雞仔聲表姐（全篇完）: 結婚了
（18）結婚了
媽媽話俾啲時間老豆，Chloe唯有等…
要等嘅除咗老豆之外，仲有Johnny嘅經濟。
响哩段期間，兩個仍然唔敢出街拖手…
因為驚住親戚見到，到時同返Chloe爸爸講，咁就更加激起佢…
所以要偷偷摸摸。
Chloe好唔開心…
Johnny見到佢扁嘴，講：「唔好唔開心喇，我嚟緊應該會升職，到時收入多咗就可以結婚。」
「好喔。」Chloe仍然唔開心…
點解同Johnny拍拖，要好似做賊咁？
偷偷摸摸…
爸爸又唔認我…
Chloe諗到好唔開心，抬頭望向Johnny。Johnny都望向Chloe，講：「Love you。」然後錫咗一啖。
Chloe嗒嗒嘴唇…
嗒嗒Johnny殘留口水味道…
知道自從當日唱嘅唔係好心分手，而係失樂園。
Chloe再望向Johnny，講：「我係咪有咩嘢你都會幫我頂？」
「係呀。」Johnny講：「我會幫妳頂哂。」
Chloe聽到就垂低頭，心入面瞇成一線…
攬緊佢隻手…
甘心去失樂園。
數年後Johnny升咗職，經濟都有番咁上下。佢買咗紥花、介指，响Chloe公司樓下等佢。
當Chloe收工同埋佢啲同事落嚟時，Chloe見到佢攞住一紥花，覺得好意外。
「你做咩…」
「蘇雅兒，我知道我條件唔出衆…」Johnny跪咗响度，Chloe講：「唉呀，好多人望住呀…」
「我…」Johnny窒一窒：「旁人在，淡出終於只有你共我一起…」
「哈哈，你又唱歌！」
「仍然自問幸福雖說有陣時為你生氣…」唱到哩度，Chloe笑住搣Johnny：「你生氣？」
「直到共你渡過多災世紀…」搣住仲繼續唱，Chloe講：「你想唱到幾時呀？」
「即使身邊世事再毫無道理，與你永遠亦連在一起…」Johnny唱到哩句，令Chloe諗起而家處境…
「你不放下我，我不放下你，我想確定每日挽著同樣的手臂。」Chloe開始眼濕濕。
「證明愛人又愛己，何以要那麼悲壯才合理。」唱到哩度，Chloe直頭喊出嚟。
「見盡了雲湧風起，還怎麼捨得放下你。」Johnny抹抹Chloe眼淚，再唱：「我們 仍珍惜這啖氣。」
「唔好喊喇。」
「你係咁唱…」Chloe輕打Johnny：「整喊人哋…」
「嫁俾我吖。」Johnny攞起紥花，同埋攞出介指：「我會照顧妳，永遠愛錫妳。」
Chloe望住Johnny，兩行眼淚流哂落嚟。
Sandy响度大叫：「嫁俾佢喇！」
Sandy一叫，其他人跟住叫：「嫁俾佢喇！！」
「嫁喇！！」
Chloe見到全場大叫，佢忍唔住笑笑：「你搞到咁尷尬…」
「咁妳嫁俾我…」Johnny講：「咪唔尷尬囉。」
Chloe望住Johnny，Johnny情深款款咁回望…
對望一陣，Chloe點點頭…
「我願意。」然後遞起隻手。
「恭喜！！」
「正呀！！」
「恭喜哂！！」
全場讚美加掌聲，Johnny好開心將介指套入Chloe手中，然後攬住佢kiss…
响衆多人圍觀下同Chloe打茄輪…
無避忌咁去做。
Johnny求婚成功，好開心返去同屋企人講：「雅兒答應嫁俾我呀！」
「真係呀！」媽媽講完，Chloe點點頭。
「咁就好囉。」爸爸講：「老六果面呢？」
媽媽講：「我同佢哋講，睇吓佢哋咩反應先。」
媽媽肯做先頭部隊，Chloe誠惶誠恐咁靜待結果。
「蘇太，係天華媽媽呀，我有啲嘢想…」媽媽同Chloe媽媽傾，傾咗一陣之後收線。
「我同咗妳媽媽講。」
Chloe張開耳仔去聽。
「初步都無乜嘢，不過想妳哋聽日返屋企講。」
又要上去？
Johnny對於要上去唔係咁想，Chloe就望住Johnny想佢決定。
「好，為咗娶雅兒。」Johnny講：「聽日去喇！！」
翌日，Johnny同Chloe返到去屋企，一入到去老六、媽媽同文進都响度。
「爸爸、媽媽。」Chloe向爸媽問好。
「姑丈、姑姐。」Johnny一講，老六就講：「知道我係姑丈咩！！」
「老豆吖。」媽媽拍拍老六，跟住同Chloe講：「妳哋諗住結婚？」
「係。」Chloe答。
「都唔知合唔合法！！」老六講。
「合法嫁，姑…」講到個姑字就停口，老六再講：「出封律師信嚟睇吓係咪合法吖！！」
「結婚要出律師信俾呀爸？」Chloe忍唔住出聲，媽媽見到咁就講：「唏，老豆都係擔心啫。到時註冊，如果唔得嘅都唔俾註冊喇。」
「係咪呀老豆。」媽媽拍拍老六，老六講：「妳係咪真係要嫁俾佢？」
「係。」
「咪同親戚講呀！！」老六行入房：「失禮死人！！」
自己結婚唔可以同親戚講…
失禮死人？
Chloe聽到又眼眶一濕，媽媽就輕拍Chloe膊頭：「妳知佢個格喇，佢咁講都算讓步…」
Chloe望住媽媽，媽媽講：「唔好怪佢。」
唔好怪佢…
媽媽出到聲，Chloe又點頭應承。
到結婚日，兩家人只係請朋友嚟。Sandy做伴娘、奀仔做伴郎。
「估唔到你真係娶到靚女喎。」奀仔講。
「一早同你講喇，有無買到先？」
「無呀，買咗分手…」奀仔一講，Johnny就打佢：「死仔！咒我！！」
「講笑，講笑。」
佢哋嬉戲，Sandy就同Chloe執執個身：「大個女喇，嫁人喇。」
「幾時到妳呀？」
「我？我唔嫁喎。」
「因為我嫁咗，妳就梳起唔嫁？」Chloe笑佢，Sandy講：「妳知喇嘛，不如唔好結喇。」
「衰婆，妳同奀仔一擔擔。」Chloe講：「妳哋咁夾，拍拖吖？」
奀仔聽到就好開心：「好喔，好喔！」
「好你條命！」Sandy講：「我係外貌協會榮譽會員！」
Sandy一講外貌協會，Johnny同Sandy會心微笑。
擾攘一輪，男家親人一早到咗，女家就未到…
Chloe見到咁，好唔開心…
唔通老豆唔嚟，就叫媽媽細佬都唔嚟？
Chloe憂心一番，過多陣見到一家大細到咗。
「姑…」Johnny想叫姑丈時收口，媽媽講：「叫外父喇。」
「閘住，咩外父呀！！」老六講：「簽紙先喇！！」
老六咁講即係接受佢哋，Chloe聽到都回復笑容。
「咁遲呀？」Johnny爸爸同老六講，老六答：「頭先知道邊家成日呻吟，鬧鬼佢咪遲咗囉！！」
邊家呻吟？
Johnny、Chloe聽到忍住唔好笑出聲。
律師嚟到，進行簽紙儀式。
「麥天華，你是否…」
Johnny同Chloe分別宣誓，雙方家長簽名，幫對方戴介指後Johnny揭開Chloe面莎：「我終於同妳結婚喇。」
Chloe瞇成一線…
Johnny响衆人目擊下，光明正大咁錫Chloe…
同佢接吻。
一陣後，老六行埋佢哋面前講：「結咗婚住邊？」
「暫時返屋企住。」
「你無買樓呀？」
「我儲緊錢…」
「等你儲得嚟蚊瞓喇！！」老六講：「去我屯門個單位喇！！」
「唔駛喇，我…」Johnny一講，老六插嘴：「唔咩洗呀，層樓我俾個女嫁！！」
老六同Chloe講：「層樓落妳名，妳千祈唔好轉佢名呀！！」
「知道。」爸爸俾單位佢，証明真係錫佢。Chloe攬住爸爸：「多謝爸爸。」
Chloe一攬，原本惡死嘅樣都變得慈祥，掃掃Chloe個頭：「傻女。」
Chloe同佢爸爸和好如初，Johnny拖拖佢手，兩公婆去享受喜悅。
（18）結婚了---完