穿越時空，冒充平行世界嘅另一個自己，再去呃佢條女上床: （172）

「頂你個肺！居然玩插眼！」帝洛斯嬲到震，視線好似塗左一層灰咁，變得朦朧不清。

下一秒，佢眼前閃現一個黑影。

再下一秒，有一把刀劈落嚟，喺佢身上嘅盔甲上留下一道深深嘅裂痕。

呢個攻擊佢嘅黑影正是魔迪加。

魔迪加無左眼珠，乜嘢都睇唔到，不過憑藉天生敏銳嘅感應能力，就算眼前漆黑一片，佢都能夠揾到敵人嘅位置，並作出準確嘅攻擊。





趁住帝洛斯視力受損，魔迪加起勢揮刀狂劈，除此之外，三個Mike都紛紛出手，圍攻帝洛斯。

Mike咬實牙關，再出一次大技，美國鷹就連番發炮。

阿鬼則重新拼合身體，採用近攻。

佢地四個輪番猛攻，打到帝洛斯訓低。

喺呢次對戰中，帝洛斯係第一次俾對方打到趴低，所以佢極度憤怒同感到侮辱，





「你班仆街！我唔發火就當我病貓！」

帝洛斯無辦法忍受自己受到咁嘅屈辱，即刻起返身，並發出左驚天動地嘅咆哮。

佢雙眼瞪大，綠色嘅眼珠閃出光芒，面目猙獰至極，另外頭頂嘅邪角以至到全身，都散發出前所未有嘅邪氣。

「你地一個二個全部都要死！！！」

「死」字啱講完，帝洛斯揸住雙劍，飛身斬擊魔迪加。





佢嘅速度快到睇唔到，當魔迪加反應過嚟嘅時候，心口已經俾對方斬到爆血。

只係一招，魔迪加就被徹底擊倒。

爆氣暴怒嘅帝洛斯勢不可擋，連時間靜止嘅空間都破解埋。

佢手中雙劍浮光湧動，一招劍流閃擊破美國鷹手上嘅四合一槍炮，再一下十字殺斬斷埋美國鷹隻手。

「啊！！！」美國鷹成隻左手斷左，血如泉湧，痛到仰天大嗌。

Mike騎住獅子麒麟鳳，衝過嚟幫美國鷹解圍。

帝洛斯將邪氣聚集喺雙眼，強制令視線變清，隨即佢飛出手上一把劍，精準咁插中獅頭。

神獸被擊殺墜落，Mike連隨失控急速墮下地面。





「好！輪到你啦！」帝洛斯凌厲嘅眼神轉移到阿鬼身上。

阿鬼撥一撥頭髮，假作鎮定：「你估我怕你呀！」

「呵！」帝洛斯冷笑一聲，左手拎住劍，右手單手射出衝擊波。

阿鬼用盡一切辦法躲避，包括瞬間移動以及分拆身體。

「避？睇你避得去邊！」

帝洛斯再增加攻擊嘅速度，除左射衝擊波之外，又噴射綠色之火，總之就係鋪天蓋地咁針住阿鬼嚟砌。