Mike喺手上召喚蒼靝之劍,同時魔迪加嘅幽魔之刃從天而降。

佢左手揸劍,右手揸刀,雙翼輕輕一拍,瞬間飛身攻擊帝洛斯。

「鏘!」二人刀劍交鋒。

「哈!你地融合成一體咁就啱曬,等我可以一次過收拾曬你地三個!」

「錯啦!係我地三個收拾你一個至啱!」Mike大聲反駁帝洛斯,然後擊出「冥殺斬」。





合成一體之後,魔迪加、帝尼爾同Mike三個嘅所有招式,都可以一齊使用,而且殺傷力仲有幾何級別嘅提升。

因為魔迪加嘅惡魔氣息同帝尼爾嘅邪氣,兩者結合且相輔相成,發揮出前所未有嘅威力。

喺呢種威力加乘下,Mike使出嘅每一招、每一劍都鏗鏘有力,極具破壞性。

手中利劍與長刀急速舞動,逼到帝洛斯節節後退,身上件盔甲被斬到又碎又裂。

「六芒星結印!」帝洛斯想用六芒星陣,限制對手嘅移動。





點不知對手速度實在太快,快到連結印都捕捉唔到。

而本來正面猛攻嘅Mike,突然間手腕一轉,手中嘅幽魔之刃由側面劈中敵人嘅腰間。

帝洛斯掩住傷口,連退三四步,跟手Mike揮劍捲起「劍雪漩渦」。

極寒冰雪朝住帝洛斯撲面而嚟,一眨眼嘅時間,帝洛斯全身就被冰封。

Mike飛上半空,高高舉起刀與劍。





暗黑嘅幽魔之刃散發黑色嘅光,蒼寒嘅長劍則閃出耀目光芒。

「受死啦帝洛斯!」Mike同時間擊出魔迪加嘅「冥殺斬」,仲有自己嘅絕招「天誅·破夜斬」。

帝洛斯費盡力氣破除冰封,但Mike已經殺到面前,佢想避都避唔切,只能交叉兩劍阻擋。

「鏘!!!」

Mike由高空劈落嚟,直接斬爆對手兩把劍,再垂直劈落去個身度。

「啊!!!」帝洛斯全身嘅盔甲爆裂,心口被劈出兩條深深嘅刀劍痕。

Mike得勢不饒人,接連繼續劈斬,帝洛斯忍痛射出綠色火焰同衝擊波,勉強令到對手退後閃避。

「可惡!!!」帝洛斯受到重創,暫時仲頂得住。





不過入錯佢再中左次對手嘅絕招,咁就一定無命。

而作為一個身經百戰嘅強人,帝洛斯當然唔會就此認輸。

佢嘅身體分裂出兩個矮仔外星人。

「又想玩偷襲?你唔係想同一招用兩次下話?」魔迪加試過俾啲矮仔外星人偷襲,所以提醒Mike同帝尼爾要小心。

帝洛斯無出聲回應,突然間,佢用拳頭自己打自己個肚。

雖然唔知對手搞邊科,但Mike只想速戰速決,盡快解決敵人。因此飛身繼續作出各種攻擊。

至於帝洛斯無還手,只係不停咁閃避、閃避同閃避,同時繼續佢打左自己個肚。





卒之打左十幾拳之後,佢嘔返嗰一部時間倒流儀出嚟。

「啊!」呢個時候,美國鷹突然大嗌。

佢俾嗰個矮仔外星人搶走左支融合槍,另一個矮仔外星人就喺力天奴條屍度,攞走嗰副厚裝甲。

見到敵人咁嘅舉動,Mike佢地三個先知道自己慢左半拍,想阻止已經太遲。

嗰個矮仔外星人噴出三個泡泡。

第一個射去帝洛斯身上,第二個射中佢手上嘅時間倒流鐘,第三個就飄去嗰副力天奴嘅厚裝甲。

三者融合成一體,呢刻嘅帝洛斯重新換上裝甲,除此之外,喺小腹位置有一個圓圈同一條紅色指針。

佢同時間倒流鐘結合,得到隨意令時間倒流嘅力量。





喺佢操控下,呢股力量可以單獨運用喺自己或者對手身上,而又唔會影響到整個時空嘅時間。

而且倒流多幾秒幾多分鐘都係由佢控制。

為左展示自己嘅能力,帝洛斯自己拗斷自己隻手,跟住小腹上指針轉一圈,拗斷嘅手自動駁返好,立即變回原形。

Mike佢地見到敵人再進化,知道形勢又起左變化,但都已經嚟到呢一刻,無論點都要分出個勝負。