穿越時空，冒充平行世界嘅另一個自己，再去呃佢條女上床: （174）

一齊並肩作戰嘅同伴，一瞬間化成虛無。

與此同時，魔迪加同美國鷹失去戰鬥力，倒臥喺自己身邊，仲有遠處嘅愛人依然昏迷不醒。

Mike雙腳跪地，呆呆咁面對當下絕望嘅環境，內心感到無比哀傷及無助。

「輪到你啦！」帝洛斯好似風一樣，飛身突擊叉住Mike條頸。

「力量…我需要力量…」





Mike內心不斷呼喚，結果卒之喚醒左潛伏喺體內嘅帝尼爾。

下一秒，佢全身散發出劇烈嘅邪氣，掛喺美國鷹腰間嘅斷角瞬間轉移到佢手中。

「哈！死老嘢！乜你終於肯蒲頭啦咩？」帝洛斯望住Mike笑一笑。

「帝洛斯，好耐無見！」帝尼爾借Mike把口講。

呢刻Mike嘅頭髮豎起曬，受傷嘅雙腳亦都可以企得返起身。





「原來你條友真係未死！」帝洛斯雙眼一瞪，狠狠咁用力叉住對方條頸，「今次我要徹底殺死你！」

「唔洗旨意！」帝尼爾用邪氣震開帝洛斯隻手，然後揸住斷角連續直刺對手。

帝洛斯出劍擋隔，跟手兩下揮擊就打走對方手上嘅斷角。

不過帝尼爾係識得用氣嚟控制隻角，當斷角一脫手，就即刻順勢兜個圈，繞去後面攻擊帝洛斯。

「受死啦帝洛斯！」Mike仍然保留住自己嘅意識。





斷角速度好快，只不過帝洛斯嘅速度更快，一下子就避開左。

帝尼爾以氣馭角，隻斷角就好似一支識飛嘅箭，追住敵人嚟攻擊。

「你地以為咁就對付到我？」帝洛斯輕鬆閃避，一揾到機會就使出各種劍招。

雖然邪氣能夠抵擋攻擊，但邪氣本身卻又會侵蝕Mike嘅肉身。

只係過左短短五分鐘，Mike就已經頂唔順，個鼻開始流血。

「人類嘅身體始終太脆弱，再咁落去，未俾帝洛斯打死，邪氣都會殺死你。」帝尼爾對Mike講。

「我唔理！無論點我都要打敗佢！」 Mike身上嘅邪氣完全包圍住佢，好似就嚟要將佢吞噬。

Mike 死忍死頂，借從邪氣中獲得力量，佢使出秘笈所得嘅招數。





「爆裂旋風！！！」Mike指住敵人，手指捲起勁力旋風。

喺邪氣加持下，旋風嘅威力比之前犀利左好多倍。

帝洛斯快速橫移避開，隨即Mike再召喚出閃電同白色太陽槍。

密集而強勢嘅攻擊，唔單止令敵人無法接近，而且有幾下準確命中。

只但係，Mike嘅身體已經捱唔住，啲鼻血不停咁湧出嚟。

而佢自己都知道自己嘅身體頂唔到好耐，要打敗敵人睇嚟得返一個辦法。

佢抹走啲鼻血，一邊開槍射出火焰彈，一邊大聲呼喚美國鷹：「用你支槍，將我同魔迪加，仲有斷角一齊融合！」





「下！？」身負重傷嘅美國鷹精神為之一振，估唔到Mike會諗到呢一招。

「快呀！」Mike啲手手腳腳開始皮破血流。

斷左一隻手嘅美國鷹拎起融合泡泡槍，瞄準趴喺地下且奄奄一息嘅魔迪加、被邪氣包圍嘅Mike、仲有漂浮半空嘅斷角，之後掹雞射出三個泡泡。

帝洛斯想出手阻止，但Mike不停攻擊佢，令佢無法接近。

最後，三個泡泡包住Mike、魔迪加同埋斷角，跟住一齊飄上半空並三合為一，變成左一個大泡泡。

下一個瞬間，泡泡「啪」一聲爆開。

三位一體嘅融合體誕生，Mike以一個全新嘅姿態展現於敵人面前。

佢頭頂多左一隻斷角，背脊生出一對惡魔之翼，另外仲有一身銀色嘅盔甲，心口掛住一盞藍色嘅菱形燈。





佢身上同時散發出兩種氣息，分別係銀白色嘅邪氣以及漆黑嘅魔氣。

「帝洛斯！我要打敗你！」Mike一開口，就有三把聲重疊。

無論係佢、魔迪加定係帝尼爾，目標都只有一個。

就係打低帝洛斯！