因為EX 我成為左一個禿頭嘅毒撚 然後遇到一隻猫: 3. 貓仙人

或者個天唔想就咁放過我，係強光照射下，我可以從湖面嘅倒影清晰見到自己近乎反光嘅頭頂再加身上一條38吋嘅車軚，然後我再次意識到自己嘅青春真係已經一去不復返… 諗起以前又瘦又靚仔嘅自己同衣家自己嘅落差，我開始後悔點解我以前要白白浪費左自己最黃金嘅十幾年青春…
 
如果果陣我無為Grace傷心同頹廢左咁耐，早十幾年開始識其他女仔或者玩衣d交友app，我相信憑我當年嘅外表，一定可以識到唔少女仔，然後談返幾段轟轟烈烈嘅愛情。我嘅得著同經歷，一定唔會比衣家嘅Byran少。可惜光陰一去不復返，有d野後悔已經太遲… 就好似頭髮咁，無左就係無左，坊間果d咩生髮水，刺激頭皮療程，全部都係呃人…
 
(不如綁舊石頭跳落去一了百了，快快趣趣投胎等下一世再黎過算啦? 要有返濃密頭髮同青春，都係要下一世先有可能架喇… 如果 有下一世，我一定唔會再比自己因為其他女人而傷心頹廢，耽誤自己嘅人生！)

一時諗唔開，我確實有左輕生嘅念頭。不過正當我綁好大石諗住跳果陣，阿敏嘅包包面又突然出現左係我腦海中，然後我遲疑...

(如果我咁走左，阿敏會傷心架...)



得到衣下緩衝，我已經冷靜左落黎唔打算再輕生。不過正當我諗住拎轉面走果陣，突然見到湖面較遠嘅位置出現左個黑點，然後圍繞住佢開始泛起左一個又一個嘅浪花。拎起個手機zoom近一睇，我發現個黑點原來係一隻遇溺嘅黑貓。

見佢不斷掙扎，好似就快唔得咁，我無多諗放低左d貴重野係岸邊後就跳左落湖將佢救左返岸邊。
 
「貓仔，做咩咁睇唔開呀?你又好似我咁想死然後重新黎過?」我抱住岩岩救返黎仍然成身濕晒滴緊水嘅貓仔問道。
 
雖然我都成身濕晒，但衣刻我嘅心情竟然反而唔錯。或者係因為覺得自己一直虛渡緊光陰嘅人生終於可以因為岩岩救返個生命而變得稍為有意義?
 
「蟻民，唔好拎我黎同你比！我只係見湖入面有條魚好似幾好食想捉佢嘅時候唔小心跌左落湖！」
 


突然一把聲音從我耳邊響起。
 
聽到這聲音我不禁左望右望，但發現方圓四周更本完全無人。
 
(唔通我幻聽?)
 
「唔駛再周圍望喇，係我，即係你前面隻黑貓同你講緊野。」點知好快衣把聲音又再響起。
 
「你...識講人話?」望住隻貓，我不敢相信自己嘅耳朵。
 


「唔駛咁驚，嚴格黎講我唔係你所認知嘅黑貓，而係已經係衣個世界活左幾千年嘅貓仙人~」黑貓一臉自豪說道。
 
「貓仙人? 龍珠? 咁你有無可以令人起死回生嘅仙豆?」十幾年嘅動漫本能令我立刻問佢。然後我又好無聊咁諗仙豆可以令人傷勢復原，唔知可唔可以同時間令頭髮復完? 不過再諗起比達個M字額同無限個光頭，我諗多數都係唔得。咦，唔係喎，無限最後唔係真係生返d頭髮出黎咩?
 
「愚昧！竟然搵漫畫入面嘅人物同我比? 仙豆我就無喇，不過我有比佢更強大嘅能力！」貓仙人嬲嬲地又帶點不屑咁講。
 
「係咩能力?」我好奇問道。
 
「我嘅能力就係...咪住，點解我要講你聽?」貓仙人講到一半又唔講。
 
「因為你係至威嘅貓仙人，咪當比我學下野，等我知你有幾偉大嘛~」憑岩岩果兩句我已經大概捉摸到衣位貓仙人嘅脾性於是順住講。
 
「嗯，又幾岩聽，唔知我嘅偉大你都唔識尊重我。」果然貓仙人即刻面露滿意嘅表情。
 
「係囉係囉~」我順住佢嘅方向繼續講。


 
「不過講之前，我頭先感受到你好似想尋死喎，為咩呢?」不過正當佢諗住講果陣又突然問道。
 
「因為我好後悔自己為左個變心嘅女人浪費左自己最黃金嘅十年青春，同時間仲攪到自己變左個又廢又醜嘅毒男，咩女都唔會再溝到...」於是我將心入面嘅鬱結講左佢聽。
 
貓仙人聽完後合埋左雙眼，好似係度苦苦思索咁，然後過左陣佢又打返開眼講
 
「原來係咁，岩岩我已經了解左你發生嘅事...」
 
「咁犀利?」我有D驚訝。
 
「神本身就咩都可以知架啦。」貓仙人好淡然咁講。
 
「咁你咁講又好似好有道理...」我心諗如果貓仙人真係神嘅一種，咁聽落係幾有道理。
 


「不過其實我比咩都知嘅神更犀利！」點知貓仙人突然又語出驚人。
 
「點解咁講?」我”一臉崇拜”咁問。
 
「你有無聽過咩係平行時空?」貓仙人又突然轉左一副高深莫測嘅樣子。
 
「即係衣個世界有好多因為人唔同決定而形成嘅其他時空?」我將我所認知嘅講左出黎。
 
「無錯，估唔到你都識d野呀下。人類每一個決定都可以做成唔同嘅後果，亦因而生成左唔同嘅世界。例如你細個如果勤力d讀書，可能就會做左醫生，然後同今日嘅你就會完全唔同。」貓仙人望住我露出個愚子可教嘅表情。
 
我:「我明，但咁同你有咩關係?」
 
「梗係有啦，因為我除左可以知道衣個世界所有嘅野，我仲可以知道埋其他平行時空嘅所有野。好似岩岩咁，係我合埋眼果陣其實我已經睇晒所有屬於你嘅65536個唔同嘅時空。」貓仙人自信地解釋道。
 
「咁把炮?」佢講能能力確實令我忍唔住不得不讚嘆一聲。


 
「未算，除左衣樣，我最勁嘅係除左自己，我仲可以帶埋其他人穿梭於唔同嘅平行時空。」貓仙人聽到我讚佢，越黎越得戚咁繼續講。
 
「咁...唔知你可唔可以帶我去其他嘅時空?我諗應該無一個會好似衣個世界嘅我咁廢咁失敗?」聽完佢講我即刻提出我嘅請求。
 
貓仙人:「後生仔，有d野未到最後你都未必知道咩先叫最好架。不過見你岩岩救左我，又睇唔開想輕生，我都唔介意比你睇下其他世界嘅自己係點嘅，話唔定睇完你會有新嘅領悟。」
 
「好呀！」聽到佢答應我興奮應道。
 
貓仙人:「不過神嘅時間係好寶貴，我無可能同你去晒咁多個時空，或者你話我聽你衣家最後悔嘅事係咩?」
 
「我最後悔係為左我個初戀女朋友浪費左十年青春，錯過左人生最黃金嘅十年，無得玩，無得試下同唔同嘅女仔一齊，仲要變埋做一個禿頭嘅肥佬，無女人鍾意！」我立刻說道。
 
貓仙人:「初戀，頹廢，愛情，外表... 明白，咁我就揀幾個相關嘅時空同你一齊去遊歷下啦。事不宜遲，我即刻帶你去第一個時空。」
 


「好！」我興奮大叫一聲。
 
貓仙人:「咁你合埋眼一齊同我念咒語先。」
 
「咩咒語?」我窒左一窒然後好奇咁問。
 
「貓仙人醒，貓仙人勁，貓仙人無得頂，喵喵喵chance~」貓仙人一臉興奮咁唸道，仲手舞足蹈咁跳埋舞去配合。
 
「...」
 
「唔唸我就唔等你喇…」見我呆左無反應又有d嫌棄咁嘅樣貓仙人即刻嬲嬲地講道。
 
「唔好唔好，我唸我唸... 貓仙人醒，貓仙人勁，貓仙人無得頂，喵喵喵chance~」我只好非常尷尬咁跟住佢一邊唸一邊跳。
 
霎時間一陣強光出現令我不得不合上眼睛，不過雖然合埋左眼但我仍然可以感受到衣陣強光只係一閃即逝。而當我感到四周回復黑暗再打開眼睛時，我見到年輕時嘅我正係班房執拾書包準備放學。不得不說，果陣嘅我仲有濃密嘅頭髮，身型高大又健碩，其實真係一d都唔失禮，難怪當時嘅我仲被選為係學校嘅校草之一。