穿越時空，冒充平行世界嘅另一個自己，再去呃佢條女上床: （171）

腐蝕炮彈、散彈激光、破壞死光以及飛沙長矛，統統追住帝洛斯嚟攻。

帝洛斯左閃右避，知道美國鷹有嗰條天線傍身，因此暫時都唔敢埋身反擊，

除左美國鷹嘅炮轟之外，阿鬼亦都拆開身體所有部分，再配合瞬間轉移嘅能力，針對性咁攻擊敵人。

密集嘅炮擊遠攻，再加上阿鬼嘅圍堵近攻，意外地令帝洛斯不知所措。

「哈！你地好嘢！係都要逼我發威！」





講完呢句，下一秒，帝洛斯頭頂上嘅邪角釋出狂暴之氣，一瞬間震開阿鬼分離嘅手手腳腳之餘，跟手就向美國鷹發射衝擊波。

一進入到美國鷹嘅三米範圍內，衝擊波就靜止唔郁，兼且隨即反彈。

帝洛斯都預左呢一下，佢避開反彈嘅衝擊波，然後趁住天線嗰幾秒緩衝時間，用最快速度突擊對手。

殊不知，就喺佢提步加速嘅呢一剎那，阿鬼睇準時機，將兩隻分離嘅手瞬間移動，分別轉移喺帝洛斯左右兩隻眼前面。

帝洛斯即刻意識到但卻收唔切掣，嗰兩隻手掌上突出嘅尖刃，就咁順勢一嘢插入佢對眼度。





「Ah！！！」

帝洛斯雙眼又痛又睇唔到嘢，嬲到大嗌，而且發左癲咁周圍攻擊。

「居然咁都俾你地陰到！實在可惡！」佢無方向咁胡亂出招，又出波又舞劍，而大部分攻擊都係打唔中目標。

咁嘅情況梗係要乘勝追擊，阿鬼同美國鷹分別扶起Mike同魔迪加，準備合力一齊反擊，結果就忽略左張醫生。

帝洛斯亂射亂打，其中有一下衝擊波，居然咁啱對住張醫生方向射出。





匿喺角落嘅張醫生同佢老婆幫緊子瑜療傷，無為意有道衝擊波射緊埋嚟。

Mike佢地距離太遠，想救都救唔到，只能大聲提醒：「快啲避開啊！」

張醫生擰頭一望，呢個時候先發現自己有危險。

佢反應得太遲，要走已經嚟唔切。

喺最後關頭，張醫生三個老婆竟然挺身而出，踏步上前，用自己嘅身軀抵擋衝擊波。

「砰！！！」

面前一下劇烈嘅爆炸，眨眼間，三個老婆就被衝擊波射爆。

張醫生呆左咁望住眼前散開嘅機械碎片，佢一直以為機械人係無感情，所以佢唔敢相信呢三個老婆，居然會犧牲自己嚟救佢。





喺另一邊廂，帝洛斯對眼開始恢復返少少視力。

阿鬼嘅攻擊雖然中到應，但威力並不足以插盲到對方雙眼。

不過由於受到創傷，帝洛斯嘅視力就只能恢復到原本嘅三成。