、美國鷹同阿鬼，終於陸陸續續起返身。





魔迪加知道自己力量比唔上帝洛斯，於是改變策略，將全身魔氣聚集喺對翼上，借此提升攻擊嘅速度。

「我要你還返對眼俾本大爺！」魔迪加接連出招，速度快到雙眼無法捕捉。

可惜幾快都好，始終都係唔夠帝洛斯咁快。

「眼就無啦，係就俾返啲火你啦！」帝洛斯噴出熊熊嘅火焰，同時間又發射出衝擊波，一下子再次將魔迪加砌到訓低。

「頂…」魔迪加全身傷痕累累，一時間起唔返身。

佢心入面極度不忿，好想打敗對手，無奈卻又力有不逮。

至於帝洛斯覺得魔迪加好鬼煩，決定先出招了結佢，等佢唔好再死纏爛打。

而就喺帝洛斯出手嗰下，遭受到阿鬼同美國鷹嘅夾擊，導致出唔到手。





美國鷹再加強左自己嘅武器，利用融合泡泡槍，將三叉炮、時間靜止天線、仲有力天奴個死人頭融合成一體。

三叉炮唔單止具備埋時間靜止嘅力，依家多左一個力天奴個頭，可以射出由沙幻化成嘅長矛。

「我要打低你幫阿榮報仇！」美國鷹用融合成嘅武器，射出四種唔同類型嘅攻擊。