宇宙傳送門: 1.11

現時朝頭早七點十分，電話鬧鐘響起。

幾經辛苦，我終於開眼，熄咗個鬧鐘。尋晚應該一合埋眼就瞓著咗。

我望出窗，平時嘅呢個時間係我返工起身嘅時間。再睇下電話，今日係星期三，仲有兩個未接嘅電話，係冇Save低嘅號碼，但我有印象好似係嗰個張sir 嘅電話。

我吸咗一口氣，而家我嘅心情已經唔想去理，唔想去諗。我起身，着返件衫。

我表情突然縮埋左一舊，頭仰天「黑次！」





我打開房門，諗住去個廁所，出到嚟見到飯枱放咗啲嘢食。

「早晨。你唔介意嘅話，我煮咗早餐吖。」少女日星係廚房行出嚟。

我冇出聲，去廁所屙咗個早晨尿、刷牙、洗面。

出返嚟之後，我坐低咗，擺係面前嘅呢份早餐賣相都唔錯。就連圈圈都係度食緊。

我開着咗電視，攞起匙羹就開始食，少女見到我食好似放咗心咁笑，佢都跟住一齊食。





電視聲「荃灣城門水塘一帶發現有新奇嘅花種，呢種花嘅花瓣形狀就好似人嘅手，有手掌，有手指….」

「你今日係要返工？」少女問。

返工？我要返工？我仲要唔要返工？我而家要為咩而返工？都要交租，水、電、煤，都要生活，我自己。

食完之後，少女阻止咗我執啲碗碟，話等佢嚟。係咁我就入返房換件衫，準備返工。

到門口前着鞋為止，我今朝早都係冇出過一句聲。





「我，可唔可以留多一晚吖？橫掂我呢度都唔會留得耐…」佢請求。「我可以幫你做家務，煮飯嗰啲。」

事到如今，又有咩所謂，我都已經唔關心。我望一望佢，表情縮埋咗一舊，頭仰天「黑次！」，除咗打個黑次，我冇俾任何反應佢就出咗門口。

就係咁，少女唔止住多咗一晚，第二晚，第三晚都係。放工返到嚟，佢已經煮好咗飯係枱面。

唔單止煮飯，佢仲幫我洗埋衫又晾衫，而且睇得出佢有掃地同拖地，仲餵到圈圈飽一飽。

去到第三晚，我仍然係冇同佢講過一句嘢，呢幾日我都係處於無人之境，就好似靈魂出走咗咁，對身邊發生嘅事都唔在乎。唔知道自己每日係為咩而過，朝頭早起身嘅目的係咩。

我係咪應該要放低？係咪應該唔再執著？係咪應該向前行？係咪應該揾人傾下？呢啲問題有邊個可以答到我？呢啲問題可唔可以唔好再出現係我腦海？我個腦可唔可以唔轉？

迷緊路嘅我，見唔到面前有任何嘅路俾我選擇。

今日星期六，放假嘅日子，瞓到自然醒已經係晏就嘅三點幾。





出咗房門，少女係廳同圈圈玩緊，我係佢身邊經過。

梳洗完，枱面依舊擺好咗飯餸「我同鴨仔頭先食咗㗎啦。」佢放低咗杯水係枱面。

我依舊係無言咁坐低，飲咗杯水就開始食。少女攞走個空杯，重新倒咗一杯水又放咗係我面前。

「你屋企啲嘢食就嚟食晒㗎啦。」佢手指拗一拗頭咁講。

可能佢都知我唔會應佢，佢講完就自己去咗收衫。而家嘅佢，完全變咗我嘅工人咁，我連佢夜晚係邊到瞓都唔知。

我獨自一個人繼續食，等到枱面嘅飯餸都落到我個肚之後，我坐係原位望住少女做家務嘅背影，諗咗一陣。

我，呢個狀態要維持到幾時？





今日天氣好似幾好。

然後，我入屋換咗件出街衫，攞咗鎖匙，環保袋，出嚟廳同少女講「行啦。」

「…..」「吓？」失蹤咗幾日嘅聲音，終於返嚟，少女一時之間都反應唔到過嚟。

「行，一齊去買餸。」我指住門口。