穿越時空，冒充平行世界嘅另一個自己，再去呃佢條女上床: （173）

阿鬼避無可避，分拆嘅四肢都中曬招，被逼要重新組合返身體。

另一邊廂，從半空墮地嘅Mike受傷相對無咁嚴重，仲企得返起身。

佢唔理咁多，第一時間衝去幫阿鬼。

帝洛斯反應好快，轉身揮刀橫劈Mike嘅膝頭，令對方即時雙膝下跪：「唔好阻頭阻勢，我陣間先收拾你！」

膝頭哥傷左，Mike幾乎等於半殘廢。





至於阿鬼唔想坐以待斃，主動上前還擊。

「呵！仲乜咁急住嚟送死！」帝洛斯揮刀迎擊，殊不知對方一眨眼就消失左。

佢立即擰轉身，早就估到阿鬼想從後偷襲：「又想出陰招？」

阿鬼左手照樣正面攻擊，與此同時，分離嘅右手出現喺帝洛斯後尾枕。

連續兩下聲東擊西，以為咁就搞得掂，無諗到帝洛斯一下側頭就避開。





結果偷襲唔成，嗰隻右手反過嚟插中阿鬼塊面。

「講真，你其實有啲似我，一樣係咁鐘意出陰招，可惜就係俾我睇穿左！」

帝洛斯露出勝利者嘅笑容，雙手揸住劍，垂直劃出一道弧線。

下一秒，阿鬼嘅身體一分為二。

「阿鬼！！！」膝頭受傷嘅Mike企唔返起身，只能動用上半身嘅力量，好勉強咁揮劍捲起冰雪風暴，向帝洛斯攻擊。





出完招，帝洛斯就快速退後迴避。

同時間，阿鬼嘅靈魂從破敗嘅機械人身體之中抽離，並且升上半空。

「點解會咁架？死左嘅靈魂點解會消失架？」Mike見到阿鬼靈魂正逐漸消失。

「頭先我用嗰招叫做『魂裂斬』，顧名思義就係可以直接消滅靈魂。」帝洛斯個樣好得戚。

阿鬼望住自己消失中嘅靈魂，苦澀一笑：「哈，依家先死都算係賺左架啦。」

跟住佢習慣性想撥一撥頭髮，發現手掌已經無左。

斷左手嘅美國鷹，跪喺地下嘅Mike、仲有匿喺角落嘅張醫生，三個人都無能為力，只能眼白白睇住另一個自己消失。

「係啦，一開始我穿越時空，本來係想搞一個超時空換妻計劃，點知搞唔成不得止，仲嚟到呢個時空同你地一齊打外星人。」





「如果你地三個大難不死，離開到呢個時空嘅話，不妨就代我完成呢個計劃...」

講出心中嘅遺願後，阿鬼嘅靈魂就徹底消失喺呢個世界。