612

「我想問多最後一個問題,」

我話,「我唔知隻無人機係邊度派嚟,但係你呃咗佢嚟之後就揭開真面目,等於呃哂全世界……你唔怕佢哋阻止你咩?」

「點阻止啊?」

施永義笑住話,「射巡航導彈定扔核彈過嚟啊?所以我咪拎你同詠詠做人質囉!唉,我知你跟住想講咩,派直升機出狙擊手吖嘛?你點解唔諗吓,出咗事成兩個禮拜,你有冇見過任何外來嘅救災行動?」





「驚侵犯別國領土,咁打紅十字會招牌,派幾架補給機,扔啲糧水、藥物過嚟都好吖?揸架噴農藥嗰啲小型飛機嚟,地氈式狂噴,仲正!有冇吖?我唔覺喎……」

「我唔知係咩原因。」

「我只係知道,如想真係有人想救,或者有能力救我哋,應該早就出咗手派咗兵……任何災難都有救人嘅『黃金72小時』,而家?720小時都就嚟過!仲有人咁得閒派無人機過嚟,我已經喜出望外啦!」

「滿足完你啲好奇心未?」

「咁你而家亦都知道,對住架無人機求救,都係冇用㗎啦?」





由此可以,施永義其實仲喺度不斷用腦,不斷推測緊我呢個浸中仔想做咩……可能呢啲就係轉數快嘅人嘅做嘢方式。

「好喇,輪到我問返頭先個問題……」

「……捨得死未?」

係呢剎那,我用自己最快嘅反應速度,喺後褲袋掹埋最後一支螺絲批出嚟!

開行《暴走者》同《原始腦》,一踏步全力扔出去!





支螺絲批就朝住施永義左眼直飛!

豈知施永義身影一晃,佢成個人好似彈弓咁掹到行哂,然後橫手一甩,將我個螺絲批拍飛到旁邊!

直接插穿籃球架隔離個儲物室道石屎牆!

個儲物室入面,隨即屍叫大作!

雖然俾佢拍開咗,但見佢右手五隻手指,好似魷魚鬚咁叉開哂……

「嘿,咁心急啊,」

佢夾硬掹返直啲手指,「知道我留咗份大禮俾你,等唔切自己先拆禮物啊?」

佢執起一條掛喺籃球架上面嘅繩,然後用力一拉!





又係機關嚟!

儲物室成度盪門俾佢『砰』一聲拉爆,大開!

入面好幾條喪屍,慢慢從裏面走出嚟……除咗一隻係爛溶溶,其他都係新近變出嚟嘅。有兩隻腰度仲掛住支電筒,我估就係負責守呢個天台嘅醫院人員。

仲有一個,著保安制服,印巴人,六呎幾高,好大隻!

「尼泊爾人嚟,正宗啹㗎兵後裔,」

施永義話,「係上頭搞個Plan嗰班人,特登留喺度俾我哋用嘅打手,不過佢資質普通,點練都開竅唔到《無痕者》,剩得《暴走者》冇咩用……不過我都好好奇,究竟戴咗Con嘅人喺屍變之後,啲技能係咪都用得返。」

「我當然唔會搵我殺嗰啲Team Leader嚟試,未死過咩?」





「嗱,呢件好嘢,特登益你嘅!」

個儲物室散發出極其刺鼻嘅殺蟲水味,除咗令啲喪屍可以困得住喺入面,亦令我用《無痕者》都察覺唔到佢哋。

見幾條喪屍仲懵懵哋,走出多幾步,啲殺蟲水味漸漸散去,先開始恢復嗅覺。

佢哋猛咁索鼻……

好快就鎖定咗成身血淋淋嘅我。

喺呢個時候,我手邊再冇防身工具!我急起上嚟,只有踎喺地下搵嘢執,最後用《碎骨者》將一塊天台邊嘅石屎壆剝咗落嚟……

就得一塊磗頭咁大!

我緊張到扯哂大氣……啲喪屍望住我行過嚟,速度漸漸加快,嗜血本能,加上黑夜狂性,由甦醒而快速變成沸騰!





而施永義喺呢個時候,已經攬住阿詠,想要橫渡飛索,上屍山!

「你唔係以為我會企定定睇住你表演啊話?」

佢話,「你死唔死得,其實已經唔重要!我只係要你眼白白咁睇住我飛,而又阻止我唔到!最好你條命長到親眼睇住,我釘穿詠詠心口嗰一刻!」

「拜拜啦!」

「你唔使旨意走!」我話。

「顧掂你自己先啦!」

呢個時候,個尼泊爾喪屍已經發哂狂咁撲過嚟,呢股氣勢同暴力,我諗只有之前個裘錦龍先比得上。





我唔知道佢有冇開到暴走者……但喺呢一刻,我除咗全力應付呢條尼泊爾佬,然後睇住施永義同阿詠攬住過飛索,我仲可以做到咩嘢?

喺近乎絕望無力嘅呢刻,我望住條喪屍,好似唔關我事咁。

我個人好平靜,周圍好安靜……

我驀然轉身,用盡我所有開得到嘅技能,將手上舊石屎全力扔出街!

施永義成個人呆哂。

甚至停咗喺度,唔記得要滑飛索……

天上嗰部無人機,我喺好幾部電影都有睇過……喺我轉頭望向部機嗰剎那,無數電影畫面重疊,我好清楚睇到部機個鏡頭喺邊度……

就喺機底,兩隻機翼中間個位,突出嚟舊黑色嘢。

我舊磚頭,直接將個鏡頭打爛!
已有 0 人追稿