611

「因為散播恐怖,喺我個奇蹟裏面,係一個好重要嘅部份……我諗今晚由後欄起火開始,全世界仲收到衛星嘅,都睇緊呢度發生緊咩事!」

「睇住一點希望之光,點樣突然熄滅,變成絕望!」

「咁我個黃大仙奇蹟,咪升呢咗做世界性奇蹟囉!呢啲咪Kong U仔嘅國際視野囉!明唔明啊?浸中仔!」

施永義搖哂頭。





「點啊小朋友,你仲係成身震哂咁喎,好驚啊?」

「我……唔明,」

我不斷搖頭,「我真係唔明……即係話,你早就Plan好哂喺今晚做嘢?就算有冇喺女校遇到阿詠,你今晚都會入嚟捉佢……綁佢上個十字架度?」

「或者啦。」

施永義聳聳肩,「如果詠詠唔係升呢升得咁快,或者唔係咁多管閒事,我隨便綁條女上十字架,個畫面效果都差唔多。」





「邊個叫佢一晚就升兩呢,好似趕住要造就我咁!」

「咁我點可以辜負詠詠嘅期望啊?」

我仲未諗得明……

阿詠點樣可以令施永義呢個變態奇蹟升級?捉詠詠上個十字架獻祭,比對起捉其他人,點解係對世人更大嘅恐怖?

我突然間諗通咗!





「部無人機……亦影到阿詠對班老人家所行嘅奇蹟!」

不管個奇蹟前提係咪只係對老人癡呆病者有效,剩係啲老人家行出去冇再俾喪屍襲擊,個效果已經極度鼓舞!

呢個絕對係奇蹟嚟!

所以,如果將阿詠呢個『聖母』釘死喺十字架上,就會令世人跌落更深一層嘅絕望!

喺呢一刻,我終於確認到施永義嘅企圖。

佢係要阿詠死!

唔係要搞啲咩超自然或宗教嘢,成件事就係咁簡單:殺死一個有可能帶嚟希望嘅女仔。

唔知點解,確認咗呢件事之後,我個人反而冷靜咗落嚟。





眼前呢個戴金絲眼鏡嘅男人……

喺我眼中,已經唔再神秘。

「繼續問啊!」

施永義話,「佢哋應該收緊音㗎!最好講英文添!不過唔好勉強你啲浸中仔啦,照講香港話啦……」

我有一個理由,需要依住佢劇本走。

所以我問佢:

「所以,你每日就係不斷來回嗰幾個飛索點,斬好打包哂啲人,然後運落個屍山度堆疊……就係咁樣由冇到有,引咗條屍河出嚟?」





「我真係諗唔明,成件事就喺隔離發生,大台一直無人發現你做緊啲咁嘅嘢咩?」

「你話喺醫院其他位置,視線俾其他嘢遮住咗都算,但只要企上呢個天台,咩都睇到哂啦?」

「同埋成幾Pair飛索咁多,啲嘢一袋袋咁運嚟運去,點瞞住啲Team Leader?」

施永義好似好期待我問呢啲問題咁。

「其實唔難,」

施永義扮哂謙虛咁話,「不過要俾耐性囉,好似打包餵食呢啲嘢,梗係趁深夜先嚟做!打包時塞實啲人個嘴,唔好俾佢哋嗌到出聲,甚至手手腳腳都唔要喇,剩係送條人棍過去,又唔可以俾佢哋斷氣喎!不過只要送到過去,夜晚啲喪屍特別癲,食幾分鐘,渣都冇剩。」

「至於啲飛索,其實呢個街壘,本來就係整嚟做嗰個『孤城計劃』嘅,同另一邊鳳德街市嗰個一樣,原意係防止外邊啲喪屍侵入。所以呢個官方Project,甚至初期大家都有份用力搞,個街壘嘅基底先做得咁扎實……」

「至於後來,發現慈雲山孤城原來行唔通,新界啲喪屍可以越過獅子山走過嚟,仲唔知點解出現咗條屍河,哦,原來係人流、唔係,屍流管理失敗,咁大佬我哋全部醫生護士嚟,邊識做呢啲嘢啊?咁咪當係集體責任,唔怪得任何人,但條河已經成咗形,冇得挽救,只能任由佢繼續落去……」





即係話,成個大台啲人,最初係俾施永義昆咗,冇人預見到個孤城策略,最終係會變成而家咁嘅局面。

「咁講到話,大台啲人冇理由咁耐都發現唔到……」

施永義賣住關子咁話,「點解你會覺得佢哋唔知?」

「咩話?」

我簡直唔敢相信自己耳朵,「你係話……聖母啲人,係縱容你咁做?」

「其實唔需要好多人知情,」

施永義話,「只要有一個Team Leader,覺得以犧牲少數冇用嘅人嚟完成呢個『孤城』計劃係值得,肯隻眼開隻眼閉,就可以為我製造出好多空檔……」





「個Team Leader搵兩隻信得過嘅馬仔,主動提出要晚晚守夜,仲要肯守呢個屍臭味最勁嘅天台位……而其他人根本連心態都未預備好,叫佢哋平日望多條屍河兩眼都驚,要喺佢哋眼皮底下做嘢,真係唔係好難。」

「咁去到後來,個Team Leader發現上咗當,但係佢做幫凶已經成手鮮血,件事一爆出嚟,佢自己都冇得喺度立足,咪只有夾硬瞞落去囉……」

弊傢伙……

我本來特登嬲佢講嘢,係想爭取時間俾醫院其他人撤退,撤到由黃狗發現嗰個逃生位……

但係聽施永義咁講……

話唔定,黃狗就係嗰個幫佢嘅Team Leader!雖然佢意圖未必同施永義一樣,但係驟然之間,我對呢個人嘅信賴度有所降低……

將聖母班人條命交俾佢負責,冇問題嗎?

「所以,你拖夠時間未?」

施永義突然咁講,我個心重重突咗突。

咁都俾佢睇穿?

「都講咗幾分鐘啦,」

佢攤大手,「你望咗好耐嘅幫手,對唔住,冇人上緊嚟喎。」

原來佢以為我喺度等緊援兵……

「呢度仲死剩啲咩人,佢哋有幾打得,我好清楚,」

佢話,「所以我根本未驚過,最好佢哋全部上哂嚟,一網打盡……所以,得返你咋喎,浸中仔?」

「捨得死未?」
已有 0 人追稿