要愛情，定要麵包?: 17. 重回海洋公園

「你…想唔想我剩低日子陪住你?」
 
「點會唔想…」
 
「幫你生BB?」
 
「傻妹，一陣妳未婚夫打黎搵妳唔到就麻煩」
 
「佢邊會搵我丫…」思思一面傷心嘅樣再次流露出黎
 


「佢對妳唔好?」
 
「有時啦，佢係一個工作至上嘅人，雖然唔係同居，但係我地可以成個星期都唔見面」
 
「男人為佢事業搏殺，為妳將來生活好過D嘛」
 
「但係我又唔鍾意佢屋企喎」
 
「發生咩事?」
 


「佢地想我快少少生小朋友，但係我發病之後，佢地一個電話都冇打黎問下我有冇事，只係擔心可唔可以順利今年內結婚同生小朋友，仲要係生仔」
 
「一定要今年內生?」
 
「係呀，雙春潤月，佢地屋企好迷信下」
 
「點解妳仲要嫁俾佢?」
 
思思聽到我咁問，佢望實我
 


「妳之前有左?」
 
佢塊面紅過紅蘋果，然後郁手打我
 
「喂…痛架」
 
「我同佢都冇….冇咩過…」
 
「下!!!佢基架?」
 
「其實…我同佢拍拖唔係好耐…大約一年左右」
 
「咁妳仲嫁?」
 
「我以為….我以為今生今世都見唔返你嘛」


 
「思思….」
 
「嗯?」
 
「如果…妳…即係…唔…」
 
佢雙手摸住我塊面，眼淚汪汪咁望實我
 
「點解你要救我?」
 
「因為….我仲好鍾意妳，咁多年黎都係，就算妳嫁左，我都想守護妳一世」
 
當晚，我地兩個坐係海邊好耐，而同一時間，思思腦中有一個想法……
 


「妳想去海洋公園?」
 
「嗯!陪我去丫」
 
思思係我屋企到纏住我要我陪佢去玩
 
「醫生有冇話俾妳玩呀?」
 
「咁我過兩星期就返去….佢都批准我搭飛機囉……」
 
「妳買左機票啦?」
 
「嗯…你有冇時間陪我?」
 
「時間唔係冇嘅….不過…」


 
「你仲係咁驚呀?haha」
 
「妳….妳唔好笑我啦」
 
的確，我真係好怕玩機動遊戲，滑浪飛船已經可以嚇死我，更何況思思實會玩跳樓機之類
 
「妳想幾時去?」
 
「下星期搵日平日去囉」
 
「睇睇先…冇問題嘅…..」
 
係去海洋公園玩果日，我地再一次著起情侶裝出發
 


首先思思話要去睇下熊貓先。果幾隻野真係貴賓囉，嘆得佢地呢，坐係到隨手就拎D竹葉黎食，仲要食到津津有味
 
「喂，似唔似你呀，咁鬼死懶」
 
「似妳咋，坐係到食食食，食完就瞓」
 
「咁串?一陣你就知死」
 
果然冇俾我講錯，佢第一時間就要去玩跳樓機，仲要係幾次
 
每次玩跳樓機果時我都會嚇到死咁滯，今次都唔例外
 
好彩屙清屙淨先去玩，如果唔係就一定瀨
 
跳樓機之後，就係到越礦飛車，每次都係要坐車頭，玩到第二次我都已經開始腳軟，而佢就一D都唔似做完手術嘅人，非常活躍，咁就證明手術非常成功
 
「點呀你?發軟蹄啦?」
 
玩完五次越礦飛車嘅我真係要坐低休息下
 
「洗唔洗休息下呀你」
 
「陪妳玩，有咩所謂，我怕遲D冇機會同妳兩個人玩」
 
「喂呀…唔好提D唔開心野啦」
 
「咁之後妳想玩咩?」
 
「唔….海盜船，仲要坐最邊位」
 
我開始後悔同佢黎海洋公園，佢一次過玩夠咁多年嘅機動遊戲，而我都要陪佢玩返夠本，真係玩到想嘔
 
終於佢都肯停一停休息一下